Lesona 53
Mosaea 3
Faatomuaga
I le faaauauina ai o lana saunoaga i lona nuu, na ta’u atu ai e le Tupu o Peniamina ia upu na talanoa atu ai se agelu ia te ia e faatatau i le auaunaga a Iesu Keriso. Na molimau atu le Tupu o Peniamina e faapea, o le faatuatua ia Iesu Keriso ma le salamo, e mafai ai e i latou na agasala ona maua le faaolataga. Na Ia aoao atu foi e faapea, o le Togiola a Iesu Keriso, a “tuu ese le tagata natura ma avea ma tagata paia” o se tagata e gauai atu i faatosinaga a le Agaga Paia (Mosaea 3:19).
Fautuaga mo le Aoaoga
Manatua: Afai na fautuaina tamaiti aoga i le Lesona talu ai e tauloto ma faaaoga le Mosaea 2:17, mafaufau e tuu atu ia i latou se avanoa e faasoa mai ai o latou aafiaga i se taimi o le aso. Faaeteete aua nei soona faaaluina se taimi i lena faamanatu. Ia lava se taimi e talanoaina ai aoaoga faavae ma mataupu faavae o i le Mosaea 3.
Mosaea 3:1–10
Na tuuina atu e le Tupu o Peniamina upu a se agelu e uiga i le Togiola a Iesu Keriso
Faaali se ipu malamalama e leai se mea o i ai ma se sioki vai. Valaaulia se tamaitiiti e faataitai pe o le a le tele o le vai na te tuuina i totonu o le ipu mo se tagata e manao na o sina tofo i le vai. Ona fai lea i ai e faataitai pe o le a le tele o le vai na te liligiina mo se tagata e manao ia malie. Fai i tamaiti e manatunatu loloto i le fesili lea:
-
Afai o le faatusa o le vai o le olioli, o le a le tele e te manao ai i lau ipu?
Faamatala i tamaiti o aoaoga o i leMosaea 3 o le a fesoasoani ia i latou i le ala e mafai ai ona faatumulia i le olioli.
Valaaulia se tamaitiiti e faitau leotele le Mosaea 3:2–5Fai i le vasega e faailoa mai le mea o maua ai le savali a le Tupu o Peniamina i leMosaea 3.
Faamamafa atu o le Mosaea 3 o loo i ai le tautinoga a le agelu o le “tala fiafia o le olioli tele” (Mosaea 3:3). Valaaulia ni nai tamaiti e feauaua’i e faitau leotele mai le Mosaea 3:5–10. Fai i le vasega e vaavaai mo upu po o fasifuaitau e fesoasoani ia i latou e talisapaia atili le misiona a Iesu Keriso. Atonu e te manao e fautuaina latou te makaina upu nei ma fasifuaitau. Valaaulia ni nai tamaiti e faasoa ia upu ma fasifuaitau latou te mauaina.
-
O le a le mea ua fesoasoani le Mosaea 3:7 e te malamalama ai e uiga i le misiona a le Faaola?
-
Aisea na fai mai ai le agelu o lenei savali e aumaia ai le olioli tele?
Valaaulia tamaiti e tusi se fuaiupu se tasi e aotele ai le Mosaea 3:5–10 i a latou api talaaga mo suesuega o tusitusiga paia po o api o le vasega. A ua lava se taimi e tusi ai, ona valaaulia lea o nisi o i latou e faasoa mai mea sa tusia. O aotelega a tamaiti e tatau ona faaalia lo latou malamalama i le aoaoga a le agelu e faapea na puapuagatia Iesu Keriso ina ia mafai ai ona laveaiina i tatou mai a tatou agasala.
Atonu e te manao e tulitatao tali a tamaiti i le fesili lea:
-
O a ou lagona pe a e mafaufau i le mea na faia e le Faaola mo oe?
Ina ia fesoasoani i tamaiti e faaloloto lo latou malamalama i mafatiaga o le Faaola, faasoa atu le saunoaga lea a Elder James E. Talmage o le Korama a Aposetolo e Toasefululua:
“O mafatiaga o Keriso i le faatoaga e le mafuatiaina e le mafaufau papa’u, i lona ogaoga ma le mafuaaga. … Na tauivi o Ia ma ōi i lalo o se avega e le mafai e se isi tagata ua ola ai i le fogaeleele ona mafaufauina. E le o se tiga faaletino, e le na o se tiga faalemafaufau foi, na afua ai ona Ia mafatia i nei puapuaga na oo ai ina tafe mai le toto i pu afu uma; ae o se mafatiaga faaleagaga o le agaga sa na o le Atua lava na mafai ona silafia. … I lena itupo o le mafatia na faafetaiaia ai ma faatoilalo e Keriso mea mataga uma na mafai e Satani, le alii o lenei lalolagi,’ ona faatupu. … I se isi itu, o le mea moni ma e matua moni a’ia’i e ui ina le malamalama ai le tagata, ae na tauaveina e le Faaola lava Ia le avega o agasala a tagata mai lava ia Atamu e oo atu i le tuluiga o le lalolagi” (Jesus the Christ, 3rd ed. [1916], 613).
