Lesona mo Suesuega e Faia i le Aiga

Mosaea 26–Alema 4 (Iunite 14)

Sauniuniga o Anomea mo le Faiaoga o Suesuega e Faia i le Aiga

Aotelega o Lesona o Suesuega e Faia i le Aiga i Aso Taitasi

O le aotelega lenei o aoaoga faavae ma mataupu faavae na aoaoina e tamaiti aoga ao latou aoaoina le Mosaea 26–Alema 4 (iunite 14) e le o fuafuaina e aoao atu o se vaega o lau lesona. O le lesona o loo e aoaoina e taulai atu i na o ni nai aoaoga faavae ma mataupu faavae nei. Mulimuli i musumusuga a le Agaga Paia ao e mafaufau i manaoga o au tamaiti aoga.

Aso 1 (Mosaea 26)

O le suesue e uiga i se augatupulaga a sa Nifae o e lei atiaeina ni molimau o le talalelei, ua iloa ai e tamaiti aoga o le atiaeina ma le faatumauina o se molimau, e manaomia ai lo tatou taumamafa i afioga a le Atua, tatalo ma le faatuatua, ma usitai i poloaiga a le Alii. Mai taumafaiga a Alema ina ia fesoasoani i isi ia salamo, na iloaina ai e tamaiti aoga o le a faamagaloina e le Alii i latou o e salamo ma le famaoni i o latou loto.

Aso 2 (Mosaea 27)

Ao suesue ia tamaiti aoga i le liua a Alema le Itiiti ma atalii o Mosaea, sa latou aoaoina ai ia upumoni o le talalelei nei e tolu: O le a tali mai e le Alii a tatou tatalo faamaoni mo isi ma tuu atu pea ia i latou lo latou faitalia; e tatau ona toe fanauina i tatou taitoatasi e ala i le Togiola a Iesu Keriso; ma o le salamo ma le faamaoni, e tatau ai i se tagata ona faia mea uma e mafai ina ia toefaaleleia ai ni faaletonu na ia faia. Na tusi faamaumauina e tamaiti aoga i totonu o a latou api talaaga mo le suesueina o tusitusiga paia le auala na suia ai i latou e ala i le Togiola.

Aso 3 (Mosaea 28–29)

Ao suesue ia tamaiti aoga e uiga i le naunautaiga o atalii o Mosaea ina ia talai atu le talalelei i sa Lamana, sa latou iloaina ai o le loloto o le liua, o le a faateleina ai lo tatou naunautaiga e faasoa atu le talalelei. Sa latou tusia foi ia aafiaga sa latou mauaina lea na fesoasoani ia i latou i le fia faasoa atu o le talalelei. E faitauina e tamaiti aoga le suiga o sa Nifae i totonu o le malo ma iloaina ai o loo i ai i tagatanuu se tiute o le lagolagoina o tulafono ma taitai amiotonu.

Aso 4 (Alema 1–4)

O le suesueina o faataitaiga o sa Nifae lotomaualalalo, na iloaina ai e tamaiti aoga afai tatou te ola i le talalelei, o le a i ai le filemu i o tatou olaga, e tusa lava pe o sauaina i tatou. Ao latou faitau e uiga i le fouvale o sa Amiliki, na latou iloaina ai o le a tatou maua le fiafia po o le faanoanoa e fuafua lea po o ai tatou te filifili e usiusitai i ai. Sa avea Alema ma se faataitaiga o se tasi o le sa filifili e usiusitai i le Alii. O lana tuuto le maluelue i le valaauina o sa Nifae faamaualuluga ina ia salamo, na fesoasoani lea i tamaiti aoga ina ia iloa le tuuina atu e auauna a le Alii o se molimau ma valaau atu i tagata agasala ia salamo.

Faatomuaga

O lenei lesona o le a faatagaina ai tamaiti aoga e toe iloilo ia mataupu faavae o le salamo ma mafaufau loloto i le manaomia e i tatou o le suia e ala atu i le Togiola a Iesu Keriso —faapei o Alema le Itiiti ma atalii o Mosaea. Tatalo mo le taitaiga ina ia iloa po o le a se auala sili ona lelei e te fesoasoani atu ai i tamaiti aoga e sailia lenei suiga i o latou olaga.

