Lesona mo Suesuega e Faia i le Aiga
Mamona 8:12–Eteru 3 (Iunite 29)
Sauniuniga o Anomea mo le Faiaoga o Suesuega e Faia i le Aiga
Aotelega o Lesona o Suesuega e Faia i le Aiga i Aso Taitasi
O otootoga o aoaoga faavae ma mataupu faavae nei sa aoaoina e tamaiti aoga ao latou suesueina leMamona 8:12–Eteru 3 (iunite 29) e le o faamoemoeina e aoao atu o se vaega o lau lesona. O le lesona e te aoaoina atu e taulai atu na o ni nai aoaoga faavae ma matupu faavae nei. Mulimuli i musumusuga a le Agaga Paia ao e mafaufau i manaoga o au tamaiti aoga.
Aso 1 (Mamona 8:12–41)
Ua aoaoina e tamaiti aoga na vaaia e Moronae o tatou aso ma sa ia tusia se faamatalaga faaperofeta o tulaga o le a tatou ola ai. Na mafai ona latou vaaia le ala na avea ai le Tusi a Mamona ma se meaalofa taua mai le Alii e mafai ona taitaiina i latou i aso e gata ai. E tusa ai ma le faamatalaina e Moronae o aso mulimuli, ua aoaoina foi e tamaiti aoga o le a faamasinoina i tatou e le Atua i le auala e tatou te taulimaina ai e matitiva ma i latou e manaomia se fesoasoani.
Aso 2 (Mamona 9)
Na faamaea e Moronae faamaumauga a lona tama e ala i le talaiina pe afai tatou te salamo ma valaau atu i le Atua,o le a tatou le pona pe a tatou o atu i Lona afioaga. Mai ia Moronae, ua aoaoina e tamaiti aoga ona e le fesuisuiai le Atua, o le a Ia saunia vavega e tusa ai ma le faatuatua a Lana fanau ma afai tatou te tatalo i le faatuatua i le Tama Faalelagi i le suafa o Iesu Keriso, o le a Ia auina mai faamanuiaga na o le a fesoasoani ai i le galueaiina o lo tatou faaolataga.
Aso 3 (Eteru 1–2)
Ua aoaoina e tamaiti aoga e faapea o le tusi a Eteru o le otootoga lea e Moronae o papatusi auro e 24 lea sa maua e le nuu o Limae, e pei ona faamaumauina i le tusi a Mosaea. Na tuuina mai e nei papatusi se talaaga o sa Iareto, o e na taitaiina e le Alii i le laueleele o le folafolaga. E ala i le suesueina o aafiaga o sa Iareto, ua aoaoina e tamaiti aoga faapea a o tatou galulue i le faatuatua i faatonuga ua tuuina mai e le Alii ia i tatou, e mafai ona tatou maua le taitaiga sili atu mai ia te Ia. I se tasi itu i le aluga o le faigamalaga i le laueleele o le folafolaga, na aoaiina ai e le Alii le uso o Iareto mo le le valaau atu ia te Ia. E ala i le suesueina o lenei aafiaga, ua aoaoina e tamaiti aoga le taua o le valaau atu i le Tama Faalelagi i le tatalo e le aunoa. O le aafiaga o le uso o Iareto ma le Alii ao fausia vaa na fesoasoani i tamaiti aoga e iloa ai, ao tatou valaau atu i le Alii ma faia la tatou vaega o le foiaina o o tatou faafitauli, e mafai ona tatou maua le fesoasoani a le Alii.
Aso 4 (Eteru 3)
A o taumafai le uso o Iareto e foia le faafitauli o le mauaina o le malamalama i vaa, na ia faatinoina pe a tatou valaau atu ma le lotomaualalo i le Alii,o le a Ia faamanuiaina i tatou e tusa ai ma lo tatou faatuatua ma i Lona finagalo. Ua aoao e tamaiti aoga ao tatou faatinoina lo tatou faatuatua i le Alii, o le a sili atu lo tatou latalata ia te Ia. Na soifua ai le uso o Iareto i nei mataupu faavae, ma sa ia vaaia le tino faaleagaga o le Faaola ma se faaaliga matagofie o tagata uma o le lalolagi.
Faatomuaga
O le tusi a Eteru o se otootoga lea a Moronae o le faamaumauga a sa Iareto. Na faia e le perofeta o Eteru lenei faamaumauga i papatusi auro e 24, lea na maua e se vaega o tagata o le Tupu o Limae. O manatu mo le aoaoina atu nei o le a fesoasoani i tamaiti aoga e malamalama ai i nisi o mataupu faavae e uiga i le tatalo ua aoaoina i le Eteru 1.