Mosaea 3:11–27
Na molimau atu le Tupu o Peniamina e faapea, o le Togiola a Iesu Keriso, e mafai ai ona tatou lafoai ese le tagata natura ae avea ma tagata paia.
Faamatala i tamaiti na faasoa mai e le Tupu o Peniamina le faamatalaga a le agelu o ituaiga tagata eseese ma pe na faapefea ona faatatau le Togiola a Iesu Keriso i vaega taitasi. Tusi fesili nei i luga o le laupapa. Fai i tamaiti e faitau lemu le Mosaea 3:11–13, 16 , ma vaavaai mo tali i fesili nei:
E faapefea ona faaaoga le Togiola:
Ia i latou e maliliu e aunoa ma se silafia i le talalelei?
Ia i latou e fouvale i le Atua ma faia le agasala ma le loto i ai?
I fanau e maliliu a o lei aulia le matutua e tali atu ai mo i latou lava?
A ua lava le taimi, fai i tamaiti e faasoa mai a latou tali i fesili nei. (Ina ia fesoasoani ia i latou e tali le fesili muamua, atonu e te manao latou te faitauina le Mataupu Faavae ma Feagaiga 137:7–10. Ina ia fesoasoani ia i latou e tali le fesili lona tolu, atonu e te manao latou te faitauina le Moronae 8:8, 17 ma le Mataupu Faavae ma Feagaiga 29:46–47.)
Faitau le saunoaga lea a Elder Dallin H. Oaks o le Korama a Aposetolo e Toasefululua e uiga i le aafiaga o le Togiola i fanau uma a le Tama Faalelagi:
“Ua tatou faitau foi e faapea e togiola lona toto i agasala a i latou o e na oti ma le le iloa o le finagalo o le Atua ia te i latou, o i latou foi o e na agasala ona o le pouliuli” (Mosaea 3:11)E faapena foi, “e togiola le toto o Keriso mo [tamameamea]” (Mosaea 3:16). O nei aoaoga faapea o le mana toetu ma le mana faamama o le Togiola, e mo i latou uma e taofieseese i le mau faapea o le alofa tunoa o le Atua e na o nai tagata e faaolaina ai. O lona alofa tunoa e mo tagata uma. O nei aoaoga a le Tusi a Mamona ua faalautele ai la tatou vaaiga ma faateleina ai lo tatou malamalama i le alofa lautele o le Atua, ma le aafiaga o tagata uma i Lana Togiola mo tagata uma o i mea uma. (“All Men Everywhere,” Ensign po o le Liahona, Me 2006, 77).
-
O le a le mataupu faavae ua tatou aoaoina mai le Mosaea 3:12 e uiga i le ala e faatatau ai le Togiola ia i tatou? (O le a laveaiina i tatou mai a tatou agasala pe a tatou faatuatua ia Iesu Keriso ma salamo.)
-
E tusa ai ma lenei fuaiupu, o le a le mea e tupu ia i latou e filifili e le faatuatua ia Iesu Keriso ma salamo?
Faasino i ai o le Mosaea 3:19 o se mau tauloto. Atonu e te manao e fautuaina tamaiti e maka le mau lea i se ala e iloagofie ai, ina ia faigofie ai ona latou sueina. Faagauai atu i le Mosaea 3:19 i le faaaogaina e le agelu o le faaupuga “tagata natura.” Ina ia fesoasoani i tamaiti ia malamalama i lea faaupuga, faitau le faamalamalamaga lea mai le Taiala i Tusitusiga Paia:
O le tagata natura o “se tagata e filifili e tosina i tuinanau, manaoga, naunauga, ma lagona o le tino ae le o uunaiga a le Agaga Paia. O na tagata e mafai ona malamalama i mea faaletino ae le o mea faaleagaga. O tagata ua faaletino, pe ua i ai tino faitino, ona o le pau o Atamu ma Eva. E tatau i tagata taitoatasi ona toe fanau e ala i le togiola a Iesu Keriso” (Taiala i Tusitusiga Paia, “Tagata Natura,”
Tusi fesili nei i luga o le laupapa. Fai i tamaiti e vaavaai mo tali o fesili a o latou suesueina lemu le Mosaea 3:19.
