Lesona 73: Alema 6–7

Lesona 73

Alema 6–7

Faatomuaga

Ina ua uma ona faatulagaina le Ekalesia i Saraemila, na alu Alema i le nuu o Kitiona. Na ia iloa ai ua sili atu le faamaoni o tagata iina nai lo i latou o loo i Saraemila. O le mea lena, na ese ai lana savali i Kitiona nai lo lana savali i Saraemila. Na ia uunaia ia tagata ina ia faaauau pea ona faalagolago i le Alii ma saili e faaaoga Lana Togiola i o latou olaga. Na ia molimau atu o le a tauaveina e le Faaola i Ona lava luga le oti ma o tatou agasala, ma o le a Ia tauaveina foi i Ona lava luga o tatou tiga, mafatiaga, ma’i, ma faigata, ina ia mafai ona Ia silafia le auala e fesoasoani mai ai ia i tatou.

Fautuaga mo le Aoaoga

Alema 6

Ua faatulagaina e Alema le Ekalesia i Saraemila ma ua alu atu e talai i Kitiona

Ao lei faia le lesona, fai i se tamaitiiti aoga e sauni e faasoa mai faapuupuu i le vasega nisi o auala na ia lagona ai le faamanuiaina mo ana taumafaiga e auai i le lotu. Ina ia amataina le lesona, fai i le tamaitiiti aoga lenei e sau i luma o le vasega ma faasoa mai ni ona manatu sa ia saunia. Atonu e mafai foi ona e faasoa atu le auala na faamanuiaina ai oe e ala i le auai i le Ekalesia.

Faailoa atu le Alema 6 e ala i le faamatalaina atu o lenei mataupu o loo aoao atu ai le auala na faamalosia ai e Alema ma isi taitai perisitua le Ekalesia i Saraemila.

Valaaulia se tamaitiiti aoga e faitau leotele le Alema 6:4–6. Fai i le vasega e mulimuli i le faitauga, ma vaavaai mo ni mea na faia e tagata o le Ekalesia i Saraemila mo i latou o e lei iloa le Atua. Fai i tamaiti aoga e lipoti mai mea sa latou aoaoina.

Tusi ia upumoni nei i luga o le laupapa. Ua faatulagaina le Ekalesia mo le manuia o tagata uma. Ina ia fesoasoani i tamaiti aoga e mafaufau e uiga i le auala e mafai ai e lenei upumoni ona aafia o latou olaga, fesili atu:

O le a sou manatu po o le a faapefea ona faamanuia e le Ekalesia i lenei vaitaimi i latou o e le iloa le Atua?

Fai i tamaiti aoga e mafaufau i se tasi o loo manaomia le sili atu o le iloa lelei o le Atua. Atonu o lenei tagata o se tasi o le Ekalesia po o se tagata mai se isi tapuaiga. Molimau atu i faamanuiaga ua tatou maua ona o i tatou o tagata o le Ekalesia, ma uunaia ia tamaiti aoga e valaaulia isi e fefaasoaai mai na faamanuiaga.

Alema 7:1–13

Ua valoia e Alema le afio mai o Iesu Keriso

Vaevae le vasega e fai paga. Fai i paga taitasi e talatalanoa i a latou tali i fesili nei:

O a ni mea o le a tutupu i le lumanai o loo ua e fiafia i ai?

A uma ona maua e paga se taimi e talatalanoa ai i a latou tali o le fesili lenei, fai atu i nai tamaiti aoga e faasoa mai a latou tali i le vasega atoa. Ona faamatala atu lea ina ua uma ona faatulagaina e Alema le Ekalesia i Saraemila, ona ia alu lea i le nuu o Kitiona. Sa ia tau atu i tagata iina faapea mai mea uma lava o le a oo mai i le lumanai, e tasi lava le mea “ua sili atu ona taua nai lo ia mea uma” (Alema 7:7). Na ia aoao atu ia mataupu faavae o le a fesoasoani e saunia ai tagata mo faamanuiaga o le a oo mai ona o lenei mea na tupu i le lumanai.

