Potutusi
Lesona 133: 3 Nifae 27

Lesona 133

3 Nifae 27

Faatomuaga

I le faatoa mavae ai o le auaunaga a le Faaola i totonu o sa Nifaē, na feiloai faatasi ai le au soo sa Nifaē, lea faatoa uma ona valaauina, i le tatalo malosi ma le anapogi. Na faaali atu Iesu Keriso ia i latou, ma tali la latou fesili e faatatau i le igoa e tatau ona latou faaigoaina ai le Ekalesia. Na Ia aoao i latou e uiga i Lana talalelei, ma poloaiina i latou ia avea faapei o Ia.

Fautuaga mo le Aoaoga

3 Nifae 27:1–12

Ua aoao e Iesu Keriso le au soo e toasefululua faapea, o Lana Ekalesia e tatau ona tauaveina Lona suafa

Vaevae le vasega i ni vaega se tolu, pe fa. Afai e toalaiti lau vasega, ia fai atu i tamaiti taitasi e galue lava le tagata ia. Fai atu i vaega (po o tagata taitoatasi) e mafaufau faapea o le a latou amataina se kalapu fou po o se au taalo. Fai atu i vaega taitasi e filifili pe o le a le ituaiga o kalapu, po o le au taalo o le a latou fausiaina, e pei o se kalapu faasaeanisi po o se au lakapi, ona fai lea i ai e filifili se igoa mo la latou faalapotopotoga. Fai atu i vaega taitasi e tusi la latou igoa i luga o se fasi pepa. Ona ao mai lea o pepa a vaega. (E tatau ona puupuu lenei gaoioiga. E le tatau ona alu ai se taimi umi, pe aveese ai le gauai mai aoaoga faavae ma mataupu faavae o loo i le 3 Nifae 27.)

Faitau leotele le igoa o loo i luga o pepa taitasi. Pe a uma ona e faitauina igoa taitasi, fai atu i le vasega e mate mai, e tusa ai ma le igoa, le ituaiga kalapu po o le au o loo ta’ua.

  • O le a le mea e mafai e se igoa ona faailoa mai e uiga i se faalapotopotoga, ma tagata o loo i ai i totonu?

Faamalamalama atu faapea, ina ua faatoa mae’a le asiasiga a Iesu Keriso i sa Nifaē, na tuufaatasia ai Lona au soo e toasefululua sa Nifaē i le anapogi ma le tatalo (tagai i le 3 Nifae 27:1). Valaaulia ni nai tamaiti aoga e feauauai i le faitauina leotele mai o le 3 Nifae 27:2–7. Fai atu i le vasega e mulimuli i le faitauga, ma vaavaai mo le fesili a le au soo ma le tali a le Faaola.

  • O le a le igoa na fetalai le Faaola e tatau ona valaau ai Lana Ekalesia?

  • O a mafuaaga na Ia tuuina mai mo le faaigoaina o le Ekalesia ia te Ia lava?

Valaaulia tamaiti e sailiili lē leoa le 3 Nifae 27:8–12 ma vaavaai mo le faamatalaina e le Faaola o Lana Ekalesia moni. A o latou suesue, tusi le faamatalaga lenei e le i uma i luga o le laupapa:

O le Ekalesia moni a Iesu Keriso e ao ona …

Pe a uma se taimi ua lava mo tamaiti e sailiili ai nei fuaiupu, fai atu ia i latou pe mata e faapefea ona latou faaumaina le fuaiupu o loo i luga o le laupapa, e faalagolago i mea na latou faitau i ai. (E tatau i tamaiti ona mafai ona faailoa mai le upumoni lenei: O le Ekalesia moni a Iesu Keriso, e ao ona valaauina i Lona suafa ma atiae i luga o Lana talalelei.)

  • Aisea e te manatu ai e taua mo le Ekalesia a le Faaola ona tauaveina Lona suafa?

  • O le a le uiga mo le Ekalesia ina ia “atiae i luga o [Lana] talalelei”? (3 Nifae 27:10). Aisea e te manatu ai e taua mo le Ekalesia ina ia atiae i luga o Lana talalelei, nai lo galuega a tagata?