Na faapefea ona faamalamalama e le agelu le sootaga a se tagata natura ma le Atua?
E tusa ai ma lea fuaiupu, e mafai faapefea ona tatou tuu ese le tagata natura?
Faasino i ai, e ala i le Togiola a Iesu Keriso, e tele atu ai mea e faia e se tagata nai lo le na taofi o le avea ma “tagata natura.” E “avea [o ia] ma tagata paia.” E le gata i le laveai mai o i tatou mai a tatou agasala, ae e suia i tatou e le Faaola i ni tagata e sili atu nai lo le mea e mafai ona tatou faia na o i tatou. E fesoasoani o Ia ia tatou avea atili e faapei o Ia. Ina ia fesoasoani i tamaiti aoga ia malamalama i lenei aoaoga faavae, faitau le saunoaga lea a Elder David A. Bednar o le Korama a Aposetolo e Toasefululua:
“E manaomia uma ni lima mama ma se loto mama e o a’e ai i le mauga o Ieova ma tutu ai i Lona nofoaga paia [tagai Salamo 24:3–4].
“Sei ou fautuaina atu, o lima e faamamaina e ala i le faiga o le tuu ese o le tagata o le lalolagi ma le faatoilaloina o le agasala ma uunaiga leaga i o tatou olaga e ala i le Togiola a le Faaola.” E faamamaina loto pe a tatou mauaina Lona mana faamalosi e faia ai le lelei ma avea ma ni e sili atu. O o tatou faanaunauga agavaa uma ma galuega lelei, tusa lava po o le a le tatau, e le mafai ona fua mai ai ni lima mama ma se loto mama. O le togiola a Iesu Keriso e maua mai ai le mana faamama ma le mana faaola lea e fesoasoani tatou te faatoilalo ai le agasala ma se mana faapaia ma faamalosi lea e fesoasoani tatou te lelei atili ai nai lo le mea tatou te mafaia e ala lea i le faalagolago i lo tatou malosi. O le Togiola e le i’u e mo le tagata agasala faapea foi le tagata paia ia i tatou taitoatasi.” (“Clean Hands and a Pure Heart,” Ensign po o le Liahona, Nov. 2007, 82).
Ina ia fesoasoani i tamaiti e aotele ia aoaoga faavae sa latou aoaoina mai le Mosaea 3:19, fesili:
-
O a ni upumoni o le talalelei na e mauaina i le Mosaea 3:19?
Atonu e lisi mai e tamaiti ni aoaoga faavae se tele mai lenei fuaiupu, e aofia ai mea nei:
O le tagata natura o se fili i le Atua.
A tatou gauai atu i uunaiga a le Agaga Paia, ua tatou tuu ese le tagata natura.
E ala i le Togiola a Keriso, e mafai ai ona tatou tuu ese le tagata natura ae avea ma tagata paia.
Valaaulia tamaiti e tusi tali i se tasi o fesili nei i totonu o a latou api talaaga mo suesuega o tusitusiga paia. (Atonu e te manao e tusi nei fesili i luga o le laupapa a o lei amataina le vasega, saunia se tufaaga ua i ai fesili, pe faitau lemu foi fesili ina ia mafai e tamaiti ona tusi i a latou api talaaga mo suesuega o tusitusiga paia.)
-
O le a se mea e mafai ona e faia ina ia gauai atili atu ai “i uunaiga a le Agaga Paia”? O le a sau mea a fai i lea vaiaso e faaleleia atili ai i le vaega lea o lou olaga?”
-
O a uiga o se tamaitiiti o loo ta’ua i le Mosaea 3:19 e sili ona e manaomia e atiina ae? O le a lau mea a fai i le vaiaso a sau e fesoasoani ia te oe e atiina ae ai lena uiga?
Ina ia fesoasoani i tamaiti ia sili atu ona talisapaia le Togiola a le Faaola, faitau atu ia i latou le Mosaea 3:23–26. Faamatala o le fasifuaitau o le “ipu o le toasa o le Atua” i le fuaiupu 26 e faasino i le puapuagatia o le a oo i ai i latou e agasala ma le loto i ai ae le salamo. Ona fai lea i se tamaitiiti e faitau le Mataupu Faavae ma Feagaiga 19:16–19. Fai i tamaiti e faalogologo mo le upu ipu i le fuaiupu 18.