Valaaulia se tamaitiiti aoga e faitau leotele le Alema 7:3–6. Fai i le vasega e vaavaai mo faamoemoega na i ai ia Alema e faatatau i le nuu o Kitiona. Valaaulia se tamaitiiti aoga e faitau leotele le Alema 7:18–19. Fai i tamaiti aoga e faamatala mai le mea na aoaoina e Alema e ala i uunaiga e uiga i le nuu o Kitiona.

Valaaulia tamaiti e faitau le leoa le Alema 7:7, 9–10, ma vaavaai mo le mea na tupu lea na lagona e Alema e sili ona taua le iloaina e tagata.

E tusa ai ma Alema, o le a le “mea e tasi lea na sili ona taua” nai lo seisi lava mea o le a oo mai? Aisea e te manatu ai o le afio mai o le Faaola o le mea lea e sili ona taua na tupu i le olaga atoa?
Aisea e te manatu ai o le a tauina atu e Alema i tagata o e ua uma ona talitonu ma e malosi le faatuatua o le a manaomia lo latou salamo?

Faamatala na aoao e Alema le mafuaaga na avea ai le afio mai o Iesu Keriso ma mea e sili ona taua o le a tupu i le talafaasolopito atoa o tagata. Fai i ni nai tamaiti aoga e feauauai i le faitauina leotele o le Alema 7:11–13. Valaaulia le vasega atoa e mulimuli i le faitauga ma faailoa mai le mea na tauave i luga e le Faaola Lava Ia mo i tatou. (Atonu e manaomia lou faamatala o le fesoasoani o lona uiga o le tuuina atu o le laveai po o le alu atu e fai se fesoasoani i se tasi.)

Faailoa atu o le Alema 7:11–13 o se fasifuaitau o mau tauloto. Atonu e manaomia lou fautuaina o tamaiti e maka le fasifuaitau lenei i se auala faapitoa ina ia faigofie ai ona latou mauaina.

Lisi ia tali a tamaiti o ni ulutala i le pito i luga o le laupapa. E ono aofia i tali ia tiga, puapuaga, faaosoosoga, ma’i, oti, le malosi (vaivai po o le le atoatoa o le malosi), ma agasala.

Atonu e te manao e fautua i tamaiti aoga e maka le fasifuaitau “o ituaiga eseese uma” i le Alema 7:11. Fai i ai e faailoa mai faataitaiga o tulaga taitasi o loo tusia i luga o le laupapa. Ao tuuina mai e tamaiti ia faataitaiga, tusi ia faataitaiga i lalo ifo o ulutala talafeagai. (Mo se faataitaiga, e ono lisiina lekanesa i lalo ifo o ma’i, ae ono lisiina le le atoatoa faaletino i lalo o le le malosi.)

Fai i se tamaitiiti aoga e faitau le faamatalaga lenei mai ia Elder Bruce C. Hafen o le Fitugafulu:

“O le Togiola e le mo na o tagata agasala” (“Beauty for Ashes: The Atonement of Jesus Christ,” Ensign, Apr. 1990, 7). Atonu e te manao e tusi le faamatalaga lenei i luga o le laupapa ma fautuaina ia tamaiti aoga e tusi i totonu o a latou tusitusiga paia i talaane o le Alema 7:11–13.

E tusa ai ma mea sa tatou faitauina i le Alema 7:11–13, o le a sou manatu o le uiga o le mea sa ta’ua e Elder Hafen ina ua ia fai mai “o le Togiola e le mo na o tagata agasala”?

Tusi le upumoni lenei i luga o le laupapa. Na puapuagatia Iesu Keriso ina ia laveai i tatou mai le agasala ma le oti ma fesoasoani ia i tatou i luitau o le olaga faaletino.

