Potutusi
Lesona 87:27–29

Lesona 87

Alema 27–29

Faatomuaga

Ina ua le manuia ia osofaiga a sa Lamana i tagata sa Nifae, na liliu atu lo latou ita i tagata Aneti-Nifae-Liae. Talu ai ona sa osifeagaiga Aneti-Nifae-Liae e le toe faamasaaina lava le toto o isi, o lea na latou mumusu ai e fetagofi atu ia latou auupega e puipuia i latou lava. Na taitaiina atu e Amona tagata o Aneti-Nifae-Liae i Saraemila, lea sa latou mauaina ai le puipuiga mai tagata sa Nifae ma sa taua ai o le nuu o Amona. A o puipuia e sa Nifae le nuu o Amona mai sa Lamana, na faitau afe sa Nifae ma sa Lamana na feoti i le taua. E ui i le faanoanoa na lagonaina e sa Nifae ona o le feoti o i latou o e pele ia i latou, ae o le toatele o i latou sa maua le faamoemoe ma le olioli i le folafolaga a le Alii faapea o e amiotonu o le a “faatutu mai i latou e mau i le itu taumatau o le Atua, i se tulaga o le fiafia e le gata” (Alema 28:12).

Fautuaga mo le Aoaoga

Alema 27

Na taitaiina atu e Amona ia tagata o Aneti-Nifae-Liae i le saogalemu i totonu o sa Nifae

Fai i tamaiti e sii o latou lima pe sa i ai se taimi na faia ai e se tagata se folafolaga ia i latou ona ia motusiaina lea o lena folafolaga. Ona fai atu lea ia i latou e sii o latou lima pe sa i ai se taimi na faia ai e se tagata se folafolaga ia i latou ma sa ia tausiaina.

  • O le a sou lagona e uiga i na tagata ia na tausia a latou folafolaga? Aisea?

  • O le a sou manatu e uiga i lagona o le Alii e faatatau i na tagata ia na tausia a latou folafolaga ia te Ia?

Faailoa atu le Alema 27 e ala i le faamatalaina atu ina ua uma taumafaiga le manuia a sa Lamana e faaumatia sa Nifae, sa latou osofaia loa le nuu o Aneti-Nifae-Liae, o tagata sa Lamana ia na faaliliuina e ala i le galuega a Amona ma ona uso. Fai i tamaiti aoga e toe mafaufau i mea na faia e tagata o Aneti-Nifae-Liae e faaali atu ai i le Alii o le a latou tausia la latou feagaiga e le toe “faaaogaina auupega mo le faamaligiina o le toto o tagata” (Alema 24:18). (Na latou tanuina a latou auupega o le taua.) Ina ia iloa le tulaga o le naunautai o tagata o Aneti-Nifae-Liae e tausia la latou folafolaga, fai i se tamaitiiti aoga e faitau leotele le Alema 27:2–3. (Atonu e mafai foi ona e fautuaina ia tamaiti e faitau le Alema 24:18–19 ma tusi le faasinoala lenei i le avanoa o i talaane o le Alema 27:3.)

  • Afai o oe o se tasi o Aneti-Nifae-Liae, o le a se mea faigata i le tausiaina o lau feagaiga ma le tau ai e puipuia oe lava ma e pele ia te oe?

Valaaulia tamaiti e faitau le leoa le Alema 27:4–10, vaavaai mo le mea na fuafua Amona e fai e puipuia ai tagata o Aneti-Nifae-Liae ma fesoasoani ia i latou i le tausiga o a latou feagaiga. Fai i se tamaitiiti e aotele le fasifuaitau lenei.

Fai i se tamaitiiti aoga e faitau leotele le Alema 27:11–12, ma fai i le vasega e vaavaai mo le faatonuga na mauaina e Amona mai le Alii. Faamatala atu na mulimuli tagata o Aneti-Nifae-Liae ia Amona i Saraemila (tagai Alema 27:13–15). (Atonu e te manao foi e aotele le Alema 27:16–19, faailoa atu o nei tulaga na toe faatasia ai Amona ma isi atalii o Mosaea ma Alema, e pei ona faamatalaina i le Alema 17:1–4.)

