2 Nifae 4

Faatomuaga

Ina ua mavae le maliu o Liae, na oo ina feita Lamana ma Lemuelu ia Nifae “ona o aoaiga a le Alii” ia na ta’u atu e Nifae ia i latou (tagai i le 2 Nifae 4:13–14). I le atuatuvale ai i uiga ma amioga a ona uso atoa ai ma ona lava ia vaivaiga ma agasala, sa faamaumauina ai e Nifae ona lagona i se gagana faamatala ma le loloto. Na ia faamatalaina lona fiafia i tusitusiga paia ma lona loto faafetai mo faamanuiaga ma le malosi na ia mauaina mai le Alii (tagai i le 2 Nifae 4:15–35).

Fautuaga mo le Aoaoga

2 Nifae 4:1–11

Ua fautuaina ma faamanuiaina e Liae lona aiga

A o lei amataina le vasega, tusi le fesili lenei i luga o le laupapa:

Afai o oe o se tama po o se tina matua faamaoni ma e le o ola lau fanau e tusa ai ma tulaga faatonuina o le talalelei, o le a se fautuaga e te tuuina atu i fanau a lau fanau?

Amata le vasega e ala i le valaauliaina o tamaiti aoga e tali mai i le fesili o i luga o le laupapa. A uma ona tali mai tamaiti, fesili atu i ai:

O a ni tiutetauave a matua ma matua matutua i le aoaoina ma le fautuaina o a latou fanau ma fanau a fanau?

I le avea ai ma se vaega o lenei talanoaga, atonu e te manao e faitau atu pe fai atu i se tamaitiiti aoga e faitau mai le faamatalaga lenei:

“Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia faaletino ma le faaleagaga, ma ia aoao i latou e alolofa ma feauaunaa’i, ia tausia poloaiga a le Atua ma avea ma tagatanuu usiusitai i tulafono i soo se mea latou te nonofo ai. O tane ma ava—tina ma tamā—o le a latou tali atu i le Atua mo le faataunuuina o nei mea e ao ona faia.… E tatau i aiga lautele ona tuuina atu le lagolago pe a manaomia” (“O Le Aiga: O Se Folafolaga i le Lalolagi,” Liahona, Nov. 2010, 129).

Faailoa atu le 2 Nifae 4 e ala i le faamalamalamaina atu e faapea a o lei maliu Liae, sa ia fautuaina ana fanau ina ia tausi i poloaiga. Valaaulia tamaiti aoga e faitau le 2 Nifae 4:3–11, ma faailoa tagata na aoaoina e Liae atoa ai ma le fautuaga na ia tuu atu ia i latou.

O ai na aoao e Liae? (Tagai i le 2 Nifae 4:3, 8, 10–11.)
O le a se folafolaga na tuu atu e Liae i fanau a Lamana ma Lemuelu? (Tagai i le 2 Nifae 4:7, 9.)
E tusa ai ma le 2 Nifae 4:5, o le a sau faamatalaga e uiga i se tiutetauave ua tuu mai e le Alii i matua? (E mafai ona faaaoga e tamaiti aoga ni upu eseese e tali ai lenei fesili, ae ia faamautinoa ua latou malamalama e faapea ua i ai i matua se tiutetauave mai le Atua e aoao ai a latou fanau i le talalelei.)
O a ni upumoni na e aoaoina mai i ou matua po o matua matutua?

Uunaia tamaiti aoga ia avea ma ni sootaga malolosi i filifili a o latou aiga—ia ola i le talalelei ma saunia e avea ma ni matua amiotonu. Atonu e te manao e faaali atu le pepa lautele o loo i ai le savali “Be a Strong Link” (tagai i le http://lds.org/liahona/2003/09/poster?lang=eng).

2 Nifae 4:12–35

Na tautino e Nifae ona vaivaiga ma faailoa lona faalagolago i le Alii

I luga o le laupapa, tusi ai le Ua fiafia lou agaga i …

Fai atu i tamaiti aoga e tusi le fasifuaitau lenei i a latou api talaaga mo le suesueina o tusitusiga paia po o api e tusi ai faamatalaga i le vasega ma faauma le faamatalaga, i le lisiina o mea o loo fiafia i ai o latou agaga.