Ina ia fesoasoani i tamaiti aoga ina ia faalauaitele le malamalama i le auala latou te faalagolago ai i le Togiola a le Faaola, faitau le faamatalaga lenei mai ia Elder Jeffrey R. Holland o le Korama a Aposetolo e Toasefululua:

“Pe o oulua tauivi ea ma se temoni o mea ua fai ma vaisu—tapaa po o fualaau oona po o le taalo faitupe, po o le tai fana’e o le mala faatafuna o ponokarafi? … Pe o e le mautonu ea i le faasinomaga o itupa po o le sailia o lagona lelei ia te oe lava? Pe o oe—po o se tasi e te alofa i ai—o loo feagai ma se faama’i po o se faanoanoaga po o le oti? Po o a lava ia isi laasaga e mafai ona e uia ina ia foia ai ni popolega, ia sau muamua lava i le talalelei a Iesu Keriso. Faatuatua i Ana folafolaga. …

“O lenei faalagolago i le natura alofa tunoa o le Atua o loo i le totonugalemu o le talalelei na aoaoina e Keriso. Ou te molimau atu o le Togiola a le Faaola e siieseina ai mai ai i tatou e le gata o avega o a tatou agasala, ae faapena foi i avega o o tatou mafatiaga ma faanoanoaga, o o tatou lototiga ma o tatou le fiafia. [Tagai Alema 7:11–12.] Mai lava i le amataga o le faatuatua i se fesoasoani faapena o le a tuuina mai ai ia i tatou e le gata i le mafuaaga ma se auala e faaleleia ai, ae o se faamalosiauga ina ia tuuese a tatou avega ae tauave lo tatou faaolataga” (“O Mea Malepelepe e Fonofonoina,” Ensign po o le Liahona, Me 2006, 69–71).

E mafai faapefea ona fesoasoani ia i tatou le malamalama i le Alema 7:11–13 pe a tatou fetaiai ma luitau?

Ina ia faailoa atu nisi o auala e mafai ona tatou maua ai le fesoasoani ma le malosi e ala i le Togiola a Iesu Keriso, faitau ia tulaga nei. A uma ona faitauina ia tulaga taitasi, fai i tamaiti e faamatala mai le auala na mafai ai e Iesu Keriso, e ala i Lana Togiola, ona fesoasoani i se tagata o loo fetaiai ma sea ituaiga luitau.

O se tamaitai talavou sa lavea i se faalavelave tau taavale ma ua le toe mafai ai ona faaminoi ona vae.
O se alii talavou ua ma i nisi o ana filifiliga le lelei sa fai. Ua ia lagona le faanoanoa ma le le agavaa.
O se alii talavou na maliu talu ai nei lona tama, ma ua siitia ese atu le alii talavou ma lona tina i se nuu fou. Ua ia lagona le faanoanoa ma le tuuatoatasi, ma ua ia leiloaina pe o le a faapefea ona toe oo i se lelei.

Faasoa atu lau molimau i le mana o le Togiola ma le mamao e oo atu i ai. Ona tuu atu lea i tamaiti ni nai minute e tali ai i totonu o api o le vasega po o api talaaga mo le suesueina o tusitusiga paia se tasi o fesili nei. (Atonu e te manao e tusi fesili nei i luga o le laupapa ao lei amataina le vasega, saunia se pepa e tufatufa atu o i ai fesili nei, pe faitau lemu ia fesili ina ia mafai e tamaiti ona tusiaina.)

O anafea na fesoasoani ai le Togiola ia te oe po o se tagata e te iloa i se tasi o auala o loo ta’ua i le Alema 7:11–13?
O le a se mea o le a e faia e faalagolago ai i le Togiola ao e feagai ai ma luitau?

Valaaulia ni nai tamaiti aoga e faasoa mai i le vasega ni mea sa latou tusiaina. (Toe faamanatu atu ia i latou e le tatau ona faasoa mai se mea e le faalauaiteleina pe patino.)

Alema 7:14–27

Ua uunaia e Alema ia tagata e faaauau pea i le ala e tau atu i le malo o le Atua.

Ina ia faamanatu atu i tamaiti aoga le auala na faamatala ai e Alema le tulaga faaleagaga o le o Kitiona, valaaulia se tasi o i latou e faitau leotele le Alema 7:19. Faamamafa atu sa i ai tagata i “le ala e tau atu i le malo o le Atua.” Faamatala atu sa manao Alema e fesoasoani ia i latou e tumau ai i lena ala.

