2 Nifae 33

Faatomuaga

Na faaiu e Nifae ana faamaumauga e ala i le tautino mai e faapea o ana upu tusitusia ua molimau mai e uiga ia Iesu Keriso ma faatauanau ai tagata ina ia faia le lelei ma tumau e oo i le iuga. Na ia fai mai e ui na ia tusia “i le vaivai,” ae o ana upu “ua taua tele” ma o le a “faia ia malolosi” mo i latou o le a faitau i ai (tagai i le 2 Nifae 33:3–4). Na ia molimau mai o ana tusitusiga o “afioga a Keriso” ma o le a tali atu tagata lava ia i le Atua e tusa ma lo latou taliaina o ia afioga (tagai i le 2 Nifae 33:10–15).

Fautuaga mo le Aoaoga

2 Nifae 33:1–2

Ua aoao mai Nifae e uiga i le mana o le Agaga Paia e moliooina le upumoni i o tatou loto

Tusi le ata lenei i luga o le laupapa:

O le a le eseesega i le va o se savali e alu e oo i le loto o se tasi ma se savali e alu i totonu o le loto o se tasi?

Valaaulia se tamaitiiti aoga e faitau leotele le 2 Nifae 33:1.Ona fai atu lea i tamaiti aoga e mafaufau loloto lemu i fesili nei:

Aisea e te manatu ai e taua le moliooina e le Agaga Paia o le upumoni e oo i o tatou loto ae le o i totonu o o tatou loto?

A o mafaufau loloto tamaiti aoga i lenei fesili, faitau leotele le saunoaga lenei a Elder David A. Bednar o le Korama a Aposetolo e Toasefululua. Faamalamalama atu o lenei saunoaga, o loo talanoa ai Elder Bednar e uiga i le 2 Nifae 33:1.

“Faamolemole ia matau le auala o loo molioo ai e le mana o le Agaga le savali e oo i ae le o i totonu o le loto. E mafai e se faiaoga ona faamalamalama atu, faaali atu, faatauanau, ma molimau atu, ma e faia lena mea i le mana sili faaleagaga ma le mataalia. Peitai, i le faaiuga, e na o le pau le taimi e ulufia ai e le aano o se savali ma le molimau a le Agaga Paia le loto o lē taliaina pe afai lena na te faatagaina ona ulu atu i ai” (“Seek Learning by Faith” [address to CES religious educators, Feb. 3, 2006], 1, si.lds.org).

Fai atu i se tamaitiiti aoga e faitau leotele le faamatalaga lenei a Elder Gerald N. Lund o le Fitugafulu:

“Aisea ua na o le oo i le loto [e molioo ai]? O le faitalia o le tagata e paia tele, lea o le a le mafai ai e le Tama Faalelagi ona faamalosi le loto o le tagata, e tusa lava pe o loo i ai Lona mana le mafuatia. … Ua faatagaina i tatou e le Atua e avea ma leoleo, po o leoleo faitotoa, o o tatou lava loto. E tatau, e tusa ai ma o tatou lava loto fuatiaifo, ona tatala o tatou loto i le Agaga” (“Tatalaina o o Tatou Loto,” Ensign po o le Liahona, Me 2008, 33).

O le a le mea e iloa ai pe ua ulu atu se savali i le loto o se tagata?
O anafea na e lagonaina ai sa ulu atu se savali o le talalelei i lou loto? O le a se mea na ta’u atu e lenei mea e uiga i lou loto i lena taimi?

Fai atu i tamaiti aoga e faitau le leoa le 2 Nifae 33:2, ma faailoa le ala o loo tali atu ai tagata i le Agaga Paia pe a latou faamaaaina o latou loto. Atonu e te manao e faamalamalama atu o le upu “meanoa” o lona uiga “e leai se mea.” Ma “manatu [i afioga tusia] o ni meanoa” o lona uiga o le manatu lea i ai e leai so latou taua.

O a nisi o amioga ma uiga o tagata e loto maaa?
Mo oe, o le a le savali o le 2 Nifae 33:2? (Atonu e tali mai tamaiti aoga faapea tatou te filifili e tatala pe tapuni o tatou loto i musumusuga a le Agaga Paia. Ia mautinoa latou te malamalama e faapea pe a tatou tatalaina o tatou loto, e mafai ona ulu atu savali mai le Agaga Paia i o tatou loto.)

A o lei faaauaua le lesona, tuu atu i tamaiti aoga sina taimi e mafaufau lemu ai i le tulaga o o latou loto ma ia fuafua pe o latou faatagaina ni savali o le upumoni e ulu i o latou loto.

2 Nifae 33:3–15

Ua faamalamalama mai e Nifae le faamoemoega o ana faamaumauga ma lona faamoemoe o le a talitonu ē faitau i ai ia Keriso

Tusi le faamatalaga lenei i luga o le laupapa:

2 Nifae 33:3—Ou te tatalo e le aunoa mo …

2 Nifae 33:4—Ua ou iloa …

2 Nifae 33:6—Ou te olioli …

2 Nifae 33:7—Ua ia te au le …

Valaaulia tamaiti aoga e faitau le leoa le 2 Nifae 33:3–7, tagai mo faamoemoega o Nifae mo i latou o le a faitauina ana upu. Valaaulia ni nai tamaiti aoga e o mai i le laupapa ma faauma ia fuaiupu, e faaaoga ai ni a latou lava upu po o ni upu a Nifae. (O ni nai fasifuaitau i luga o le laupapa e oo atu i le silia ma le tasi se tali.)