Fai atu i se tamaitiiti aoga e faitau leotele le 2 Nifae 4:15–16 e iloa ai pe na faapefea ona faamaea e Nifae lenei fasifuaitau.

O a nisi o mea e ono mafai ona tatou faia pe a fiafia o tatou agaga i tusitusiga paia?
O le a le uiga ia te oe o le fiafia i mea a le Alii?
Sa faapea mai Nifae na ia mafaufau loloto i mea na ia vaaia ma faalogo i ai. O le a le uiga o lenei fuaitau ia te oe?

Faailoa atu na lagona e Nifae le olioli tele i lona olaga. Peitai, sa ia fetaiai foi ma faigata.Tuu atu i tamaiti aoga e faitau le leoa le 2 Nifae 4:12–13 e iloa ai nisi o luitau na fetaiai ma Nifae i le taimi lea o lona olaga. (O le maliu o Liae ma le ita o Lamana, Lemuelu, ma atalii o Isamaeli.)

O le tele o luitau o Nifae na mafua ona o amioga ma uiga a ona uso matutua. Ae sa lagona foi e Nifae le faanoanoa ona o ona lava vaivaiga. Tusi i luga o le laupapa Sa faanoanoa lou loto ona …

Valaaulia tamaiti aoga e faitau le 2 Nifae 4:17–18 ma sue ni mafuaaga na lagona ai e Nifae le faanoanoa.

A lava loa le taimi na faitau ai e tamaiti aoga nei fuaiupu, fesili atu ia i latou i mea na latou mauaina. Taulai atu lo latou gauai i upu leaga, tino, ma le lavelavea i fuaiupu nei. Faamalamalama atu o le upu leaga (wretched) o lona uiga o le pagatia po o le le lelei. I tusitusiga paia, o le upu tino (flesh) e tele lava ina faatatau i vaivaiga o ia i tatou ona o loo tatou ola i se tulaga pa’ū. O le upu lavelavea (beset) o lona uiga o le siosiomia po o le fetaomi mai i itu uma.

O a nisi o faataitaiga o faigata e mafai ona lavelavea ai i tatou? (O tali e mafai ona aofia ai faafitauli i le aiga, o taa’iga a tupulaga, meaa’oga faigata, ma faaosoosoga.)

Tuu atu i se tamaitiiti aoga e faitau le 2 Nifae 4:19.Atonu e te manao e uunaia tamaiti aoga e faamamafa le faamatalaga “E ui i lea, ua ou iloa le ua ou faalagolago i ai.” Faailoa atu e faapea i le 2 Nifae 4:19, na suia upu a Nifae mai le faanoanoa i le faamoemoe.

O le a sou manatu i le uiga o le tala a Nifae ina ua ia faapea mai “Ua ou iloa le ua ou faalagolago i ai”?
E mafai faapefea e le manatuaina o le Alii ma Lona agalelei ona fesoasoani ia i tatou i taimi o le lotovaivai?

Faitau leotele le 2 Nifae 4:20–25. Fai atu i tamaiti aoga e mulimuli i a latou tusitusiga paia. Valaaulia i latou e tagai mo upu ma fasifuaitau ia e faaalia ai le lagolagoina e le Atua o i latou e faalagolago ia te Ia.

O a ni upu po o ni fasifuaitau i le 2 Nifae 4:20–25 ua e iloaina le anoa? Aisea?
Mafaufau i se taimi na lagolagoina ai oe e le Alii pe fesoasoani foi ia te oe i se taimi o faigata. Na faapefea ona Ia fesoasoani ia te oe?Na faapefea ona uunaia oe e lena aafiaga?

Atonu e aoga le tuu atu i tamaiti aoga o se taimi e mafaufau ai e uiga i na aafiaga ma faamaumau i a latou api talaaga mo le suesueina o tusitusiga paia. E mafai foi ona faamanuiaina tamaiti aoga pe a e tau atu ia i latou se taimi na lagolagoina ma tausia ai oe e le Atua.

