Lesona 54

Mosaea 4

Faatomuaga

O le ootia i aoaoga a le Tupu o Peniamina, na salamo ai tagata ma maua se faamagaloga o a latou agasala. Sa “faatumulia i le olioli” ma maua le “filemu o le lotofuatiaifo” (Mosaea 4:3). Na faaauau e le Tupu o Peniamina ona aoao atu i latou, ma fesoasoani ia latou malamalama i mea e tatau ona latou fai e “faatumauina ai se faamagaloga o [a latou] agasala” (Mosaea 4:12). O le faia o lena mea, sa ia faatusatusa ai i latou i tagata aisi, e faalagolago i le Atua mo le faaolataga. Sa lapataia foi i latou e ia i le matautia o le le vaavaaia lelei o o latou mafaufauga, upu, ma amioga.

Fautuaga mo le Aoaoga

Mosaea 4:1–8

Na maua e le nuu o le Tupu o Peniamina se faamagaloga o a latou agasala ma ua tutumu i le olioli ma le filemu

Fai i tamaiti e manatunatu loloto i fesili nei:

• E mafai faapefea ona tatou iloa ua faamagaloina a tatou agasala?

Faitau le saunoaga lenei mai ia Peresitene Harold B. Lee:

“Afai o le a oo mai le taimi ua maea ai mea uma e te mafai ona e faia e te salamo ai i au agasala, po o ai lava oe, ma po o fea foi o loo e i ai, ma ua uma ona e toe faaleleia ma toe totogi atu i mea uma e tusa ai ma lou iloa; afai o se mea e aafia ai oe i le Ekalesia ma ua uma ona e alu i e o i ai le pule, ona e manao ai lea i se tali e faamaonia ai pe mata o le a talia oe e le Alii. I lau sailiga ia te oe lava, o le a mafai ona e lagona ai le toafilemu i lou mafaufau, pe afai o loo e saili i ai, ma o le faailoga lea e te iloa ai ua talia e le Alii lou salamo.” (“Ia Outou Tutu i Mea Paia,” Liahona, Mati 1974, 35 ).

Faamanatu i tamaiti na faasoa atu e le Tupu o Peniamina ia upu a se agelu i le ala e maua ai se faamagaloga o agasala. E mafai ona e faamanatu ia i latou upu patino a le agelu e uiga i le tagata natura o se fili lea o le Atua ma taunuuga o loo faatalitali mai mo i latou e oti e aunoa ma le salamo mai a latou agasala (tagai Mosaea 3:19, 23–27).

Fai i tamaiti e faitau lemu le Mosaea 4:1–2, ma vaavaai mo fasifuaitau o loo ta’u mai ai le ala na tali atu ai le nuu o Tupu o Peniamina i upu a le agelu. Vaai ni nai tamaiti e faasoa maia fasifuaitau na latou maua. Afai e manaomia e tamaiti ona malamalama i le fasifuaitau o le “tulaga faaletino,” faamatala i ai o le upu faaletino o le faafeagai o le faaleagaga. E faasino o tatou naunauga faaletino nai lo tatou manao faaleagaga e faalatalata atu i le Alii. E mafai ona e fesili i tamaiti e faitau le Alema 41:11 ona faamatala lea o le fasifuaitau “tulaga faaletino” i a latou lava upu. Ina ia fesoasoani i tamaiti ia malamalama i le fasifuaitau “e oo lava i le efuefu o le eleele ua…maualalalo ifo ai,” valaaulia i latou e faitau le Helamana 12:4–8. Ona fesili lea i ai e faamatala mai i a latou lava upu, pe faapefea ona faamatalaina se tasi e musu e mulimuli i fautuaga a le Alii, ua itiiti ifo nai lo le efuefu o le eleele. Ia mautinoa latou te malamalama e le mafaufauina e le Tama Faalelagi Lana fanau e itiiti ifo nai lo le efuefu o le eleele.

