Lesona mo Suesuega e Faia i le Aiga
Mosaea 18–25 (Iunite 13)
Sauniuniga o Anomea mo le Faiaoga o Suesuega e Faia i le Aiga
Aotelega o Lesona o Suesuega e Faia i le Aiga i Aso Taitasi
O le aotelega lea o aoaoga faavae ma mataupu faavae sa aoaoina e tamaiti a o latou suesueina le Mosaea 18–25 (iunite 13) e le o faamoemoe e aoao atu o se vaega o lau lesona. O le lesona e te aoao atu o loo taulai atu i na o ni nai aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o tamaiti.
Aso 1 (Mosaea 18)
Ina ua mavae le maliu o Apinati, sa salamo Alema ma aoao atu le talalelei a Iesu Keriso i isi i le Vai o Mamona. O le suesue i lenei aafiaga, na aoao ai e tamaiti tatou e maua le Agaga o le Alii ma le folafolaga o le ola e faavavau e ala i le osia ma tausia le feagaiga o le papatisoga ma e oo mai faamanuiaga sili ia i latou o e tausia feagaiga o le papatisoga.
Aso 2 (Mosaea 19–20)
Ina ua mavae ona teena e le Tupu o Noa ia aoaoga a Apinati, ma saili e faaumatia Alema ma e na mulimuli ia te ia, sa osofaia i latou e sa Lamana. Sa fasiotia Noa ma ona tagata, ma sa avea lona atalii o Limae ma tupu. A o faitau tamaiti pe na faapefea ona faanofopologa tagata o Limae e sa Lamana, sa latou aoaoina ai o le teenaina o upu a auauna a le Alii e oo mai ai le puapuaga tele ma le faanoanoa. Sa fautuaina i latou e mafaufau i se taimi na latou maua ai le filemu ma le saogalemu faaleagaga e ala i le mulimuli i fautuaga a auauna a le Alii.
Aso 3 (Mosaea 21–24)
Na aoaoina e tamaiti o Alema ma ona tagata, e ui sa amiotonu, ae na faanofopologaina e sa Lamana. Na faia e tamaiti se siata i a latou api talaaga mo le suesueina o tusitusiga paia, na faatusatusa ai le nofopologa ma le laveaiina o Limae ma ona tagata ia Alema ma ona tagata. Na aoao mai e le tala i tagata o Limae, a tatou mananao e osia ma tausia feagaiga, o le a saunia e le Alii se ala mo lo tatou laveaiga. Mai le vaega a Alema, na aoao ai e tamaiti a tatou gauai atu ma le onosai i le finagalo o le Alii, o le a Ia faamalolosia i tatou ma laveai i tatou mai o tatou tofotofoga i Lona taimi.
Aso 4 (Mosaea 25)
Ina ua mavae ona toetuufaatasia o Limae ma ona tagata ma Alema ma ona tagata i lalo o le taitaiga a le Tupu o Mosaea i Saraemila, sa faitauina o latou tala i tagata uma. Sa aoaoina e tamaiti o le suesue i talafaamaumau e uiga i fegalegaleaiga a le Atua ma isi, e mafai ai ona tatou lagonaina le olioli ma le lotofaafetai i le agalelei o le Atua. A o manatunatu tamaiti i le ala na atagia mai ai le avea ma tagata o le Ekalesia i po o sa Nifae ma le avea ai ma tagata o le Ekalesia i ona po nei, sa latou aoaoina ai a o tatou tauaveina i o tatou lava luga le suafa o Iesu Keriso ma ola e tusa ai, o le a faamanuiaina i tatou e le Alii i Lona Agaga. Na tusia e tamaiti e uiga i le auala e avea ai le naunau e tauaveina i o latou lava luga le suafa o Iesu Keriso e faia ai se eseesega i o latou olaga.
Faatomuaga
O le faatusatusa o aafiaga o tagata o Alema ma tagata o Limae e mafai ona fesoasoani i tamaiti e iloa ai mataupu faavae taua e faatatau i faapogai o o tatou tofotofoga ma le ala e mafai ai ona laveaiina i tatou mai puapuaga e ala i lo tatou faatuatua ia Iesu Keriso. Fesoasoani ia iloa e tamaiti a latou osia ma tausia feagaiga paia, faalagolago i le Alii, ma valaau atu ma le lotomaulalo ia te Ia mo se fesoasoani, o le a Ia faamalolosia i latou ma laveaiina i latou mai o latou puapuaga i Lana lava ala ma i Lona lava taimi.