Faamalamalama atu na fesili atu le faamasino sili o sa Nifae i tagata pe latou te faatagaina ia tagata Aneti-Nifae-Liae e nonofo faatasi ma i latou. Fai i tamaiti e faitau le leoa le Alema 27:22–24, vaavaai mo le tali a sa Nifae i le folafolaga a le faamasino sili.

  • Na faapefea ona tali mai sa Nifae o le a latou fesoasoani i tagata Aneti-Nifae-Liae?

  • Aisea tou te mafaufau ai na malilie sa Nifae e puipui e sa avea muamua o latou fili?

Fai i tamaiti e faitau le leoa le Alema 27:26 e iloa ai po o le a le igoa lea na amata faaigoa ai e sa Nifae ia tagata o Aneti-Nifae-Liae.

Fai i nai tamaiti aoga e feauauai i le faitau leotele mai o le Alema 27:27–30. Tuu atu i le vasega e mulimuli i le faitauga, tagai mo le mea na ilogaese ai le nuu o Amona. Valaaulia tamaiti e lipoti mea sa latou mauaina.

  • O le a se mea na faagaeetia ai oe e uiga i le nuu o Amona? Aisea?

  • O le a se mea o aoao mai e le Alema 27:27–30 e faatatau i le sootaga i le va o le faaliliuina i le Alii ma le tausiga o feagaiga? (Atonu e mafai ona eseese upu e faaaoga e tamaiti, peitai e tatau ona latou faailoa mai latou te malamalama i le upu moni lenei: A liua atoa i tatou i le Alii, tatou te tausia feagaiga ua tatou osia ma Ia. Atonu e te manao e tusi le mataupu faavae lenei i luga o le laupapa.)

  • O ai i lou olaga na avea ma se faataitaiga o lenei mataupu faavae?

Alema 28

Na faatoilaloina e sa Nifae ia sa Lamana i se taua tele lava

Faasino atu e ui lava o le toatele o sa Nifae na faamaoni, ae na latou fetaiai lava ma tofotofoga faigata.

Faamatala atu na faasoa mai e Peresitene Thomas S. Monson le tala lenei i se mea na ia oo i ai i lona talavou. Ina ua uma ona faalogo ua maliu lana uo o Afa Patton i le Taua Lona Lua o le Lalolagi, sa alu atu ia Thomas Monson ao talavou e asiasi i le tina o Afa, e le o se tagata o le Ekalesia. Na toe ta’ua mulimuli ane:

“Na mou atu se malamalama mai le olaga o Mrs. Patton. Sa lofituina o ia i le faanoanoa ma le lotovaivai.

“Faatasi ai ma se tatalo i lo’u loto, sa ou oo atu ai i le auala savali masani i le aiga o Patton, ma tau mafaufau po o a ni upu faamafanafana e mafai ona sau mai laugutu o se tamaitiiti.

“Sa matala le faitotoa, ma fusi atu au e Mrs. Patton e pei lava o sana tama. Na avea le fale ma se falesa a o tootutuli ai se tina loto mafatia ma se tamaitiiti faatauvaa i le tatalo.

“Ina ua ma toe tulai ae iluga, sa faatausisila mai Mrs. Patton i o’u mata ma fai mai: ‘Tommy, ou te le auai i se ekalesia, a o oe e te auai. Ta’u mai ia te au, e toe ola ea Afa?’” (“Mrs. Patton—ua Toe Faaauau le Tala,” Ensign po o le Liahona, Nov. 2007, 22).

  • Faamata e faapefea ona e tali atu i le fesili a Mrs. Patton?

Faitau i le tali a Peresitene Monson:

“I le malosi sili sa ia te au, sa ou molimau atu ai ia te ia, e moni o le a toe ola ia Afa” (“Mrs. Patton—ua Toe Faaauau le Tala,” 22).

  • E faapefea ona suia le vaaiga a i latou ua maliliu nisi e pele ia i latou i le malamalama ai i le ata o le faaolataga?