Fautuaga mo le Aoaoga
Eteru 1
E ala i tatalo a le uso o Iareto, ua maua ai e ia ma lona aiga ma uo le alofa tunoa ma le taitaiga
Amata le vasega i le fai atu i tamaiti aoga e mafaufau i se tulaga na latou oo i ai ina ua latou matua lagona le manaomia e tatalo mo se fesoasoani. Valaaulia ni nai tamaiti aoga e faasoa a latou aafiaga, pe faasoa se tasi o a oe lava aafiaga.
Faamanatu i tamaiti aoga o le tusi a Eteru o se otootoga lea a Moronae o faamaumauga a sa Iareto. O Iareto, o lona uso, o o latou uo, ma o latou aiga na soifua i le aluga o taimi o le Olo a Papelu (e tusa ma le 2200 T.A.), ina ua faaeseeseina e le Atua gagana a tagata. Valaaulia se tamaitiiti aoga e faitau leotele le Eteru 1:33–35 , ma fai atu i se sui o le vasega e vaai mo mafuaaga na lagona ai e Iareto ma lona uso le manaomia ona tatalo mo se fesoasoani. A o le i faitau le tamaitiiti aoga, atonu e te manao e faamalamalama atu o le fasifuaitau “tagi atu i le Alii” o le isi auala lea e taua ai le “tatalo.” Ona fesili atu lea o fesili nei:
-
O a fesoasoani na manaomia e Iareto ma lona uso mai le Alii?
-
O a mea ua tau mai e nei fuaiupu ia te oe e uiga i faalogona o Iareto e uiga i le faatuatua o lona uso?
Vaevae tamaiti aoga i ni paga. Valaaulia paga taitasi e feauauai i le faitauina leotele e le tasi i le isi mai le Eteru 1:35–42. A o latou te le i faitauina, fai atu ia i latou e vaai mo (1) taimi taitasi na tagi atu ai le uso o Iareto i le Alii ma (2) taimi taitasi na faaalia ai le agalelei a le Alii i le uso o Iareto o se tali i ana tatalo. I le maea ai o le lava o le taimi, valaaulia ni nai paga e faasoa se faataitaiga o le faaalia e le Alii o le agalelei i le uso o Iareto ma lona aiga ona o o latou tatalo faifai pea.
Fesili atu: O a mataupu faavae e mafai ona tatou aoaoina e uiga i le tatalo mai nei fuaiupu? (A o faasoa mai e tamaiti aoga mataupu faavae ua latou iloaina, faamamafa atu le mataupu faavae lenei: A o tatou tagi atu e le aunoa i le Atua i le faatuatua, o le a Ia agalelei mai ia i tatou. Tusi lenei mataupu faavae i le laupapa.)
Faamalamalama i tamaiti aoga e taua tele le manatuaina “o le tatalo o se faatinoga lea e tuufaatasia ai le finagalo o le Tama ma le finagalo o le tamaitiiti i le tasi ma le isi. O le faamoemoega o le tatalo e le o le suia o le finagalo o le Atua, ae ia puipuia mo i tatou lava ma mo isi ia faamanuiaga ua finagalo le Atua e tuuina mai, ae ua faia i se aiaiga i lo tatou valaau atu lea mo i latou” (Bible Dictionary, “Prayer”).
Valaaulia tamaiti aoga e iloilo le Eteru 1:34, 36, 38 ma vaavaai mo mea na valaau atu ai le uso o Iareto i lana tatalo. Fai atu i se tamaitiiti aoga e lisi mea ua faailoaina mai e tamaiti aoga i lalo o le fasifuaitau “tagi atu i le Atua” i le mataupu faavae na e tusia i le laupapa.
Faamamafa atu na faatuatua Iareto ma lona uso ma na naunau e usiusitai i le Alii. Fautuaina tamaiti aoga e faailoga le fasifuaitau “ia tatou faamaoni i le Alii” i le faaiuga o le Eteru 1:38.
Valaaulia tamaiti aoga e iloilo le Eteru 1:35, 37, 40–42 ma vaavaai mo auala patino na faamanuiaina ai e le Atua le uso o Iareto ma lona aiga ma ana uo. A o faaailoa mai e tamaiti aoga nei faamanuiaga, tuu atu i se tamaitiiti aoga e lisiina [faamanuiaga] i lalo o le upu agalelei i le mataupu faavae na e tusia i le laupapa. Faamanino atu na tuuina mai e le Alii faamanuiaga i le uso o Iareto mo faamanuiaga na ia tatalo atu ai.
Tusi fesili nei i le laupapa, pe tusia i ni pepa e tufatufa atu. Fai atu i tamaiti aoga e talanoaina i a latou paga le mataupu faavae ua tusia i le laupapa ma, talanoaina fesili. O le a fesoasoani nei fesili ia i latou e malamalama ai ma lagona le taua o le mataupu faavae.
E faapefea ona e manatu “o le tagi atu i le Atua” e ese mai i le na ona “faia o se tatalo”?