Fautuaga mo le Aoaoga

Mosaea 26

Ua maua e Alema le musumusuga e uiga i le auala e faamasino ai i latou o e na faia agasala mamafa

Ina ia amata lenei lesona, valaaulia se tamaitiiti aoga e faitau le aotelega o le mataupu i le amataga o le Mosaea 26. Faitau ia tulaga nei i le vasega. Fai atu i tamaiti aoga e mafaufau po o le a se mea e mafai ona latou faia e fesoasoani ai i le tagata i tulaga taitasi.

1. Na faia e se tamaitai talavou se agasala matuia, ae ua fefe o ia e talanoa i lana epikopo.

2. Ua i ai i se alii talavou se naunautaiga ina ia salamo, ae na te leiloa le auala e faatino ai.

3. Ua toe faia foi e se tamaitai talavou se agasala sa na ia faia muamua, ma ua popole o ia nei le toe faamagaloina o ia e le Alii.

4. Ua filifili se alii talavou e salamo, ae peitai e musu o ia e faamagalo atu i se tagata na faatiga ia te ia.

Tusi ia mau faasino nei i luga o le laupapa: Mosaea 26:21–23, 29–31. Faamalamalama atu i tamaiti aoga o nei mau na faamaumau ai ia faaaliga a le Alii ia Alema e uiga i tagata o e na faia ni agasala mamafa. Valaaulia ia tamaiti aoga e faitau mau nei ma faailoa mai ia le itiiti ifo ma le tasi se mataupu faavae e ono fesoasoani i se tasi o tagata na faamatala mai i le lisi na mavae atu. Fai atu nisi o tamaiti aoga e faasoa atu a latou tali i le vasega. Atonu e te manao foi e faasoa atu se tali ma lau molimau e uiga i se mataupu faavae e uiga i le salamo na maua i le Mosaea 26.

Toe faamanatu i tamaiti aoga na latou fuafua e faaaoga se tasi o mataupu faavae na latou aoaoina mai le Mosaea 26 i a latou lava taumafaiga ina ia salamo. Uunaia i latou e mulimuli ia latou fuafuaga.

Mosaea 27–28

Ua salamo Alema le Itiiti ma atalii o Mosaea ma ua toe fanauina.

Ina ia tuu atu i tamaiti aoga se faataitaiga o se tagata na oo i se suiga tele o le loto, valaaulia nisi o i latou e auauai i le faitauina leotele o aafiaga nei na faasoa mai e Elder Keith K. Hilbig o le Fitugafulu:

“[Sa maua e se alii talavou na auauna atu i Europa i Sasae] ma lana soa se tama faamatua tagata e igoa ia Aiveni.… O le la tagata sailiili sa faigata lona olaga, ma sa iloa lava i ona lavalava ua tuai, ma lana soesa e le seleina, ma ona uiga le mautonu.Sa faigata ma le lelei le olaga ia te ia.

“Ona sa leai sona malamalama i mea faalelotu, o lea sa tele ai ni mea sa tatau ona faatoilalo e Aiveni. O amioga e le tusa ai ma le talalelei toefuataiina na tatau ona lafoai.Sa manaomia ona taliaina ni mataupu faavae fou ma ola ai.Sa manao Aiveni e aoao, ma sa ia saunia o ia lava ma le filiga mo lona papatisoga ma le faamauga.Sa tumau pea le tuai o ona lavalava ma lana soesa veuveua, ae peitai ua ia laasia faasitepu muamua. E lei leva ona papatisoina ia Aiveni ae siitia ese le faifeautalai. Sa faamoemoe o ia ia la toe fetaui ma Aiveni.