Valaaulia tamaiti e faauma le fuaiupu lenei i totonu o api po o api talaaga o le suesueina o tusitusiga paia: I le avea ai ma tagata o le Ekalesia a Iesu Keriso, e taua ia te a’u ona …”

3 Nifae 27:13–22

Ua faamanino e Iesu Keriso Lana talalelei, ma aoao mai mea e ao ona tatou faia e tutu ai ma le lē pona i Ona luma, ma luma o Lona Tama

Fai atu i tamaiti e manatunatu e uiga i o latou lagona, pe a maua i latou o faia se mea sese. (Aua ne’i fai atu ia i latou e faasoa mai nei aafiaga.) Ona fai atu lea ia i latou e mafaufau, pe mata o le a le tulaga e i ai le tutu i luma o le Alii ina ia faamasinoina. Uunai i latou e mafaufau loloto e uiga i le fesili lenei:

  • O a ni ou lagona i luma o le Alii, pe afai o tausalaina oe i se agasala?

Faamalamalama atu faapea o le upu talalelei o lona uiga o le “tala e lelei.” Valaaulia ni nai tamaiti e feauauai i le faitauina leotele mai o le 3 Nifae 27:13–16, ma fai i le vasega e vaavaai mo tala e lelei o loo i totonu o nei fuaiupu. Fai atu foi ia i latou e mafaufau pe faapefea e lenei tala e lelei ona fesootai i le aso, pe a latou tutu i luma o le Atua ina ia faamasinoina.

  • Na molimau atu le Faaola faapea na Ia afio mai i le lalolagi ina ia faia le finagalo o Lona Tama. E tusa ai ma le 3 Nifae 27:14, o le a le mea na auina mai ai e le Tama Faalelagi ia Iesu Keriso i le lalolagi e faia?

  • E tusa ai ma le 3 Nifae 27:13–14, o le a le faavae o le talalelei? (E ui atonu e faaaoga mai e tamaiti ni upu eseese, e tatau ona latou faailoa mai le upumoni lenei: O le faavae o le talalelei, o le faapea o Iesu Keriso na faia le finagalo o Lona Tama i le faataunuuina ai o le Togiola. Atonu e te manao e valaaulia tamaiti e tusi lenei upumoni i totonu o a latou tusitusiga paia i autafa o le 3 Nifae 27:13–14.)

  • Talu ai na faataunuuina e le Faaola le finagalo o Lona Tama, o le a le mea o le a tupu i tagata soifua uma lava? (O le a siitia i luga i tatou i Ona luma ina ia faamasinoina e tusa ma a tatou galuega.)

Valaaulia tamaiti e sailiili lē leoa le 3 Nifae 27:16 ma vaavaai mo galuega e ao ona tatou faia, e maua ai faamanuiaga uma o le Togiola ma saunia mo le faamasinoga. Fai atu i tamaiti e lipoti mai mea ua latou mauaina. Fai i se tamaitiiti e tusi a latou tali i luga o le laupapa.

  • E tusa ai ma lenei fuaiupu, o a faamanuiaga o le a oo mai ia i latou o ē salamo, ua papatisoina, ma tumau e oo i le iuga? (O tali a tamaiti e tatau ona atagia mai ai le upumoni lenei: Afai tatou te salamo, papatisoina, ma tumau e oo i le iuga, o le a tatou mama pe a tatou tutu i luma o le Atua ina ia faamasinoina.)

Valaaulia se tamaitiiti aoga e faitau leotele le 3 Nifae 27:17–19. Fai atu i le vasega e mulimuli i le faitauga, ma vaavaai mo mea o le a tutupu ia i latou, o ē le salamo pe tumau e oo i le iuga.

  • Mai mea ua outou faitau i ai, aisea e manaomia ai e fanau uma a le Tama Faalelagi le Togiola a Iesu Keriso?

  • O a tala e lelei o i ai mo i tatou, a o tatou manatunatu e uiga i le tutu ai i luma o le Alii ina ia faamasinoina?

Valaaulia se tamaitiiti aoga e faitau le saunoaga lenei a Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

“O le ‘tala e lelei’ [o le] faapea o le oti ma seoli [e mafai] ona alofia, faapea o mea sese ma agasala [e mafai] ona faatoilaloina, faapea o loo [i ai] le faamoemoe, faapea o loo [i ai] le fesoasoani, faapea o le mea e le mafai ona faaliusuavai [e mafai] ona faaliusuavai, faapea o le fili [ua] uma ona faatoilaloina. O le tala e lelei [e] faapeao le tuugamau o tagata uma [o le a] i ai le aso e avanoa ai, faapea o le agaga o tagata uma [e mafai] ona toe faamamaina, faapea o atalii uma o le Atua [e mafai] ona toe foi i le Tama o lē na tuuina mai le ola” (“Galuega Faafaifeautalai ma le Togiola,” Liahona, Mati 2001, 8, 10).