Fesoasoani atu i tamaiti aoga ia malamalama e faapea o le tomai o Nifae e manatua ai ma talisapaia mea na faia e le Alii mo ia i le tuanai sa ia maua ai le faamoemoe ma uunaia ai o ia ia lelei atili. Valaaulia tamaiti aoga e faitau le leoa le 2 Nifae 4:26–30, tagai pe na faapefea e aafiaga o Nifae ona aafia ai lona manao ina ia amiotonu. Fai atu i ni nai tamaiti aoga e faasoa mai ni mea ua latou maua.

Fai atu i ni nai tamaiti aoga e auauai e faitau leotele mai le 2 Nifae 4:30–35. Faailoa mai o se vasega, ni tautinoga na faia e Nifae i le Alii ma ni faamanuiaga sana ia talosagaina.

O le a se mea ua tatou aoaoina mai lenei tatalo lea e mafai ona fesoasoani ia i tatou i a tatou tatalo patino? (E mafai ona faaaoga e tamaiti aoga ni upu eseese e tali ai lenei fesili, ae ia mautinoa ua latou malamalama e faapea o se tatalo faamaoni e mafai ona faamalosia ai la tatou tautinoga e faatoilalo le agasala ma le lotovaivai.)

Valaaulia tamaiti aoga e mafaufau i se taimi na fesoasoani ai le tatalo ia i latou e faatoilalo le agasala po o le lotovaivai. Atonu e te manao e fautua atu ia latou faasoa mai o latou aafiaga pe faamaumau i a latou api talaaga mo le suesueina o tusitusiga paia.

Tuu atu i tamaiti aoga se taimi e saili ai se fuaitau i le 2 Nifae 4 lea e atagia mai ai se manao o ia i latou. A uma le taimi faatulagaina, faitau le faamatalaga lenei mai ia Elder David A. Bednar o le Korama a Aposetolo e Toasefululua i le auala e mafai ai e le tatalo ona faafailele le tuputupu ae faaleagaga:

“Atonu o loo i ai ni mea i o tatou uiga faaalia, i a tatou amioga, pe faatatau i lo tatou tuputupu ae faaleagaga lea e manaomia ai ona tatou talanoa ma le Tama Faalelagi i le tatalo i le taeao. A uma ona faailoa atu se faafetai e tatau ai mo faamanuiaga ua maua, ona tatou ole atu lea mo le malamalama, taitaiga, ma le fesoasoani e faia ai mea e le mafai ona tatou faia na o i tatou i lo tatou lava malosi. Mo se faataitaiga, a tatou tatalo, atonu tatou te:

“• Mafaufau i taimi ia tatou te tautatala atu ai ma le le alolofa pe le talafeagai foi ia i latou e sili ona tatou alolofa i ai.

“• Faailoa atu ua sili atu mea ua tatou iloa, ae tatou te le o faatinoina i taimi uma e tusa ai ma mea ua tatou iloa.

“• Faailoa atu lo tatou salamo i o tatou vaivaiga ma le le tuueseina ma le naunautai atili o le tagata natura.

“• Fuafua e mamanu atoatoa atili o tatou olaga i le Faaola.

“• Aioi atu mo se malosi sili atu e faia ai ma ia atili ai ona lelei” (“Tatalo e le Aunoa,” Ensign po o le Liahona, Nov. 2008, 41).

Faamaea i le faasino atu i fasifuaitau sa e tusia i luga o le laupapa i le amataga o le lesona (“Ua fiafia lou agaga i …” ma le “Ua faanoanoa lou loto ona …”). Faailoa atu lou talitonuga e faapea e tusa lava pe tatou te feagai ma tulaga faigata, e mafai lava ona tatou oo i le fiafia ma le filemu a o tatou saili atu i le fesoasoani a le Alii.