“E ono masina mulimuli ane, ae toe tofi e le peresitene o le misiona le alii faifeautalai talavou i le paranesi sa i ai muamua.I le faateia ai ma le naunau e toe foi atu, sa vave o atu ai le alii faifeautalai ma lana soa fou, i le lotu faamanatuga i lona Aso Sa muamua na toe foi atu ai i le paranesi. …

“Na toetoe o tagata uma o le faapotopotoga toagaogao na iloa e le faifeautalai. Ae peitai, sa ia sueina ae lei maua i le faapotopotoga le alii na la aoaoina ma papatisoina ma lana soa i le ono masina ua te’a. Na oso ae i le faifeautalai se lagona o le le fiafia ma le faanoanoa. …

“Na faasalaveia atugaluga ma manatu o le faifeautalai i le taunuu atu o se alii e le masani ai o le sa faanatinati atu ma fusi o ia.Sa i ai i le alii foliga mama se ataata mautinoa ma na iloa lelei lava lona amiolelei i le susulu o ona foliga.Sa faia sona ofutino paepae ma se fusiua na seleina lelei, na alu atu tapena le faamanatuga mo le faapotopotoga toagaogao i lena taeao o le Sapati. Ana le tautala lava le alii e le iloa o ia e le faifeautalai. O Aiveni fou lea ae le o le Aiveni tuai lea sa laua aoaoina ma papatisoina!Sa vaaia e le alii faifeautalai le tino mai i lana uo o le vavega o le faatuatua, salamo, ma le faamagaloina; sa ia vaaia le moni aiai o le Togiola.

“… Na oo ia [Aiveni] le ‘liliu o le loto’ (Alema 5:26) na lava lea ina ia papatisoina ai o ia ma fetaomi atu i luma i le faagasologa faifai pea o le liuaina” (“Oo i se Suiga o le Loto,” Liahona, Iuni 2008, 29–31).

Fesili atu: O le a se faamaoniga i le tala na faaalia ai le auala na suia ai Ivan? (Ia faamautinoa atu ua manino o le suiga na faia e Ivan i fafo o ni faailoga ia o se suiga loloto i totonu o ia.)

Toe faamanatu atu i tamaiti aoga o loo famatalaina i le Mosaea 27 se isi aafiaga o se suiga e ala atu i le Togiola. Valaaulia se tamaitiiti aoga e tu i luma o le vasega ma aotele mai le Mosaea 27. Afai o maua, e mafai foi ona faaali atu e le tamaitiiti le ata o le Liua o Alema le Itiiti (Tusi Ata o le Talalelei [2009], nu. 77). Fai atu i se isi tamaitiiti aoga e faitau le Mosaea 27:24–26. Ona fai atu lea i le vasega e faailoa mai po o ai e tatau ona suia e ala i le Togiola, pe “toe fanauina i le Atua.” Ao tali mai tamaiti aoga, e tatau ona latou faailoa atu le malamalamaaga e uiga i le upumoni lenei: E tatau ia i tatou uma taitoatasi ona toe fanauina i le Togiola a Iesu Keriso.

Fesili atu: Na faapefea ona e vaaia se tagata ua suia mo le lelei e ala i le Togiola a Iesu Keriso?

Valaaulia ia tamaiti aoga e mafaufau loloto i fesili na fesiligia ai e le faifetautalai i le tala ia ia lava ina ua mavae le la toefaatasiga ma Aiveni: “‘O le a le tele o se “liliuga o le loto” ua ou i ai i le ono masina ua tuanai?’ … ‘Pe ua ou “toe fanaufouina” ea?’” (siiina mai ia Keith K. Hilbig, “Oo i se Suiga o le Loto,” 31).

Valaaulia ia tamaiti aoga e faitau le Mosaea 27:24, 28, e tagai ai mo le mea na faia e Alema ma le mea na faia e le Alii na mafua ai le suiga ia Alema. Fai atu ia i latou e faamatala atu pe aisea latou te talitonu ai e tatau i le tagata ma le Alii ona auai faatasi uma i se liuga tele o le loto.