E mafai faapefea ona tatou faamalosia a tatou molimau patino e uiga ia Iesu Keriso ma Lana Togiola?

Tuu atu i ni tamaiti aoga se toalima e faitau feauauai leotele mai le 2 Nifae 33:10–14. Fai atu i le vasega e mulimuli i le faitauga, ma tagai mo ni fasifuaitau i le faatofa a Nifae lea e taua ia i latou. Atonu e te manao e fautua atu i tamaiti aoga e faailoga nei fasifuaitau.

O a ni fasifuaitau e taua ia te oe? Aisea?
Afai e talitonu tagata ia Keriso, o le a faape’i ni o latou lagona e uiga i le Tusi a Mamona? (Tagai i le 2 Nifae 33:10.)
O le a le mea na lapatai mai ai Nifae o le a tupu ia i latou o ē o le a teenaina ana upu? (A o tali mai tamaiti aoga i lenei fesili, e mafai ona e fautua atu i ai ia latou mafaufau foi pe o le a faape’i o latou lagona pe a i ai i le afioaga o le Alii pe afai na latou talitonu ma mulimuli i upu a Nifae ma isi perofeta.)

Fai atu i tamaiti aoga e faitau le leoa le 2 Nifae 33:15 ma ia mafaufau loloto i upu faaiu a Nifae: “E ao ina ou usiusitai.” Ona tuu atu lea ia i latou ni nai minute e tagai ai i tua i le 1 ma le 2 Nifae, ma faailoa mai ni faataitaiga o le usiusitai o Nifae. A maea ni nai minute, fai atu i tamaiti aoga e faasoa mai ni mea na latou maua. O tali e mafai ona aofia ai le tuua o Ierusalema, toe foi atu i Ierusalema e aumai papatusi apamemea, toe foi atu i Ierusalema e talosagaina le aiga o Isamaeli ia faatasi ma i latou, tausiaina o seti e lua o papatusi, mulimuli i le faasinoala a le Liahona, fauina o se vaa, faimalaga atu i le nuu folafolaina, vavaeeseina mai ia Lamana ma Lemuelu, ma le taitaia o lona nuu i le amiotonu. A o tuu mai e tamaiti aoga ni faataitaiga, e mafai ona e lisiina i luga o le laupapa.

Tusi le faamatalaga lenei i luga o le laupapa: E ao ina ou …

Valaaulia tamaiti aoga e faauma lenei fuaiupu i a latou api talaaga mo le suesueina o tusitusiga paia po o api e tusi ai faamatalaga i le vasega. Faailoa atu lou talitonuga e mafai ona latou filifili ina ia usiusitai. Faasoa atu ou manatu i le auala e mafai ai ona fesoasoani upu a Nifae ia i latou ia faamalolosia lo latou faatuatua ia Iesu Keriso ma faateleina ai lo latou gafatia e fai le amiolelei.

Iloiloga o le 2 Nifae

Faaalu sina taimi e fesoasoani ai i tamaiti aoga ia iloilo le 2 Nifae. Fai atu ia i latou ia mafaufau e uiga i mea sa latou aoaoina mai lenei tusi, i le seminare faapea ai ma a latou lava suesuega faaletagata lava ia o tusitusiga paia. Pe a manaomia, uunaia i latou e tagai vave i le 2 Nifae e fesoasoani ai ia latou manatuaina. Fai atu ia i latou ia saunia e faasoa mai soo se mea mai le 2 Nifae na musuia ai i latou e fai se mea lelei ma maua ai le faatuatua ia Iesu Keriso, e pei ona fai mai Nifae (tagai i le 2 Nifae 33:4). A maea le taimi faatulagaina, fai atu i ni nai tamaiti aoga e faasoa mai ni o latou manatu ma ni lagona.

Faasoa atu saunoaga nei e uiga i le tiutetauave ua ia i tatou i le faitauina o le Tusi a Mamona atoa ai ma faamanuiaga e oo mai i o tatou olaga pe a tatou faataunuuina lenei tiutetauave:

Sa saunoa mai Peresitene Iosefa Filitia Samita e faapea: “E foliga mai ia te au e le taitai lava ona faamalieina soo se tagata o lenei Ekalesia seiloga lava na te faitauina pea lava pea le Tusi a Mamona, ma mafaufau i ai ma le faaeteete ina ia mafai ona ia molimau mai o se faamaumauga moni lava o loo i ai ia musumusuga a le Silisili Ese, ma e moni lona talaaga” (i le Conference Report, Oct. 1961, 18).

Sa aoao mai Peresitene Gordon B. Hinckley e faapea afai e faitauina e tagata o le Ekalesia le Tusi a Mamona, “o le a oo mai i totonu o o [latou] olaga ma o [latou] aiga se fuataga faaopoopo o le Agaga o le Alii, o se faaiuga ua faamalosia e savavali i le usiusitai i Ana poloaiga, ma se molimau malosi atu e uiga i le moni o le i ai o le Alo o le Atua” (“O Se Molimau Moni ma Faamaoni,” Liahona, Aok. 2005, 4–6).

Ina ia faamaea le lesona, atonu e te mafaufau e faasoa atu se aafiaga patino e avea ma se molimau e faapea o upu a Nifae i lenei mataupu ua faataunuuina i lou olaga.