O anafea na e aafia ai poo se tasi e te iloaina [na aafia] i le agalelei o le Tama Faalelagi e ala i le tali o se tatalo?
O a mea e mafai ona e aoaoina e uiga i le Alii mai i Ana tali i tatalo a le uso o Iareto?
O le taimi lava e talanoaina ai e tamaiti aoga nei fesili, atonu e te fai atu ia i latou e faasoa se aafiaga na latou talanoaina i a latou vaega pe faasoa se malamalamaaga mai i a latou talanoaga.
Faasoa lau molimau i le alofa o le Tama Faalelagi mo i tatou ma Lona finagalo e faamanuia tatou a o tatou valaau atu ia te Ia e le aunoa. Valaaulia tamaiti aoga e mafaufau i le ala e mafai ai ona latou faaaoga le mataupu faavae o loo i le laupapa. Mo se faataitaiga, atonu latou te setiina se sini e tatalo e le aunoa pe filifili se auala e tasi ia sili atu ai ona faamaoni o latou tatalo. Atonu e te manao e tuu atu ia i latou le taimi e tusitusi ai mea ua latou mananao e faia i o latou api talaaga mo le suesueina o tusitusiga paia.
Faamalamalama o le suesuega o le tatalo o le uso a Iareto e mafai ona aumaia ia i tatou malamalamaaga faaopoopo i le alofa o le Alii mo i tatou ma faamanuiaga e oo mai ona o le tatalo. Valaaulia se tamaitiiti aoga e faitau leotele le Eteru 1:43. Fai atu i le vasega e mulimuli i le faitauga, ma vaavaai mo faamanuiaga faaopoopo na folafolaina e le Atua ia Iareto ma lona uso. A maea ona lipoti mai e tamaiti aoga mea sa latou aoaoina, faamanino atu e le i tatalo patino le uso o Iareto mo le faamanuiaga o le avea o ona tupuaga ma se malo maoae. Atonu e te fautuaina tamaiti aoga e faailoga i o latou tusitusiga paia le fasifuaitau i le faaiuga o le Eteru 1:43 lea e faaalia ai le mafuaaga na tali ai faapenei le Atua i le uso o Iareto: “ona o lenei taimi umi ua e tagi mai ai ia te au.”
Fesili atu: O a mataupu faavae ua mafai ona tatou aoaoina mai i le agalelei o le Alii ia Iareto ma lona uso, e pei ona faaalia i le Eteru 1:43?
O loo i ai ni nai mataupu faavae e mafai ona aoaoina mai lenei mau. O se tasi o mataupu faavae taua o le: Afai tatou te tatalo e le aunoa ma le faatuatua i le Atua, e mafai ona tatou maua faamanuiaga e sili atu nai lo mea ua tatou talosagaina.
Fesili atu: O anafea na i ai ai sau aafiaga e faaalia ai le moni o lenei mataupu faavae? E te iloaina se tasi na i ai se aafiaga faapena, pe e mafai ona e mafaufau i se tasi i tusitusiga paia sa i ai [lea aafiaga]? (Tau atu i tamaiti aoga o le a e tuu atu ia i latou se taimi e mafaufau ai i faataitaiga ae e te le i fesili atu mo a latou tali. Atonu e te manao foi e faasoa se faataitaiga mai lou lava olaga.)
Ina ia faaiu lenei lesona, faasoa atu lau molimau e faafofoga ma tali e le Atua a tatou tatalo. Ua tumu o Ia i le atamai ma le agalelei ma fiafia e faamanuia Lana fanau. E olioli o Ia pe a tatou tatalo ma le faamaoni ma e le aunoa ia te Ia. Fautuaina tamaiti aoga e faia se taumafaiga ia tatalo ma le faatuatua sili atu. Fautuaina i latou ia manatua e tumu le Tama Faalelagi i le agalelei ma o le a tali o latou tatalo e tusa ai ma mea ua Ia silafia o le a aumaia faamanuiaga silisili i o latou olaga.
Iunite e Sosoo ai (Eteru 4–12)
I le iunite e sosoo ai, o le a sili ona aoaoina tamaiti aoga e uiga ia sa Iareto. E ui lava na lapataiina e perofeta sa Iareto e aua nei filifilia ni tupu, na faia lava e tagata, ma na aumaia e tupu ia tagata ia faatagaotauaina. O tagata o e mananao i pulega faalelalolagi e masani lava ona latou faaaogaina faapotopotoga faalilolilo ia faaopoopo i o latou manaoga manatu faapito. Ua faamaumauina e Moronae le tele o mea matagofie na faia ona sa i ai i nisi o tagata le faatuatua maoae. Ua ia aoaoina o i latou o e faamaualalaloina i latou lava i luma o le Atua ma faatuatua ia te Ia, o le a maua Lona alofa tunoa e fesoasoani ai ia latou faatoilaloina o latou vaivaiga.