Fai i nai tamaiti aoga e feauauai i le faitauina mai o le Alema 28:1–3. Fai i le vasega e saili le tau na totogiina e sa Nifae e fesoasoani ai i le nuu o Amona i le tausiga o la latou feagaiga. Fai i tamaiti e faitau le leoa le Alema 28:4–6, vaavaai pe na faapefea ona aafia ia sa Nifae i le tele naua o tagata feoti. Fai i tamaiti e suesue i le Alema 28:11–12 i ni mafuaaga atonu na oo ai i nisi tagata le fefe pe a maliu se e pele ia te ia, a o lagona e isi le faamoemoe.

  • Aisea e lagona ai e nisi tagata le fefe pe a maliliu nisi o e pele ia te ia?

  • Aisea e lagona ai e nisi tagata le faamoemoe pe a maliliu nisi o e pele ia te ia? (Atonu e mafai ona eseese upu e faaaoga e tamaiti, peitai e tatau ona latou faailoa mai faapea afai tatou te mauaina le faatuatua ia Iesu Keriso faapea ma folafolaga a le Alii, o le a tatou mauaina le faamoemoe ma le olioli i taimi o le oti.)

Tusi le fuaiupu lea e le o uma i luga o le laupapa: Ma ua faapea ona tatou vaai ai …

Fai i tamaiti pe faapefea ona latou faamaeaina le fuaiupu e faatatau lea i mea sa latou suesueina i le Alema 28.

A ua lava loa le taimi e tali mai ai tamaiti, fai i se tamaitiiti aoga e faitau mai le Alema 28:13–14. Fai i tamaiti e faatusatusa a latou tali ma mataupu faavae na aoaoina i nei mau. (Atonu e te manao e fautua atu i tamaiti e faailoga le fasifuaitau “ma ua faapea ona tatou vaai i ai” i taimi uma lava e faailoa mai i nei mau. Faamalamalama atu e masani lava ona faaaogaina e Mamona le fasifuaitau lenei e faailoa atu ai ni lesona taua e mafai ona tatou aoaoina mai tala o i le Tusi a Mamona.)

  • O le a se mea na e faitauina i le Alema 27–28 lea o loo lagolagoina le faamatalaga a Mamona “ma ua faapea ona tatou vaai i ai”?

  • O ana fea na e vaaia ai se tagata o feagai ai ma lona lava oti po o le oti o se pele ia te ia ma le faamoemoe ona o le faatuatua ia Iesu Keriso?

  • E faapefea ona e faamatalaina le toetu ina ia fesoasoani ai i se tagata ia maua le faamoemoe ao feagai ai lona lava oti po o le oti o se pele ia te ia?

Alema 29

Ua mitamita Alema i le aumaia o agaga i le Atua

Tau atu i tamaiti o le Alema 29 o loo aofia ai ni faanaunauga a Alema ina ia avea ma meafaigaluega i aao o le Alii. Valaaulia se tamaitiiti aoga e faitau leotele le Alema 29:1–3. Fai i le vasega e tagai mo le mea semanu e faia e Alema pe ana ia mauaina le “moomooga o [lona] loto”. (Semanu e na te “[alagaina] le salamo i tagata uma”.

  • E tusa ma le Alema 29:2, aisea na manao ai Alema i lenei mea?

Fai i tamaiti e faitau le leoa le Alema 29:4–5, tagai i le mea e tuuina atu e le Alii ia i latou o e o i ai ni manaoga amiotonu. (Afai e manaomia e tamaiti se fesoasoani i le taliina o lenei fesili, e mafai ona e faasino atu i le fuaitau “Ua ou iloa e tuu mai e ia i tagata…e tusa ma o latou loto”. Faamatala atu afai tatou mananao i mea amiotonu, o le a faamanuiaina i tatou e le Alii e tusa ai ma na manaoga. Faailoa atu afai e le faataunuuina uma o tatou manaoga amiotonu i lenei olaga, o le a faataunuuina i le faavavau.)

Fai i tamaiti e suesue le tagata lava ia i le Alema 29:10, 14, 16, tagai i le faamanuiaga na mauaina e Alema ao ia fesoasoani atu i isi ia o mai ia Keriso. Valaaulia tamaiti e faasoa mea sa latou mauaina.