-
O le a le mea na faia e Iesu Keriso ina ia aua ai nei o tatou inuina “le ipu o le toasa o le Atua”? (Na Ia inuina e Ia lava le ipu, ma tauaveina ai i Ona lava luga le faasalaga mo a tatou agasala. Afai tatou te salamo faamaoni, o le a tatou le mafatia i lena faasalaga.)
Faaiu i le faasoa atu o lau molimau i upumoni sa talanoaina i lenei lesona.
Mau Tauloto—Mosaea 3:19
Ina ia fesoasoani i tamaiti e tauloto le Mosaea 3:19, vaevae i ni paga. Fai i ai e faitau leotele le Mosaea 3:19, taitasi upu e ta’u, feauauai ma a latou paga. Fai i ai e fai faatele. Atonu e te manao e faaopoopo nisi mea i lenei gaoioiga e ala i le fai i paga taitasi e faitau upu ta’ilua pe ta’itolu i le taimi.
O le faisoo o lenei gaoioiga o le a fesoasoani e masani ai tamaiti i le ‘anofuaiupu ma faigofie ai ia i latou ona taulotoina le fuaiupu atoa. Tuu i ai se lu’i ia maea ona taulotoina leMosaea 3:19 e i latou lava.
Manatua: Ona o le natura ma le umi o lenei Lesona, o lea atonu ai e te manao e faaaoga le gaoioiga o le mau lea i se isi aso, pe a lava se taimi.
Tala ma Faamatalaga o Talaaga
Mosaea 3:5-11. Aoaoina e uiga i le Togiola a Iesu Keriso
Na aoao mai e Elder Richard G. Scott o le Korama a Aposetolo e Toasefululua e tatau ona tatou saili ia malamalama i mea uma tatou te mafaia e uiga i le Togiola a Iesu Keriso.
“E leai se tasi o i tatou e lava ona talisapaia i le olaga nei ia taunuuga aoga uma o le Togiola.
“O loo i ai se tulaga manaomia mo i tatou taitoatasi ia faamalosia lo tatou malamalama i le taua o le Togiola a Iesu Keriso, ina ia avea ai i tatou ma faavae e le maluelue e fausia ai o tatou olaga. Ao faateleina le gaogao o le lalolagi i tulaga faatauaina e faavae ai, ma a o faateleina le lafoaia o le mamalu, mama, ma le tulaga atoatoa ona o le tulimataiga o tuinanau o le lalolagi, o lo tatou malamalama i le Togiola a Iesu Keriso ma le faatuatua i ai o le a maua ai le malosi ma le mana o loo manaomia mo se olaga manuia. O le a aumaia ai foi le mautinoa i taimi o tofotofoga ma le filemu i taimi o le fememea’i.
“Ou te faamalosiau atu ma le malosi ia amata sau lava fuafuaga e te suesue ai ina ia e malamalama lelei ai ma talisapaia ia taunuuga le mafaatusalia, faavavau le i’u o le faataunuuina atoatoa e Iesu Keriso o Lona valaauga paia faalelagi, o lo tatou Faaola ma le Togiola. O le mafaufau loloto faaletagata lava ia i mau e o faatasi ma le tatalo mai le loto, o le a faamalosia ai lou malamalama ma le talisapaia o Lana Togiola e le mafaatauina. O se tasi auala mamana e aoao ai ia Iesu Keriso ma Lana Togiola, o le alu pea lava pea i le malumalu.” (“O loo Soifua o Ia! Ia Viia Lona Suafa e Favavau!” Ensign po o le Liahona, Me 2010, 77).
Mosaea 3:19. O le faamanatuga ma le avea ai ma tagata Paia
Na faamalamalama mai e Elder Quentin L. Cook o le Korama a Aposetolo e Toasefululua le sootaga i le va o le faamanatuga ma a tatou taumafaiga e avea “ma tagata paia e ala i le togiola a Keriso le Alii” (Mosaea 3:19):
Sauniga Faamanatuga o se sauniga sili atu ona paia ma mamalu o sauniga uma o le Ekalesia I le mavae ai o Lona Toetu,na aoao atu e le Faaola le faamanatuga i Sa NIfae. Afai o le a avea i tatou ma Ona soo ma tagata faamaoni o Lana Ekalesia , e tatau ona tatou manatua ma faamamaluina le faamanatuga. E maua ai e i tatou taitoatasi le avanoa e faaali ai ma le loto momomo ma le agaga salamo lo tatou naunautaiga e mulimuli i le Faaola, e salamo ai ma avea o se Tagata Paia e ala i le Togiola a Keriso.” (“Tatou te Mulimuli ia Iesu Keriso,” Ensign po o le Liahona, Me 2010, 84).