Faamaoti atu a oo ina iloa e tagata a latou agasala, ona salamo ai lea, ma faailoa atu lo latou faatuatua ia Iesu Keriso ma Lana Togiola. Valaaulia se tamaitiiti e faitau le Mosaea 4:3Fai i le vasega e matau lelei pe na faapefea e tagata ona iloa ua faamagaloina a latou agasala.

• E tusa ma le Mosaea 4:3, o a lagona e maua e i latou ua faamagaloina e le Alii?

• Sa maua e tagata se faamagaloga o a latou agasala ona o le “faatuatua tele ia Iesu Keriso sa ia i latou.” O a mea na faaalia ai lo latou faatuatua? (tagai Mosaea 4:1–2.)

• I au lava upu, o a ni mea e mafai ona tatou aoao mai i le Mosaea 4:1–3 e uiga i le mauaina o se faamagaloga o a tatou agasala? (O se tasi o tala e tatau ai o le a o tatou faaalia lo tatou faatuatua ia Iesu Keriso ma salamo ma le faamaoni, ona tatou maua lea o se faamagaloga o a tatou agasala. Atonu e te manao e valaaulia tamaiti e maka ia upu ma fasifuaitau autu i le Mosaea 4:1–3 o loo faamamafa mai ai lenei mataupu faavae.)

Faitau le saunoaga lea mai ia Elder Neil L. Andersen o le Korama a Aposetolo e Toasefululua, e aotele ai mea e tatau ona tatou faia e maua ai se faamagaloga o agasala:

“A o tatou ta’ta’u atu ma le faamaoni a tatou agasala, toe faalelei mea e mafai ona tatou faia i le na tatou faatiga i ai, ma lafoai a tatou agasala e ala i le tausia o poloaiga, ua tatou i ai i le faagasologa o le mauaina o le faamagaloga. E oo mai le taimi, o le a tatou lagonaina ai le matuu atu o le lagona o le ita i lo tatou faanoanoa, ma aveese ai le tausalaina i o tatou loto (Alema 24:10) ae aumai le filemu i o tatou loto fuatiaifo. (Mosaea 4:3).

“Mo i latou o e ua salamo faamaoni, ae e foliga mai e le lagonaina se toafilemu: faaauau pea ona tausi poloaiga. Ou te folafola atu ia te outou, o le a oo mai le toomaga i le taimi a le Alii lava ia. O le faamalologa e manaomia ai foi se taimi [umi]” (“Salamo … Ina Ia Ou Faamaloloina Outou.,” Ensign po o le Liahona, Nov. 2009, 42).

Valaaulia le vasega e tusi i a latou api talaaga mo le suesueina o tusitusiga paia po o se api mo le vasega, ia mea ua latou aoaoina e uiga i le salamo e pei ona latou talanoaina ai le Mosaea 4:1–3. Fai foi i ai e tusia pe mafai faapefea ona latou faaaogaina le faatuatua ia Iesu Keriso a o latou sailia se faamagaloga mo a latou agasala.

Faamatala ina ua molimauina le uiga faaalia o le salamo o tagata, sa faamanatu atu ia i latou e le Tupu o Peniamina lo latou faalagolago i le Alii. Fai i ni tamaiti e feauaua’i e faitau leotele mai le Mosaea 4:4–8. Fai i le vasega e vaavaai mo mea na manao le Tupu o Peniamina e malamalama i ai lona nuu pe a maea ona mauaina le faamagaloga o a latou agasala.

• E tusa ai ma nei fuaiupu, o a “tulaga e mafai ai ona faaolaina [i tatou]”?

A uma ona tali mai tamaiti i le fesili lenei, valaaulia i latou e toe iloilo lemu le Mosaea 4:4–8, ma vaavaai mo fasifuaitau o loo faamatala ai tagata ua mauaina le faaolataga. Atonu e te manao e fautuaina e maka ia fasifuaitau nei. Mafaufau e tuu atu fesili nei:

• O le a sou manatu o le a le uiga o le “filiga i le tausiga o poloaiga [a le Alii]?”

• O a ni nai taga e faaalia ai ua “tuu atu [e se tagata] lona faalagolago i le Alii?”

• O a ni auala ua e vaaia ai le “agalelei o le Atua” ma Lona “mana lē faatusalia”?