Ina ia fesoasoani i tamaiti aoga ia iloa o le ola ai i mataupu faavae o le talalelei, ua tatou mulimuli ai i le ala o le malo o le Atua, tusi se auala i luga o le laupapa. I le amataga o le auala, tusi ai Olaga Faitino. I le faaiuga o le auala, tusi ai Malo o le Atua.Vaevae le vasega i ni vaega se lua. Fai i le tasi vaega e suesue i le Alema 7:14–16 ma le isi vaega e suesue i le Alema 7:22–24. Fai i vaega e vaavaai mo mea e manaomia ona tatou faia ma le mea e manaomia ona avea ai i tatou ina ia mulimuli i le ala e taitai atu ai i le malo o le Atua.

A ua lava se taimi e faitau ai tamaiti, valaaulia nisi o i latou e o mai i le laupapa. Fai ia i latou e tusi i luga o le auala ia galuega ma uiga na latou maua lea e taitai atu ai i le malo o le Atua. Atonu e te mafaufau e fesili atu i tamaiti po o le a le uiga ia i latou o nisi o faatinoga po o amio i luga o le auala. Atonu e mafai ona e fai atu ia i latou e mafaufau pe faapefea ona latou mulimuli i lenei ala i o latou olaga. Molimau atu faapea afai tatou te ola faamaoni, ua tatou “i ai i totonu o le ala e tau atu i le malo o le Atua” (Alema 7:19).

Mau Tauloto—Alema 7:11–13

Talu ai o le Alema 7:11–13 o se fasifuaitau o mau tauloto umi, atonu e faigata mo tamaiti aoga le taulotoina. Peitai o le gagana a Alema o loo aofia ai ni upu faapitoa lea e mafai ona fesoasoani i tamaiti ina ia manatua i le aluga o o latou olaga le mana ma le lautele o le aapa atu o le Togiola. Ina ia fesoasoani ia i latou e tauloto ia upu autu nei, tusi ia fuaitau o le Alema 7:11–13 i luga o le laupapa ao lei amataina le vasega, sui upu autu nei i avanoa i soo se taimi lava e oso ane ai: tiga, faigata, faaosoosoga, ma’i, maliu, vaivai, agasala, le usiusitai. (Mo se faataitaiga, o au tusitusiga e uiga ia Alema 7:11 o le a amataina faapenei: “Ma o le a afio atu o ia, ma mafatia … ma … ma … o ituaiga eseese uma.”)

Ao tou faitauina leotele mai le Alema 7:11–13 i le vasega, tuu atu i tamaiti aoga e tau mai upu o loo misi. A ua uma ona faia lenei mea mo ni nai taimi, fai atu i tamaiti aoga pe mafai ona latou tusiaina ni upu i se isi fasi pepa e faailoa mai ai le mea na ave e le Faaola i Ona lava luga mo i latou. Valaaulia ia tamaiti aoga ina ia manatua pea le mea na faia e Iesu Keriso mo i latou, aua afai o le a oo mai ni luitau o le a mafai ona latou maua le faatuatua sili atu i le “mana o lana laveaiga.”

Manatua: Atonu e te fia faaaogaina ni nai minute i le amataga o lau vasega lea e sosoo ai ina ia vaai pe o manatua pea e tamaiti ia upu autu nei e faatatau i le aapa atu le gata o le Togiola a le Faaola.

Tala ma Faamatalaga o Talaaga

Alema 6:6. O le anapogi ma le tatalo e suitulaga ia i “latou o e e lei silafia le Atua”

Ina ia faamamafa atu faapea o faamanuiaga o le auai i le Ekalesia ua faamoemoe mo fanau uma a le Atua, atonu e te manao e faitau le faamatalaga lenei mai ia Elder Jeffrey R. Holland o le Korama a Aposetolo e Toasefululua:

“E tatalo tagata uma mo faifeautalai. Tau ina ia faia ai pea. Aua o lena agaga e tasi, e tatau foi ona tatou tatalo mo i latou o e o loo (po o latou e moomia ona) feiloai atu i faifeautalai. I Saraemila, na poloaiina ai na tagata ina ia ‘potopoto faatasi i le anapogi ma le tatalo faatauanau’ [Alema 6:6] mo i latou o e e le’i auai i le Ekalesia a le Atua. E mafai ona tatou faia faapea.