Toe famanatu atu i tamaiti aoga ina ia latou faatumuina se siata ma ni fuaitau o loo faaalia ai le eseesega ia Alema ao lei i ai se liuga o le loto ma faapea foi i le taimi na mavae ai (i le lesona mo aso e 2). I le galuega fai 2 mo le aso 2, na tusia ai e tamaiti aoga i totonu o a latou api talaaga mo le suesueina o tusitusiga paia se tasi o fuaitau mai le koluma “Mavae ai” lea na latou faamoemoe o le a faamatalaina ai i latou i o latou olaga atoa ma faamalamalama ai le mafuaaga. Valaaulia nisi o tamaiti aoga e faasoa mai mea sa latou tusia. Molimau atu faapea o le liuga tele o le loto e ono mafai mo i tatou e ala i le Togiola a Iesu Keriso.

Fai atu i tamaiti aoga e mafaufau loloto pe na faapefea ona suia i latou e ala i le Togiola a Iesu Keriso. Valaaulia i latou e faasoa mai o latou manatu, pe a latou mananao i ai. Atonu e te manao foi e faasoa atu se auala na e suia ai e ala i le Togiola.

Uunaia ia tamaiti aoga e galulue agai i le mauaina o se suiga o le loto ina ia mafai ona latou tuputupu ae faalatalata atu i le Alii ma faatagaina le Togiola e faia se eseesega i o latou olaga.

Kopi le siata lenei i luga o le laupapa ao lei amataina le vasega, pe fai se kopi mo tamaiti taitasi:

Mosaea 27:32–37	Mosaea 28:1–4
Na faapefea ona suia Alema ma atalii o Mosaea? O le a se mataupu faavae sa e aoaoina mai nei mau? Aisea e te manatu ai o le faia o se faaleleiga o se vaega taua lea o le salamo?	Na faapefea ona suia Alema ma atalii o Mosaea? O le a se mataupu faavae sa e aoaoina mai nei mau? O a ni aafiaga i lou olaga na tataiina ai oe e te fia faasoa atua le talalelei i isi?

Fai atu i le afa o le vasega e tali ia fesili o loo i le koluma muamua o le siata ma le isi afa e tali ia fesili i le koluma lona lua. Fai atu i tamaiti aoga taitasi e galulue taitoatasi. Valaaulia ni nai tamaiti aoga mai vaega taitasi e lipoti mai a latou tali.

Valaaulia ia tamaiti aoga e mafaufau loloto i le auala latou te ono faia ai se faaleleiga mo a latou agasala ma faateleina ai lo latou naunautaiga e faasoa atu le talalelei i isi.

Mosaea 29–Alema 4

Ia faamanuia e le Atua ia sa Nifae o e na tumau i le amiotonu i taimi o sauaga.

Toe faamanatu atu i tamaiti aoga o uluai mataupu o le Alema o loo famatalaina ai ia vaitaimi o faafitauli ma sauaga mo tagata amiotonu o sa Nifae. Valaaulia ia tamaiti aoga e faitau le leoa le Alema 1:25, 27. Fai atu ia i latou e faailoa mai po o le a se mea na faia e nei tagata sa Nifae i le fagasologa o le vaitaimi o sauaga.

Faailoa atu faapea na faamanuiaina e le Alii ia sa Nifae amiotonu ina ia latou manuia atili ai nai lo i latou na amioleaga (tagai i le Alema 1:29–32). Fai atu i tamaiti aoga e taumafai e mulimuli i le faataitaiga a nei sa Nifae faamaoni ao latou fetaiai ai ma faigata i o latou olaga.

Iunite e Sosoo Ai (Alema 5–10)

E faapefea ona e iloa ua e toe fanauina? O le a le uiga o le toe fanauina? Ao suesue e tamaiti aoga le Alema 5–10, o le a latou mauaina ni fesili e mafai ona latou fesiligia ai i latou lava e toe iloilo pe na toe fanauina i latou ma maua se liuga tele o le loto. E le gata i lea, o le a latou mauaina se malamalamaaga sili atu e uiga i le loloto ma le mana o le Togiola.