Ta’u atu o le salamo ma le usiusitai e matua tele se galuega ma se taumafaiga e manaomia ai i la tatou pitolaau. Peitai, tusa lava po o le a lo tatou galulue malosi, e le mafai lava ona tatou mauaina le faamagaloga o a tatou agasala ma le meaalofa o le faaolataga e aunoa ma le Togiola a Iesu Keriso.

Mosaea 4:9–30

Ua aoao mai e le Tupu o Peniamina le auala e faatumauina ai se faamagaloga o agasala

Tusi le faatumauina o se faamagaloga o a tatou agasala i luga o le laupapa. Ta’u atu i le vasega ina ua uma ona maua e tagata o se faamagaloga o a latou agasala, sa aoao atu i latou e le Tupu o Peniamina i le auala e faatumauina ai, pe tausisia, lena tulaga mama ma le atoatoa.

• E taua foi i se a mo i tatou taitoatasi ona iloa?

Valaaulia tamaiti e suesue lemu i le Mosaea 4:9–11, ma vaavaai mo mea e tatau ona tatou faia e faatumauina ai se faamagaloga o a tatou agasala. A ua lava se taimi, fai i tamaiti e fefaasoaai mea ua latou maua. Fuafua e tusi a latou tali i luga o le laupapa. O tali e mafai ona aofia ai le manaomia ona tatou manatua le silisiliese o le Atua, faalotomaulaloina o i tatou lava, tatalo i aso taitasi, ma tutu mausali i le faatuatua.

Fuafua e fai atu fesili nei e fesoasoani ai i tamaiti o le vasega ia loloto lo latou malamalama ma faaaoga mea sa latou faitauina:

• Ua aoao mai e le Tupu o Peniamina e tatau ona tatou “talitonu i le Atua” (Mosaea 4:9). Na ia ta’ua foi le tofo i le alofa o le Atua ma ia manatua e le aunoa “le silisiliese o le Atua” (Mosaea 4:11). O a aafiaga ua fesoasoani ia te oe e te iloa ai e moni ma e mamana le Atua ma e alofa foi o Ia ia te oe?

• E faapefea e le manatua o le mana o le Atua, agalelei, ma le alofa ona uunaia lo tatou naunautai e usitai ia te Ia?

Faitau leotele le Mosaea 4:12 i tamaiti. Fai i ai e faailoa mai faamanuiaga o i lenei fuaiupu e maua e i latou e faia mea ua aoaoina ai e le Mosaea 4:5–11.

Faamatala o le Mosaea 4:13–16 o loo aofia ai le faamatalaga a le Tupu o Peniamina o tagata e faatumauina se faamagaloga o a latou agasala. Vaevae tamaiti i ni vaega se tolu. Fai i le vaega muamua e suesue le Mosaea 4:13, o le vaega e lua e suesue le Mosaea 4:14–15, ma le vaega lona tolu e suesue le Mosaea 4:16. Ia faitau e tagata taitoatasi a latou fuaiupu e tofi i ai, ma faailoa mai uiga faaaliga ma uiga auaumama na faamatalaina e le Tupu o Peniamina ia i latou o e saili e faatumauina se faamagaloga o a latou agasala.

A uma ua lava se taimi, valaaulia tamaiti e lipoti mai mea sa latou mauaina. A o latou faia, faamamafa le mea moni afai tatou te faalotomaulaloina i tatou lava i luma o le Atua ma taumafai e atiina ae uiga faa-Keriso, e mafai ona tatou faatumauina se faamagaloga o a tatou agasala. Fesoasoani i tamaiti e faaaoga mea ua latou aoaoina i le fai atu o fesili nei a o ta’ua uiga taitasi po o uiga auaumama:

• Aisea e te manatu ai o lenei uiga (po o le uiga auaumama) e fesoasoani i le faatumauina o le faamagaloga o a tatou agasala?

• O anafea na e vaai ai i faataitaiga o lenei uiga (po o le uiga auaumama)?

