Lesona 24
2 Nifae 2 (Vaega 2)
Faatomuaga
O le lesona na sei uma atu nei o le 2 Nifae 2 sa taulai atu i le Pa’ū o Atamu ma Eva ma le Togiola a Iesu Keriso. O le lesona lenei o loo faaogatotonuina i aoaoga a Liae e uiga i le aoaoga faavae o le faitalia, e aofia ai le upumoni lea ua tatou saoloto e filifili ai le saolotoga ma le ola e faavavau e ala ia Iesu Keriso.
O le a maua e tamaiti aoga, i lenei lesona, le avanoa e aoao ai e le tasi le isi. A o lei amataina le vasega, ia saunia tufaaga o loo i ai faatonuga i lenei lesona. Ia faamasani i seti taitasi o faatonuga ina ia mafai ai ona e fesoasoani i tamaiti aoga a o latou sauni e aoao atu.
Fautuaga mo le Aoaoga
2 Nifae 2:11–18, 25–30
Ua aoao mai Liae e uiga i le faitalia ma taunuuga o a tatou filifiliga
Ia faamanatu puupuu atu i tamaiti aoga e faapea i le lesona na sei uma atu nei, sa latou suesueina ai aoaoga a Liae i le 2 Nifae 2 e uiga i le Pa’ū o Atamu ma Eva atoa ai ma faamanuiaga o le Togiola a Iesu Keriso. O le filifiliga a Atamu ma Eva na faatagaina ai i tatou e o mai i lenei lalolagi (tagai i le 2 Nifae 2:25), le nofoaga tatou te oo ai i le faanoanoa, tiga, ma le oti. E ala mai i le Togiola, ua togiolaina ai e Iesu Keriso i tatou mai le Pa’ū ma ofo mai ai le togiolaina o a tatou agasala (tagai i le 2 Nifae 2:26). Ona o le Togiola, ua tatou saoloto ai e filifili le saolotoga ma le ola e faavavau po o le faatagataotauaina ma le oti (tagai i le 2 Nifae 2:27).
Faamalamalama atu e faapea a o faaauau e tamaiti aoga a latou suesuega o le 2 Nifae 2 i lenei lesona, o le a latou mauaina le avanoa e aoao ai e le tasi le isi i mataupu faavae o le faitalia ia na faamalamalama atu e Liae i lona atalii o Iakopo. Vaevae tamaiti aoga i ni vaega se fa. Tuu atu i vaega taitasi se tasi o seti o faatonuga nei e fesoasoani ai ia i latou e saunia e aoao atu (a o lei amataina le vasega, saunia ni tufaaga o loo i ai faatonuga nei). Afai e itiiti ifo ma le toafa tamaiti aoga o le vasega, ia tuu se seti o faatonuga i tamaiti aoga taitasi ma aoao atu e oe lava ia le anomea o loo i ai i seti o totoe.
O loo i ai i seti taitasi o faatonuga ni galuega atofaina se lima. Ia uunaia tamaiti aoga uma ia auai e ala i le faamautinoaina ua tofu uma tagata taitasi o vaega taitasi ma se galuega atofaina. I vaega e sili atu ma le toalima, e mafai ona fefaasoaai e tamaiti aoga ia galuega atofaina. I vaega e itiiti ifo ma le toalima tamaiti aoga, o le a manaomia e nisi tagata taitoatasi ona faia ni galuega atofaina e sili atu ma le tasi. Faailoa atu i tamaiti aoga e faapea o le a tuu atu pe a ma le tolu minute e saunia ai ma o vaega taitasi o le a mauaina ni minute tai lima e aoao atu ai.
Vaega 1:Na foafoaina i tatou e le Atua ina ia gaoioi
-
Uu i luga se maa i luma o le vasega. Valaaulia se tamaitiiti aoga e faitau leotele le 2 Nifae 2:14. A o lei faitau mai o ia, fai atu i le vasega e tagai mo faamatalaga a Liae o ituaiga mea e lua na foafoaina e le Atua i le lagi ma le lalolagi. (“O mea e gaoioi ma mea e faagaoioi.”) Fesili atu: E faapefea ona faatatau lenei fuaiupu ia i tatou ma le maa? (Sa foafoaina i tatou ia gaoioi, a o le maa sa foafoaina ina ia faagaoioi. O le maa, e pei o le tele o isi foafoaga, e le mafai ona gaoioi ia lava.)