Iloiloga o le Mau Tauloto

Manatua: O le umi o lenei lesona e mafai ona maua ai se taimi mo le gaoioiga lenei o le iloiloga o le mau tauloto. E mafai ona e taitaia le gaoioiga i le amataga o le vasega, e fai ma se malologa i va o vaega o le lesona, pe tuu foi i le faaiuga o le vasega. Mautinoa ia faapuupuu ina ia lava ai le taimi mo le lesona. Mo isi gaoioiga faaleiloiloga, tagai i le faaopoopoga i le faaiuga o le tusi lesona lenei.

E mafai ona fesoasoani suega e manatua ai e tamaiti aoga mea sa latou aoaoina ma fua ai lo latou aoaoina. Filifili ni nai fuaitau fou o mau tauloto, ma valaaulia tamaiti aoga e faitau ma faailoga i a latou tusitusiga paia. Ona tuu atu lea ia i latou se suega tautala i na fuaitau ma isi fuaitau o mau tauloto ua uma ona latou aoaoina. Mo fuaitau taitasi, faitau atu se upu po o se fasifuaitau autu mai le faailogatusi a le seminare. Ona fai atu lea i tamaiti aoga e sue le fuaitau sao i a latou tusitusiga paia.

Tala ma Faamatalaga o Talaaga

2 Nifae 2:16-35. Faatoilaloina o a tatou agasala ma vaivaiga

A o tatou suesueina le aioiga faamomoiloto a Nifae i le Alii e fesoasoani atu ia te ia e faatoilalo ana agasala ma vaivaiga, ua tatou vaaia ai e mafai ona tatou o atu i le Alii mo lena lava fesoasoani e tasi. O loo toe ta’ua foi upu a Nifae i saunoaga a perofeta o aso e gata ai.

Sa aoao mai le Perofeta o Iosefa Samita:

“O le latalata atili o le tagata i le atoatoa, o le manino tele foi lea o ona manatu, ma faateleina foi lona fiafia, seia ona faatoilaloina le leaga o lona olaga ma aveesea uma naunauga i le agasala” (Aoaoga a Peresitene o le Ekalesia: Iosefa Samita [2007], 224).

Sa molimau mai Elder Richard G. Scott o le Korama a Aposetolo e Toasefululua e uiga i faamanuiaga tatou te maua pe a tatou salamo:

“Aisea ua poloaiina ai i tatou e lo tatou Tama ma Lona Alo ia salamo? Aua La te alolofa ia i tatou. Ua La silafiaina o le a solia e i tatou uma ia tulafono e faavavau. E tusa pe laitiiti pe tele, o le faamasinoga tonu e moomia ai le faamalieina o tulafono uma na solia ina ia faatumauina ai le folafolaga o le olioli i lenei olaga ma le avanoa e toe foi atu ai i le Tama o i le Lagi. Afai e le faamalieina, i le Aso o le Faamasinoga, o le a tuliesea ai i tatou i fafo e le faamasinoga tonu mai le afioaga o le Atua ina ia i lalo o le puleaga a Satani [tagai i le 2 Nifae 9:8–10; 2 Nifae 2:5].

“O lo tatou Matai ma Lana galuega togiola lea ua mafai ai e i tatou ona aloese mai lea faasalaga. E faia lea e ala i le faatuatua ia Iesu Keriso, usiusitai i Ana poloaiga, ma tumau i le amiotonu, seia oo i le iuga.

“Pe o e faaaogaina lelei ea le mana togiola o le salamo i lou olaga ina ia mafai ai ona e maua le filemu ma le olioli silisili? O lagona o le le mautonu ma le lotovaivai e masani ona faailo mai ai le manaomia o le salamo. O le leai foi o se taitaiga faaleagaga e te sailia i lou olaga e mafai ona maua mai le solia o tulafono. Afai e manaomia, o le salamo atoatoa o le a tuufaatasia ai lou olaga. O le a faaleleia ai tiga ma mafatiaga faaleagaga lea e maua mai le solitulafono. Ae i lenei olaga e le mafai ona fofoina ai nisi o taunuuga faaletino lea e mafai ona tulai mai se agasala matuia. Ia atamai ma ia ola pea i totonu o tuaoi o le amiotonu ua tuuina mai e le Alii” (“O Le Ala i le Filemu ma le Olioli,” Liahona, Ian. 2001, 31).