Na faaaoga e le Tupu o Peniamina se talafaatusa mamana e mafai ona fesoasoani i tamaiti e talisapaia ai faamanuiaga ua latou maua mai le Alii ma faaosofia ai i latou e atiina ae ia uiga na latou aoaoina i le Mosaea 4:13–16. Fai i tamaiti e faitau lemu le Mosaea 4:16–23.

• E tusa ma le saunoaga a le Tupu o Peniamina, e faapefea ona avea i tatou uma ma tagata ‘aisi?

• E mafai faapefea e lenei malamalama ona fesoasoani tatou te agaalofa atili ai i isi?

• Mo i latou e le mafai ona foai atu i tagata aisi, po o i latou foi e le lava ni mea e foai atu, o le a se fautuaga ua tuu mai e le Tupu o Peniamina i le Mosaea 4:24–26?

• I le Ekalesia i ona po nei, e faapefea i le foai atu o taulaga anapogi ona fesoasoani ia i tatou e mulimuli ai i le fautuaga o i le Mosaea 4:26? E mafai faapefea e le autalavou ona auai i le faatinoina o taulaga anapogi? (O tali e aofia ai, e mafai ona latou anapopogi, o nisi e mafai ona latou foai atu i taulaga anapogi, ma o i latou e umia le Perisitua Arona i nisi vaega o le lalolagi latou te aoina mai taulaga anapogi mai tagata o uarota po o paranesi.)

Ta’u atu e faapea, o mea uma lava ua poloaiina i tatou e fai, e i ai nisi taimi e mafai ai ona faigata ona faapaleni o tatou olaga. Tuu atu i se tamaitiiti e faitau leotele le Mosaea 4:27.

• E te manatu o le a le uiga o le faia o mea uma i le “poto ma le faatulagaga lelei”?

• E mafai faapefea e lenei fautuaga ona fesoasoani ia te oe?

Valaaulia se tamaitiiti e faitau leotele le Mosaea 4:29–30 Ta’u i ai o le Mosaea 4:30 o se mau tauloto. E mafai ona e fautuaina tamaiti e maka le mau lea i se ala e iloagofie ai, ina ia faigofie ai ona latou sueina.

• O le a le sootaga i le va o mafaufauga, upu, ma galuega? O le a se mea e mafai ona tatou faia e vaavaaia ai i tatou lava? O a ni auala e mafai ai ona tatou fesoasoani le tasi i le isi?

O le Mosaea 4:30 o se mau tauloto. Tagai i le manatu faafaiaoga o loo i le faaiuga o le Lesona e fesoasoani ai i tamaiti i lo latou taulotoina o lenei mau.

Fuafua e tuu atu i tamaiti ni nai minute e tusi ai i a latou api talaaga mo le suesueina o tusitusiga paia, pe faapefea e mataupu faavae o i le Mosaea 4:9–30 ona fesoasoani ia i latou a o latou taumafai e faatumauina se faamagaloga o a latou agasala. Molimau atu i le alofa o le Alii mo i latou taitoatasi, ma Lona finagalo mo i latou ia salamo ma faatumauina se faamagaloga o a latou agasala.

Tusia o uunaiga

Ua fautuaina e Elder Richard G. Scott o le Korama a Aposetolo e Toasefululua ia tamaiti aoga e tusi i lalo uunaiga latou te mauaina: “Ia atinae poto faapitoa o le aoaoina e ala i mea e te vaai i ai, aemaise lava mea e uunai ai oe e le Agaga Paia ia e lagonaina… … Tusi i se mea malupuipuia, ia mea taua ua e aoaoina mai le Agaga. O le a e iloaina ao e tusia musumusuga taua e masani ona tele isi musumusuga e oo mai” (“Ina ia Maua Le Malamalama Ma Le Malosi Ia Faaaogaina ai Ma Le Poto,” Liahona, June 2002, 12).