-
Fai atu i se tamaitiiti aoga e faitau le fuaiupu muamua i le 2 Nifae 2:16. Fesili atu i le vasega: I le ata o le faaolataga a le Tama Faalelagi, aisea e te manatu ai e taua lo tatou gaoioi mo i tatou lava? A uma ona tali mai tamaiti, fesili atu i ai: E faapefea i nisi taimi ona tatou faatalitali ina ia faagaoioi nai lo le gaoioi mo i tatou lava?
-
Tusi le MF&F 58:26–28 i luga o le laupapa. Valaaulia le vasega e sue i le fuaitau lenei. Taitai i latou i le faitau faatasi leotele.
-
Fesili atu: O le a se mea e mafai ona tatou aoaoina mai le Mataupu Faavae ma Feagaiga 58:26–28 e uiga i le gaoioi mo i tatou lava? O a nisi o auala e mafai ona tatou sailia ina ia tatou tinoū ai ma le naunautai i le faataunuuina o le amiotonu tele? O le a se taimi na e vaaia ai lou filiga o faataunuuina se amiotonu tele? (A uma ona tali mai ni tamaiti aoga se toalua pe toatasi, atonu e te manao foi ina ia faasoa atu se aafiaga.)
-
Faasoa atu lau molimau e uiga i le taua o le gaoioi mo i tatou lava ma saili atu i le faataunuuina o le amiotonu tele.
Vaega 2: Faatosinaga lelei ma faatosinaga leaga
-
Valaaulia se tamaitiiti aoga e faitau le fuaiupu lona lua i le 2 Nifae 2:16. Fesili atu i le vasega: O le a le uiga o le upu faatosina? (Ia valaaulia, faatauanau, po o le ta’ina.)
-
Fesili atu i le vasega: O a nisi o auala o loo faatosina ai i tatou e le Tama Faalelagi e fai le lelei? (Atonu o le a ta’ua e tamaiti aoga ni uunaiga mai le Agaga Paia, faamanuiaga folafolaina mo le usiusitai i poloaiga, ma aoaoga a perofeta o aso e gata ai.)
-
Faitau leotele le 2 Nifae 2:17–18, ma valaaulia tamaiti aoga e mulimuli i le faitauga i a latou tusitusiga paia. Fai atu ia i latou e faailoa mai pe o a mea o loo saili e le tiapolo mai ia i tatou uma. (E manao o ia ina ia tatou faanoanoa.)
-
Fesili atu: E mafai faapefea ona e iloa o le fea faatosinaga e mai le Atua ma le fea e mai i le tiapolo? (I le avea ai ma se vaega o lenei talanoaga, atonu e te manao e tagai i le Moronae 7:16–17.) A uma ona tali mai le vasega, fesili atu i ai: O a nisi o faataitaiga o mea o loo faatosinaina tagata e fai mea leaga ma taitai atu ai i le faanoanoa?
-
Faasoa atu lau molimau e uiga i faatosinaga a le Atua ia e taitai atu ai i le amiolelei ma le fiafia faapea ai ma faatosinaga a le tiapolo ia e taitai atu ai i le amioleaga ma le faanoanoa. I le avea ai ma se vaega o lau molimau, atonu e te manao e faasoa atu se aafiaga e faaali ai le auala ua e iloa ai e moni lenei mea.
Vaega 3: Tatou te tali atu mo a tatou lava filifiliga
-
Faitau atu le faamatalaga lenei i le vasega:
“Ua e saoloto e filifili ma faatino, ae e te le saoloto e filifili taunuuga o au faatinoga. O taunuuga atonu e le vave oo mai, ae e masani lava ona mulimuli mai” (Faamaoni i le Faatuatua: O Se Tusitaiala o le Talalelei [2004], 150).
Fesili atu: O a nisi o faataitaiga o taunuuga atonu e le vave oo mai ae o le a oo mai lava? (O le tasi tali faigofie o le kanesa e tele lava ina oo mai ona o le ulaula.)