“E mafai foi ona tatou tatalo i aso uma mo o tatou lava tomai faafaifeautalai. Tatalo i lalo o le taitaiga faalelagi mo mea faapea, o le avanoa faafaifeautalai na o loo e manao i ai ua uma ona saunia i le loto o se tasi o loo manao i le talalelei o loo ia te oe. ‘Aua o i ai nei lava nisi e toatele i le lalolagi … o e ua taofia mai le upu moni ona ua latou le iloa le mea e maua mai ai.’[MF&F 123:12.] Tatalo ina ia latou mauaina oe! Ma ia nofouta, aua e toatele e o i le lalolagi o le a lagonaina le oge i o latou olaga” (“Molimau ia te A’u,” Liahona, Iulai 2001, 16).

Alema 7:1-5. O tagata o i le nuu o Kitiona

Alema 7 o loo aofia ai aoaoga a Alema i tagata sa nonofo i le nuu o Kitiona, lea sa i le vanu o Kitiona, “sa faaigoa i le tagata o le na fasioti e le lima o Neoa i le pelu” (Alema 6:7). Sa avea Kitiona ma soo faamaoni a Iesu Keriso ma na avea ma meafaigaluega i aao o le Atua i le laveaiina mai o le nuu o Limae mai le nofopologa. Na ia teena le aoaoga faavae a Neoa i le afioga a le Atua seia oo i le oti. (Tagai Mosaea 22:3–9; Alema 1:7–9.) O tagata na nonofo i le nuu lea na faaigoa i lenei tagata faamaoni o ni tagata faamaoni foi i latou (tagai Alema 7:17–20, 26). Na mafai ona tautala atu Alema ia i latou i upu paia ma le fiafia, i le iloaina sa latou talitonu ma sa filifili e tapuai atu i le Atua moni ma le ola (tagai Alema 7:6). O lo latou faamaoni atonu na saunia ai i latou i le mauaina o lesona mamana a Alema e uiga i le Togiola —faapea o Iesu Keriso o le a “ave i ona luga tiga ma ma’i o ona tagata,” o le a Ia “fesoasoani ai i ona tagata, e tusa ma o latou vaivaiga,” ma o le a Ia “ave i ona luga agasala a ona tagata” (Alema 7:11–13).

Alema7:10 . Na soifua mai Iesu “i Ierusalema”

Sa faamalamalama mai e Peresitene Iosefa Filitia Samita le nofoaga na soifua mai ai le Faaola e pei ona tautino mai e Alema:

“E leai se faafitauli po o se feteenaiga i le Tusi a Mamona ma soo se upumoni ua faamaumauina i le Tusi Paia. A faitauina ma le totoa le mea na fai mai ai Alema o le a faaali mai ai e lei i ai sona faamoemoega e folafola mai ai o Iesu o le a soifua mai i Ierusalema. Sa iloa lelei e Alema. E faapena foi Iosefa Samita ma i latou sa galulue faatasi ma ia i le aumaia o le Tusi a Mamona. Ana faapea e fai mai Alema, ‘e soifua mai i Ierusalema, le nuu o tatou tama,’ o le a faia ai se eseesega atoa i le lalolagi. Ia ona tatou faapea lea na ia faia se mea sese. E le i faia e Alema se mea sese, ma o le mea na ia fai mai ai e moni.