Mau Tauloto—Mosaea 4:30

Ina ia fesoasoani i tamaiti ia iloa le sootaga i le va o mafaufauga, upu, ma galuega, e pei ona ta’ua i le Mosaea 4:30, faitau le saunoaga lea a Peresitene Ezra Taft Benson:

“Mafaufau i mafaufauga mama. O i latou e mafaufau i mafaufauga mama e le faia ni galuega palapala. E le gata ina ia te oe le matafaioi i luma o le Atua mo au faatinoga ae faapea foi le pulea o ou mafaufauga. O le mea lea ia e ola ina ia e le ma pe a faaemo mai i luga o se lau i lau tapuaiga ou mafaufauga ma au faatinoga. O loo sa’o pea lava se faaupuga ua leva e faapea, e te totō ou mafaufauga ona e selesele lea o faatinoga, e te totoina faatinoga ona e selesele lea o mausa, e te totoina mausa ona e seleseleina lea o se amio, ma o lau amio e fuafua ai lou taunuuga e faavavau. ‘Aua e pei ona manatu o ia i lona loto, ua faapea lava o ia’” (i le Conference Report, Oct. 1964, 60; sii mai le Faataoto 23:7).

Faamalamalama e le mafai e le malamalama ma le pouliuli ona i ai i le pa’usisi i le taimi e tasi. E aveese e le malamalama le pouliuli. Mo se faataitaiga, o musika talafeagai, o ata faagaeetia, o gaoioiga lelei, ma mafaufauga ma upu mama o le a valaaulia ai le Agaga i o tatou olaga ma tulei ese mafaufauga le lelei mai o tatou mafaufau. Fesoasoani i tamaiti ia malamalama e mafai ona latou tetee atu i le pouliuli e ala i le faatumuina o o latou olaga i le malamalama.

• O le a se mea e mafai ona tatou faia e tausisia ai le mama o o tatou mafaufauga, upu, ma galuega?

Fautuaina tamaiti e faia ni fuafuaga patino e faatumulia ai o latou olaga i le malamalama. Atonu e te manao ia latou tusia a latou fuafuaga i a latou api talaaga mo le suesueina o tusitusiga paia.

Manatu Faaopoopo Faafaiaoga

Mosaea 4: 16-26 Tausiga o i latou e manaomia le fesoasoani—o se uiga faaalia lea o soo o Iesu Keriso

I le talaaga o le atiina ae o uiga faaalia faa-Keriso o loo ta’ua i le Mosaea 4, fai i tamaiti e mafaufau e uiga i se mea na latou oo i ai a o fesoasoani atu ia i latou e manaomia le fesoasoani. E mafai ona e fautuaina e mafaufau i le auaunaga na latou tuuina atu. E mafai ona e fai atu i le au Perisitua Arona e mafaufau e uiga i a latou taumafaiga e ao mai le taulaga anapogi.

• Aisea e te manatu ai o le tausiga o e matitiva ma e le tagolima o se vaega o le avea ai ma soo o Iesu Keriso?

• Na faapefea ona fesoasoani ou aafiaga i le auauna atu ia i latou e manaomia le fesoasoani ua e latalata atili ai ia Iesu Keriso?

Faitau le saunoaga lea a Epikopo H. David Burton, Epikopo Pulefaamalumalu o le Ekalesia:

“O le faamoemoe, folafolaga, ma mataupu faavae e faamalosia ai la tatou galuega o le tausiga o e matitiva ma e le tagolima, e silia mamao atu ma tuaoi o le olaga nei. O lenei galuega paia ua le na ona faamanuiaina ai i latou o e puapuagatia po o e le tagolima. I le avea ai o ni atalii ma afafine o le Atua, e le mafai ona tatou maua le fuataga atoa o le ola faavavau e aunoa ma lo tatou matua tuuina atu o i tatou atoatoa i le tausiga o le tasi ma le isi a o tatou i ai i lenei lalolagi. O loo i ai i le faatinoga ma le agalelei o le ositaulaga ma le ofoina atu o i tatou lava i isi tatou te iloa ai mataupu faavae faaselesitila ma le faapaiaga.” (“O Le Galuega Faapaia a le Uelefea,” Ensign po o Liahona, Me 2011, 81–82).