-
Valaaulia tamaiti aoga e faitau lemu le 2 Nifae 2:26–27, tagai mo upu ma fasifuaitau ia e faaalia ai taunuuga i le lumanai o filifiliga o loo tatou faia i le taimi nei. Fai atu i tamaiti aoga e lipoti mai mea latou te mauaina. (O tali e mafai ona aofia ai “faasalaga a le tulafono i le aso tele ma le mulimuli,” “saolotoga,” “ola faavavau,” “faatagataotauaina,” “oti,” ma le “faanoanoa.”) Tusi tali a tamaiti aoga i luga o le laupapa.
-
Fesili atu: Aisea e te manatu ai e taua mo i tatou ona malamalama i taunuuga o a tatou filifiliga i lenei olaga? A uma ona tali mai tamaiti, fesili atu i ai: E mafai faapefea e le iloaina o nei taunuuga ona faaosofia i tatou e faia filifiliga amiotonu?
-
Faailoa atu e faapea i le 2 Nifae 2:27, o loo faapea mai ai Liae ua tatou “saoloto e filifili le saolotoga.” Fesili atu: I sou aafiaga, e faapefea ona fesoasoani filifiliga amiotonu ia i tatou ia tumau ai pea i le saoloto e filifili? E mafai ona outou tuu maia ni faataitaiga o lenei mea? (Ia e saunia e faasoa atu sau oe lava ia faataitaiga.)
-
Faasoa atu lau molimau e faapea tatou te tali atu mo i tatou lava i le Atua e tusa ma a tatou filifiliga ma e mulimuli mai pea taunuuga o a tatou filifiliga.
Vaega 4: Filifilia o le vaega lelei
-
Fai atu i se tamaitiiti aoga e faitau leotele mai le 2 Nifae 2:28. Fai atu i le vasega e tagai mo mea e fa na manao i ai Liae mo ona atalii. A uma ona faitauina le fuaiupu, valaaulia tamaiti aoga e faasoa mai mea na latou mauaina.
-
Fesili atu: O a nisi o auala e mafai ona tatou vaai atu ai i le Puluvaga sili, o Iesu Keriso, e fesoasoani ai ia i tatou e faia filifiliga amiotonu?
-
Valaaulia se tamaitiiti aoga e faitau leotele le 2 Nifae 2:29. Fesili atu i le vasega: E mafai faapefea e a tatou filifiliga ona tuu atu i le tiapolo le mana e ave ai tatou faatagataotaua? I le avea ai ma se vaega o lenei talanoaga, faailoa atu o le tele o faaosoosoga a Satani e taulai lava i le “manaoga o le tino,” po o o tatou tuinanau faaletino. Pe a lolo atu tagata i nei faaosoosoga, o le a mafai ona avea ni mea ma ni amioga faataumaoi ma vaisu ia i latou. Faitau le saunoaga lenei a Elder Russell M. Nelson o le Korama a Aposetolo e Toasefululua:
“Mai sina uluai manatu e faataitai se mea e faapea e le afaina, o le a sosoo mai ai ma se taamilosaga leaga tele. Mai sina tofo e oo mai ai se mausa. Mai se mausa e oo mai ai le faalagolago i ai. Mai le faalagolago i ai e oo mai ai se vaisu. E faasolosolo lava lana u’u. E ninii tele filifili o mausa e faigata ona iloa seia oo ina malolosi tele ma faigata ona toe motusia. … E faatoilaloina mulimuli ane e vaisu le saolotoga e filifili ai (Vaisu po o le Saolotoga,” Liahona, Ian. 1989, 6–7).
Faasoa atu lau molimau e uiga i le amiotonu lea e taitai atu i le saolotoga mai mausa ma vaisu faataumaoi.
-
Faitau atu le 2 Nifae 2:30 i le vasega. A o latou mulimuli i le faitauga, valaaulia i latou e taulai atu i upu nei: “Ua ou filifilia le vaega lelei.” Fesili atu: O le a se mea o aoao mai e lenei faamatalaga e uiga ia Liae?