Valaaulia se tamaititi e faitau leotele le 3 Nifae 27:20–21 ma fai atu i le vasega e vaavaai mo le valaaulia a le Faaola ia i tatou.

  • O le a le valaaulia a le Faaola o loo i nei fuaiupu?

Ina ia fesoasoani i tamaiti e manatunatu i a latou taumafaiga e talia lenei valaaulia, fai atu ia i latou e tali fesili nei i totonu o api po o api talaaga o le suesueina o tusitusiga paia. (Atonu e te manao e tusi nei fesili i luga o le laupapa, a o lei amataina le vasega, pe faitau lemu ina ia mafai e tamaiti ona tusi i lalo.)

  • Aisea e finagalo ai le Faaola ia te oe, ina ia salamo ma sau ia te Ia?

  • O a auala o loo e taliaina ai le valaaulia a le Faaola o loo i le 3 Nifae 27:20–21?

  • O le a se mea e mafai ona e faia i le asō, e te saunia ai e tu ma le lē pona i luma o le Alii?

Valaaulia se tamaitiiti aoga e faitau leotele leMataupu Faavae ma Feagaiga 76:40–42 . Fai atu i le vasega e mulimuli i le faitauga, ma vaavaai mo manatu faaopoopo e uiga i le mafuaaga ua avea ai le talalelei, ma tala e lelei. (Atonu e te manao e fautuaina tamaiti e tusi le MF&F 76:40–42 i totonu o a latou tusitusiga paia i autafa o le 3 Nifae 27:13.)

I se taimi o muamua atu o le lesona, na e fai atu ai i tamaiti e mafaufau loloto ai i o latou lagona i luma o le Alii, pe afai o tausalaina i latou i se agasala. O le taimi lenei o le lesona, valaaulia i latou e mafaufau loloto i o latou faalogoga atonu e i ai i luma o le Faaola, pe afai ua latou iloaina ua faamamaina i latou e ala i Lana Togiola, ma le usiusitai ai i mataupu faavae, poloaiga, ma sauniga o le talaleleli.

  • Pe a faapea e mafai ona oulua talanoa ma le Faaola i lena taimi, mata o le a lau tala o le a fai?

  • E tusa ma mea ua e suesueina i le asō, mata e faapefea ona e faamalamalamaina atu le tala e lelei o le talalelei a Iesu Keriso i se uo?

3 Nifae 27:23–33

Ua faatonu e Iesu Keriso Lona au soo ina ia avea faapei o Ia

Otooto le 3 Nifae 27:23–26 e ala i le faamalamalamaina faapea, na tuu atu e le Faaola faatonuga i Lona au soo e toasefululua sa Nifaē, ma aoao i latou e uiga i o latou tiutetauave. Valaaulia tamaiti e faitau lē leoa le 3 Nifae 27:27 ma vaavaai mo le poloaiga na Ia tuuina atu i le au soo e fesoasoani ai ia i latou e faataunuu la latou matafaioi i le avea ai ma faamasino o tagata.

  • Aisea atonu e taua ai mo faamasino o tagata ia faapei o le Faaola?

Fai atu i tamaiti e iloilo le 3 Nifae 27:21.

  • O le a le mea na poloaiina e le Faaola le au soo e fai?

  • O le a le sootaga i le va o le faia o galuega a le Faaola ma le avea faapei o Ia?

A o talanoaina e tamaiti lenei fesili, tusi le mataupu faavae lenei i luga o le laupapa: Ua faamoemoe mai le Alii i Lona au soo e faia Ana galuega ma avea faapei o Ia.

  • O a nisi o auala e mafai ai ona tatou faapei o le Faaola? O a nisi o galuega e mafai ona tatou faia, a o tatou mulimuli i Lana faataitaiga?

  • O a auala ua faamanuiaina ai oe, a o e taumafai e mulimuli i le faataitaiga a le Faaola?

Faaiu le vasega e ala i le molimau atu e uiga i faamanuiaga e o’o mai, a o tatou tauivi e avea faapei o Iesu Keriso.

Tala ma Faamatalaga o Talaaga

3 Nifae 27:8. O le igoa o le Ekalesia

Na saunoa mai le Au Peresitene Sili:

“O le faaaogaina o le igoa na faaali mai, O Le Ekalesia a Iesu Keriso o le Au Paia o Aso e Gata Ai (MF&F 115:4), ua faateleina lona taua i lo tatou tiutetauave ina ia folafola atu le suafa o le Faaola i le lalolagi atoa. Mo lena mafuaaga, matou te talosaga atu faapea, pe a tatou faasino i le Ekalesia, tatou te faaaogaina le igoa atoa i soo se tulaga e mafai ai” (Tusi a le Au Peresitene Sili, Fep. 23, 2001).