Mosaea 4:30. Ia vaavaaia o outou mafaufauga, upu, ma galuega

Ina ia fesoasoani i tamaiti e faaaoga le fautuaga o i le Mosaea 4:30 e vaavaaia o latou mafaufauga, faitau le talafaatusa lea ma le fautuaga a Peresitene Boyd K. Packer o le Korama a Aposetolo e Toasefululua:

“A o e aoao e pulea ou mafaufauga, e mafai ona e faatoilaloina mausa, e oo lava i mausa tauvalea. E mafai ona e maua le lototoa, faatoilalo le fefe, ma maua se olaga fiafia. Na faamatala mai ia te au a o ou tuputupu ae e tatau ona puleaina mafaufauga, ae e leai se tasi na ta’u maia pe faapefea. E tele tausaga sa ou mafaufau ai i lenei mea, ma ou manatu ai faapea o le mafaufau e faapei o se tulaga e fai ai faafiafiaga. O taimi uma lava e faaaoga ai e sisi ai i luga le pupuni. E i ai i taimi uma se faatinoga e faia i luga o lena tulaga. A le o se faleaitu, o se ata matautia, pe malie pe faauu, lelei pe leaga; ae e i ai lava se faatinoga e faia i le tulaga o lou mafaufau.

“Pe ua e matauina e mafai ona tolotolo mai nai mafaufauga laiti malu’ia mai apaau ma tosina atu ai lau vaai i le totonugalemu o soo se faatinoga e aunoa ma se faamoemoega moni i lau vaega? Afai e te faatagaina e faifai pea, o le a tuua loa e mafaufauga mama uma le tulaga. O le a sau mea e fai i se taimi faapena, pe a faatumulia le tulaga o lou mafaufau e anoso i mafaufauga le mama … ? Afai e mafai ona e faatumuina lou mafaufau i mafaufauga mama ma lelei, ona leai ai lea o se avanoa mo na anoso taufaaosooso, ma latou o ese ai.”

Na fautuaina e Peresitene Packer se auala se tasi e tuleia ese ai mafaufauga le mama mai o tatou mafaufau:

“Filifili se viiga po o se pese e te fiafia i ai, … se viiga e faagaeetia ona upu ma se musika e migao, se pese e te lagona ai se mea e pei o se musumusuga. E tele pese mananaia e filifili mai ai. Saili le tomatauga a le Agaga i le faia o lau filifiliga. Faasolosolo ma le faaeteete le pese i lou mafaufau. Taulotoina. E ui lava e te le’i a’oga faamusika, ae e mafai ona e mafaufau lelei i se pese faigofie. Faaaoga la’ia o le faiga lea e mulimulitai i ai ou mafaufauga. Ia avea ma au alaleo faaleagaga e faaaoga i taimi e lamatia ai.

“Soo se taimi e te iloa ai ua faase’ese’e ane le ‘aufaatino malu’ia mai laina i tua o ou mafaufauga agai mai i luga o le tulaga o lou mafaufau, ta le CD lea [lau pese musuia lena ua tauloto], tatou faaigoa ai. O le a suia atoa ai ou lagona.

“Talu ai e faagaeetia ma mama le musika, o le a faase’e ese atu ma le maasiasi mafaufauga eleelea. Talu ai o le amio mama, o le a le mafuta lava ma mea eleelea, e le mafai e le amioleaga ona talia le i ai o le malamalama. E iu lava ina e iloaina ua e hamuina i totonu le musika, toetoe lava ina a otometi, e aveesea ai mafaufauga lē mama” (“Worthy Music, Worthy Thoughts,” New Era, Apr. 2008, 7–8, 11).

Valaaulia tamaiti e fatu se fuafuaga e aveesea ai mafaufauga leaga e tolotolo atu i o latou mafaufau. Atonu o a latou fuafuaga o le a aofia ai ni mau manatu, e pei o le mafaufau i se viiga po o se pese a le Peraimeri, taulotoina o se mau, po o le vaai faalemafaufau i le Faaola. Valaaulia ni nai tamaiti e faasoa atu a latou fuafuaga. Uunai tamaiti e faatino a latou fuafuaga.