  • O le a le upu na faaaoga e Alema e faamatala lona lagona e uiga i le fesoasoani atu i isi ia o mai ia Keriso? (Atonu e mafai ona e fautuaina ia tamaiti aoga e faailoga le faaaogaina taitasi o le upu olioli i mau nei.)

  • O le a se mataupu faavae e mafai ona tatou aoaoina mai le aafiaga a Alema i le fesoasoani atu i isi ia salamo ma o mai ia Iesu Keriso? (Atonu e mafai ona eseese upu e faaaoga e tamaiti, peitai e tatau ona latou faailoa mai latou te malamalama i le upu moni lenei: O le a tatou lagonaina le olioli pe a tatou fesoasoani atu i isi ia salamo ma o mai ia Iesu Keriso.)

  • O ana fea na e lagona ai le olioli lea e oo mai i le fesoasoani atu i isi ia o mai ia Keriso?

Uunaia ia tamaiti aoga e vaavaai mo ni avanoa e fesoasoani atu ai i isi e o mai ia Iesu Keriso. Mafaufau e faasoa atu sau oe lava aafiaga faafaifeautalai manaia.

Tala ma Faamatalaga o Talaaga

Alema 28:11-12. Mauaina o le filemu pe a oo mai le oti

Na saunoa Elder Russell M. Nelson o le Korama a Aposetolo e Toasefululua e uiga i le auala e mafai ai e a tatou galuega i lenei olaga ona aumaia le filemu ia i tatou pe a oo mai le oti:

“Uso e ma tuafafine, tatou te ola ina ia oti ma tatou te oti foi ina ia ola—i se isi lalolagi. Afai tatou te saunia lelei, e le aumaia e le oti se atuatuvale. Mai se vaaiga i le faavavau, e na o i latou lava e lei saunia e fetaia’i ma le Atua e manatu ua vave tele mai le oti.

“O le taimi lenei e sauniuni ai. Ma, a oo mai le oti, ua mafai ona tatou sii atu i le mamalu selesitila ua saunia e le Tama Faalelagi mo Ana fanau faamaoni. O le taimi nei, mo i latou e pele ua tuua … ua faamafanafana mai le tui o le oti ona o le mausali ia Keriso, o se faamoemoe lelei, o se alofa i le Atua ma tagata uma, ma se naunautai loloto e auauna atu ia te i latou” (“O Le Taimi Lenei e Sauniuni Ai,” Ensign po o le Liahona, Me 2005, 18).

Na faamatalaina e Elder Wilford W. Andersen o le Fitugafulu le auala na taulima ai e nisi uo le maliu o lo latou tama:

“Talu ai nei na maliu ai se tasi o au uo pele ona o le kanesa. O ia ma lona aiga o ni tagata e maoae le faatuatua. Na musuia lava le vaaia o le lagolagoina e lo latou faatuatua o i latou i lenei taimi na sili ona faigata. Na faatumulia i latou i se toafilemu i totonu lea na lagolagoina ma faamalosia ai i latou. Faatasi ai ma le latou faatagaga ou te fia faitauina atu ai se tusi a se tasi o le aiga na tusia i nai aso ao lei maliu lona tama:

“‘O nai aso mulimuli na matuai sili ona faigata. O anapo a o matou faapotopoto i autafa o le moega o Tama, na matuai mautinoa lava le i ai o le Agaga o le Alii ma sa galue faamaoni o se faamafanafanaga ia i matou. O loo matou toafilemu lava. O se tulaga aupito faigata lenei ua oo i se tasi o i matou, ae matou te lagona le toafilemu i le iloa … ua folafola mai e lo tatou Tama oi le Lagi, o le a matou toe mafuta faatasi o se aiga. Ina ua uma ona logo e le fomai le Tama i le falemai ua leai se isi mea e mafai ona toe faia, na vaavaai mai o ia ia i matou uma ma se faatuatua atoatoa ma fesili sao mai, “E i ai se isi o loo i totonu o le potu lenei e i ai se faaletonu i le ata o le faaolataga?” Matou te faafetai mo se tama ma se tina o e na aoaoina i matou ia talitonu atoatoa i lenei fuafuaga’” (“O Le Papa o lo Tatou Togiola,” Ensign po o le Liahona, Me 2010, 17–18).