“O Dr. Hugh Nibley, i ana mataupu o suesuega mo le perisitua mo le 1957, (O Se Vaaiga i le Tusi a Mamona), i le Lesona 8, itulau 85, sa ia fai mai ai le mea lenei i lea mataupu:

“‘… O se tasi o mataupu e masani lava ona osofaia ai le Tusi a Mamona o le faamatalaga i le Alema 7:10 e faapea o le Faaola o le a soifua mai i “Ierusalema o le nuu o o tatou tama.” O i, o Ierusalema e le o le aai “i totonu o le nuu o o tatou tama,” o le laueleele. Sa soifua mai Keriso i se nuu pe a ma le ono maila mai le aai o Ierusalema, e le o le aai, ae o le nofoaga lea ua tatou iloa nei sa faailogaina e tagata anamua latou “o le nuu o Ierusalema”’” (Answers to Gospel Questions, tuuf. Iosefa Filitia Samita le Itiiti., 5 volu. [1957–66], 1:174). Iosefa Filitia Samita le Itiiti., 5 volu. [1957–66], 1:174).

Alema 7:11–13. “Tiga ma puapuaga ma faaosoosoga o ituaiga eseese uma”

Na ofaina atu e Peresitene Henry B. Eyring o le Au Peresitene Sili malamalamaaga e faatatau i le faamafanafanaga e mafai ona tatou mauaina ona o le Togiola a le Faaola:

“O le a faamafanafanaina i tatou pe afai e tatau ona tatou faatalitali i le tiga mo le faamafanafanaga na folafola mai e le Faaola aua ua Ia silafia, mai le mea na oo i ai, le auala e faamaloloina ai ma fesoasoani ai ia te i tatou. Ua aumai e le Tusi a Mamona ia i tatou le faamautinoaga patino o Lona mana e faamafanafanaina ai. O le faatuatua foi la i lena mana, o le a tatou maua ai le onosai a o tatou tatalo, ma galulue, ma faatalitali mo le fesoasoani. Semanu e mafai lava ona Ia silafia le auala e fesoasoani mai ai e ala i faaaliga, ae na Ia filifili e aoao e ala i Lona lava aafiaga patino” (“Puapuaga,” Ensign po o le Liahona, Me 2009, 24).

Na aoaoina e Elder Dallin H. Oaks o le Korama a Aposetolo e Toasefululua e faapea e mafai ona fesoasoani le Faaola ia i tatou i soo se luitau e feagai ma tatou:

“E toatele o loo tauaveina ni avega mamafa. O nisi ua mou atu e pele ona o le oti pe o loo tausia se tasi e le atoatoa le malosi. O nisi o loo faamanualia ona o le tete’a. O nisi o loo faananau mo se faaipoipoga e faavavau. O nisi ua faapologaina e mea ua fai ma mausa po o amioga e pei o le ava malosi, tapaa, fualaau oona, po o le ponokalafi. O isi o loo i ai ni le atoatoa i le tino po o le mafaufau. O nisi o loo tauivi ma le tosina atu i tagata o lana lava itupa. O nisi o loo i ai lagona matautia o le lotovaivai po o le le atoatoa.

“O le mana faamalolo o le Alii o Iesu Keriso—e tusa pe aveeseina ai a tatou avega pe faamalosia ai i tatou ina ia onosaia ma ola ai ma avega … —o loo avanoa mo mafatiaga uma i le olaga faaletino” (“Na te Faamaloloina I Latou e Mafatia i Avega,” Ensign po o le Liahona, Nov. 2006, 6, 9).

Na tusia e Elder Jeffrey R. Holland o le Korama a Aposetolo e Toasefululua e uiga i le malamalamaaga ma le tomai o Keriso ina ia fesoasoani ia i tatou:

“Na savalia e Keriso le ala e tatau ona savalia e tagata uma ina ia mafai ai ona ia silafia le ala e fesoasoani mai ai ma faamalosia ai i tatou i taimi sili ona faigata. Na te silafia avega sili ona loloto ma patino o loo tatou tauaveina. Ia iloa le tele o aafiaga tiga ua tatou tauaveina. Na ia tuuina uma i lalo na tiga ina ia ona tuuina atu i tatou i luga. E leai se feitagai po o se faavauvau po o se faanoanoaga o le olaga na te lei oo i ai mo i tatou ma tauaveaina i luga o ona lava tauau malolosi ma agaalofa” (Christ and the New Covenant: The Messianic Message of the Book of Mormon [1997], 223–24).