-
Fai atu i tamaiti aoga e mafaufau loloto i fesili nei: O ai ua e iloaina na “filifilia le vaega lelei” e pei o Liae? O a ni auala e te fia mulimuli ai i le faataitaiga a lenei tagata? A uma le taimi na mafaufau loloto ai tamaiti, fai atu i se tamaitiiti e toatasi pe toalua foi e faasoa mai ni o la manatu. Ona faasoa atu lea o ou lava manatu.
Faaaliga i le Faiaoga: E faaiu ai, valaaulia tamaiti aoga e mafaufau loloto pe o taitai atu e a latou filifiliga i latou i le saolotoga ma le ola e faavavau pe o loo agai atu i le faatagataotauaina, oti faaleagaga, ma le faanoanoa. Faamautinoa atu i tamaiti aoga e faapea o soo se filifiliga leaga lava atonu ua latou faia e mafai ona faatoilaloina e ala i le faatuatua ia Iesu Keriso ma le salamo. Molimau atu i le Faaola, o Lana Togiola, ma Lona gafatia e faamalosia i tatou i a tatou taumafaiga e fai filifiliga ia o le a taitai atu ai i le fiafia ma le ola e faavavau.
Mau Tauloto—2 Nifae 2:27
Ina ia fesoasoani i tamaiti aoga e taulotoina le 2 Nifae 2:27, tusi le mataitusi muamua o upu taitasi i luga o le laupapa, e pei o le faiga lenei: O l m l, u s t e t m l l t; m u t m i t i l m u e t a m l t. M u l s e f l s m l o e f, e a i l P s o t u, p f l f m l o, e t m l f m l m o l t; o u s o i i p t u e p o i l. (Atonu foi e te manao e uunaia tamaiti aoga e faailoga lenei fuaitau i se ala e iloagofie ai ina ia mafai ona latou vave mauaina.)
Tuu atu i tamaiti aoga e tauloto faatasi le 2 Nifae 2:27 (e faaaoga ai a latou tusitusiga paia pe a manaomia) seia oo ina latou taulotoina le fuaiupu atoa e faaaoga ai na o mataitusi muamua e fesoasoani ai ia i latou. Ona tape ese lea o le tele o mataitusi ma tuu atu ia i latou e toe tauloto faatasi le mau. Faaauau lenei faagasologa seia oo ina tape uma ia mataitusi ma mafai ai e le vasega ona tauloto le fuaiupu atoa mai le mafaufau. I le avea ai ma se vaega o lenei gaoioiga, atonu e te manao e faasoa atu le saunoaga lenei a Elder Richard G. Scott o le Korama a Aposetolo e Toasefululua: “O se mau ua taulotoina e avea ma se uo tumau lea o le a le faavaivaia i le gasologa o taimi” (“O Le Mana o Tusitusiga Paia,” Ensign po o le Liahona, Nov. 2011, 6).
Manatua: Atonu e i ai sou taimi e faaaoga ai lenei gaoioiga i se vaega o lenei lesona. Afai e leai sou taimi, mafaufau e faaaoga i se isi lesona.
Tala ma Faamatalaga o Talaaga
2 Nifae 2:29. “O manaoga o le tino ma le leaga o i ai i totonu”
E le o faapea mai lenei fuaiupu o o tatou tino e leaga. Ae, o loo faamatala mai ai se vaaiga o lo tatou tulaga pa’ū. O loo aofia i le Faamaoni i le Faatuatua lenei faamalamalamaga: “I lenei tulaga pa’u, ua i ai se feteenaiga i totonu o i tatou. O i tatou o fanau agaga a le Atua, o i ai ni malosiaga e avea ai ma “tofusia ai … i le amio Atua’ (2 Peteru 1:4). Peitai, ‘ua [tatou] le agavaa i … luma [o le Atua]; o le pa’u o o matou natura ua matou leaga ai pea e le aunoa’ (Eteru 3:2). E manaomia ona tatou tauivi pea e faatoilalo ia tuinanau ma manaoga lē amiotonu” (Faamaoni i le Faatuatua: O Se Tusitaiala o le Talalelei [2004], 57).