Fautuaga mo le Aoaoga
Mosaea 18
Na folafola atu e Alema le talalelei i tagata o le Tupu o Noa, ma e toatele na salamo ma mananao e papatiso.
Fai i tamaiti e mafaufau i o latou lava papatisoga. Valaaulia ilatou e faasoa mai ni faamatalaga e manatua pea e uiga i o latou aafiaga. Ona faaali lea pe afai o i ai, le ata o Alema o loo Faia Papatisoga i le Vai o Mamona (62332; Tusi Ata o le Talalelei [2009], nu. 76), ma fesili i ai mafaufau i mea na tutupu o loo faamatala mai i le Mosaea 18:8–11. Fesili i ai po o a mea ua latou malamalama ai e uiga i le faamoemoega o le papatisoga ma le feagaiga o le papatisoga ina ua latou papatiso.
A uma ona talanoaina e tamaiti le tala o i le Mosaea 18, ona sue lea i le aso 1, galuega e fai 1, i a latou api talaaga mo le suesueina o tusitusiga paia, lea na latou tusia ai mea na aoao atu e Alema e uiga i feagaiga o le papatisoga e pei ona faamatala mai i le Mosaea 18:8–11. Tofi se tamaitiiti e tusi lana ata i luga o le laupapa pe faasoa mai foi i le vasega, ma fesili i isi tamaiti pe i ai se mea e faaopoopo i koluma “Ou te folafola atu” ma le “Ua Folafola mai e le Atua”. Ona tusi lea o le mataupu faavae lea i luga o le laupapa po o se fasipepa: Tatou te maua le Agaga o le Alii ma le folafolaga o le ola e faavavau e ala i le osia ma tausia o feagaiga o le papatisoga. Atonu e te manao e fautuaina tamaiti e tusi le mataupu faavae lenei i a latou tusitusiga paia i autafa o le Mosaea 18:8–11.
Fesili: E faapefea ona uunaia lou manao e tausia lenei feagaiga pe a e malamalama i feagaiga o le papatisoga?
Mosaea 19–24
Ua laveaiina tagata o Limae ma i latou na mulimuli ia Alema mai le nofopologa ia sa Lamana
Fai i se tamaitiiti e faitau le saunoaga muamua a Elder Richard G. Scott o le Korama a Aposetolo e Toasefululua i le lesona mo le aso 3 o lenei iunite i le taiala suesue a le tagata aoga. Fai i tamaiti o mea na saunoa i ai Elder Scott o ituaiga e lua o tofotofoga o loo tatou feagai i o tatou olaga. (Ua tatau ona uma ona vase nei mea i a latou tusi lesona.) Tusi O Luitau e oo mai ona o le solitulafono ma le Faaleleia atili e oo mai tofotofoga i luga o le laupapa.
Fai i tamaiti e toe iloilo a latou tali i le aso 3, galuega e fai 1 o i a latou api talaaga mo le suesueina o le talalelei. Ona tusi lea otagata o Limae i lalo ifo o le “O Luitau e oo mai ona o le solitulafono” (tagai Mosaea 19:10, 25–28; 20:20–21) ma le tagata o Alema i lalo ifo o le “Faaleleia atili e oo mai tofotofoga” (tagai Mosaea 23:18–21). Fai i tamaiti e lisi i luga o le laupapa ni faataitaiga pe faapefea e tagata i ona po nei ona iloa nei ituaga o luitau taitasi.
A o outou iloiloina mataupu faavae nei ma tamaiti o le vasega, tusi i luga o le laupapa.
Valaaulia tamaiti e faipaga ona faitau lea o le Mosaea 21:13–16. Fai i ai e faailoa mai upu ma fasifuaitau o loo aoao mai ai a tatou lotomaulalo, valaau atu i le Alii, ma salamo i a tatou agasala, o le a faafofogaina e le Atua a tatou tatalo ma faamama avega o a tatou agasala i Lona lava taimi. Fai i tamaiti e faasoa mai pe mafai faapefea e se tasi ona faaaoga lenei mataupu faavae pe a feagai ma se tasi o luitau o i luga o le laupapa.
Valaaulia tamaiti e faitau le Mosaea 21:31–32, 35 ma aotele le solaaga a tagata o Limae o i le Mosaea 22 e ta’u mai ai a tatou osifeagaiga e auauna atu i le Atua ma tausia Ana poloaiga, o le a saunia e le Alii se ala mo lo tatou laveaiga. Atonu e te manao e fautuaina tamaiti e tusi le mataupu faavae lea ia latou tusitusiga paia i autafa o le Mosaea 21:31–35.