Na aoao mai Peresitene Harold B. Lee:

“Ina ua ia [le Alii] faaali maia le igoa e tatau ona valaauina ai le Ekalesia, na ia faaaogaina nisi o faaupuga matagofie. Na fetalai Iesu, “Aua e faapea lava ona ta’ua la’u ekalesia i aso e gata ai, O Le Ekalesia a Iesu Keriso o le Au Paia o Aso e Gata Ai”(MF&F 115:4.)

“O le upu o le e taua: e le na o le Ekalesia a Iesu Keriso o le Au Paia o Aso e Gata Ai, aua o le faapea atu ‘O Le Ekalesia’ ua iloagofie ai lenei ekalesia, o le ekalesia moni e tasi ua i ai i luga o le fogaeleele. Sa Ia le’i faapea mai Ekalesia Mamona; sa Ia le’i faapea mai Ekalesia AAG, ae o le faamatalaga manino, mausali, le mafaatusalia, ‘O Le Ekalesia a Iesu Keriso o le Au Paia o Aso e Gata Ai” (“O Le Ala i le Ola e Faavavau,” Liahona, Nov. 1971, 13).

3 Nifae 27:13–21. O le talalelei a Iesu Keriso

Na faamalamalama mai e le Perofeta o Iosefa Samita le savali autu o le talalelei a Iesu Keriso:

“O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, o lea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai” (Aoaoga a Perofeta o le Ekalesia: Iosefa Samita, 2007, 53).

Na saunoa mai Elder Russell M. Nelson o le Korama a Aposetolo e Toasefululua:

“O le upu talalelei o lona uiga ‘o tala e lelei.’ O tala e lelei o le Alii o Iesu Keriso ma Lana savali o le faaolataga. [tagai i le lomifefiloi o le Tusi Paia, “Talalelei,” 682–683.] ] Ua faatusa e Iesu le talalelei i Lana misiona ma Lana galuega i le olaga nei. I le pepa o faamatalagao Lana misiona, na fetalai ai Iesu:

“O le talalelei lenei ua ou tuuina atu ia te outou—na ou sau i le lalolagi e fai le finagalo o Lo’u Tama, aua na auina mai a’u e le Tama.

Ma na auina mai au e lou Tamā ina ia sii ae au i luga o le satauro;[3 Nifae 27:13–14.]

“O le misiona a le Faaola i le olaga nei, ua tatou iloaina o le Togiola.

“O le galuega a le Faaola i le olaga nei e aofia ai isi mea uma sa Ia faia—o Ana aoaoga, o le faaalia o le alofa, silasila toto’a i sauniga, o mamanu o tatalo, faapalepale, ma isi. Sa soifua o Ia ina ia avea ma o tatou faataitaiga, lea foi na Ia faatusa i le talalelei i le faaupuga e faatatau i Lana galuega. ‘O la’u tala lelei lenei’ na Ia fetalai ai, ‘… aua o galuega na outou vaai i ai ua ou faia, ia faia foi e outou.’ ]3 Nifae 27:21.) ] O le mea lea, o le faatuatua; salamo; papatisoga i le vai, afi, ma le Agaga Paia; o le faapotopotoina o e ua filifilia; ma le tumau e oo i le iuga, o vaega uma ia o le talalelei” (“Faifeautalai Matutua ma le Talalelei,” Ensign po o le Liahona, Nov. 2004, 81).

3 Nifae 27:27. Avea e faapei o Iesu Keriso

Sa aoao mai e Peresitene Ezra Taft Benson e faapea:

“O lena tagata e maoae ma sili ona faamanuiaina ma fiafia, o lona soifuaga e sili ona talafeauga ma le mamanu a le Keriso. E leai se mea e faia e lenei tulaga i le tamaoaiga faalelalolagi, malosi, po o mamalu. Na o le pau le suega moni o le maoae, faamanuiaina, fiafia, o le tulaga latalata lea e mafai ona avea ai se soifuaga e faapei o le Matai, o Iesu Keriso. O Ia o le ala sa’o, le upumoni atoatoa, ma le olaga fetiitii” (“Jesus Christ—Gifts and Expectations” [BYU devotional address, Dec. 10, 1974], 1, speeches.byu.edu).