Ina ia iloiloina se mataupu faavae na aoaoina e tamaiti mai le suesue e uiga i tagata o Alema, fai i tamaiti e aotele le tala i le auala na faanofopologa ai tagata o Alema e sa Lamana (tagai Mosaea 23:25–24:11). Valaaulia ni nai tamaiti e feauauai e faitau leotele mai le Mosaea 24:12–17. Fai i ai e ta’u mai upu po o fasifuaitau o loo aoao mai ai a tatou gauai atu ma le onosai i le finagalo o le Alii, o le a Ia faamalolosia i tatou ma laveaiina i tatou mai o tatou tofotofoga i Lona taimi. Atonu e te manao e fautuaina tamaiti e maka ia upu taua po o fasifuaitau i fuaiupu nei.
Tusi faataitaiga i luga o le laupapa pe saunia i se pepa e tufatufa atu. Fai i tamaiti e faamatala pe mafai faapefea ona latou faaaogaina upumoni ua latou aoaoina mai le suesue e uiga i tagata o Limae ma Alema, e fesoasoani ai i le tagata i faataitaiga taitasi.
-
Ua iloa e se uo le manaomia ona salamo ma ua matuai lagonaina lava le le agavaa ma le lotovaivai, ma tau mafaufau pe mata e mafai ona faatoilaloina faaosoosoga ma lagona o le tausalaina. E mafai faapefea ona e faaaogaina le tala i tagata o Limae e avatu ai i lau uo le lototele ma le faamoemoe e salamo ai? (Atonu e te manao e fautuaina tamaiti e faailoa mai fuaiupu patino o i le Mosaea 21 e mafai ona latou fefaasoaai ai ma lenei uo. Fai i tamaiti e faamatala mai pe aisea ua latou manatu ai o le a fesoasoani le fuaiupu ua latou filifilia i le uo.)
-
E i ai se uo e tafao lava ma taumafai e ola e tusa ma tulaga faatonuina o le talalelei. E le mananao nisi tagata e faapaaga ma lenei tagata, fai mai ua “lelei tele” mo i latou. E mafai faapefea ona e faaaogaina le tala i le nuu o Alema e fesoasoani ai i lau uo e faalagolago i le Alii e maua ai le malosi ma le mafanafana i lenei taimi o tofotofoga? (Atonu e te manao e fautuaina tamaiti e faailoa mai fuaiupu patino o i le Mosaea 24 e mafai ona latou faasoa atu i a latou uo. Valaaulia i latou e faamatala mai pe aisea ua latou manatu ai e mafai ona fesoasoani ia fuaiupu ua latou filifilia.)
Valaaulia ia tamaiti e faamatala ni taimi na latou molimauina ai pe molimauina foi e tagata latou te iloa le mana o le laveaiga a le Alii i o latou olaga. (Faaeteete aua le faatagaina tamaiti e faasoa mai i le vasega ni faamatalaga e le talafeagai o solitulafono ua mavae.) Fautuaina tamaiti e tausi a latou feagaiga, valaau i le Alii mo se fesoasoani, ma faalagolago i le mana o Lana laveaiga mo soo se tofotofoga latou te feagai i o latou olaga. Faaiu le vasega i le faasoa atu o lau molimau i le mana o le Alii e laveai ai i tatou mai luitau ma faigata e oo mai ona o a tatou lava solitulafono po o tofotofoga foi ina ia faaleleia ai i tatou.
Le Isi Iunite (Mosaea 26–Alema 4)
I le vaiaso a sau, o le a aoao ai tamaiti e uiga i se agelu sa auina mai e taofi ia Alema le Itiiti mai le faataumaoia o le Ekalesia. O le a latou suesueina le mea na tupu ia Alema ina ua mavae lenei aafiaga ma faitau foi i aoaoga aupito taua e uiga i le toefanauina faaleagaga o loo maua ai. Ina ua maliu le Tupu o Mosaea, sa filifilia Alema e avea ma taitai o sa Nifae. Sa taumafai Amaleki, se tagata amioleaga, e faatoilalo o ia. Fautuaina tamaiti e vaavaai mo mea na faia e Alema e valaaulia ai le mana laveai o le Alii i lea tulaga.