3 Nifae 29–30

Faatomuaga

A o faaiuina e Mamona lana tala o le asiasiga a le Faaola i totonu o sa Nifaē, na ia faamalamalama mai faapea o le o’o mai o le Tusi a Mamona, o le a avea ma faailoga o le faataunuuina e le Alii o Lana feagaiga ma le aiga o Isaraelu. Na ia lapatai mai foi faapea o i latou o e teenaina galuega a le Atua, o le a feagai ma faamasinoga a le Atua. I le faaiuga, na ia faamaumauina ai le valaaulia a le Faaola mo tagata uma ina ia salamo ma faitaulia faatasi ma le aiga o Isaraelu.

Fautuaga mo le Aoaoga

3 Nifae 29

Ua molimau mai Mamona faapea o le a faataunuuina e le Alii Lana feagaiga ma le aiga o Isaraelu i aso mulimuli

Kopi le siata lenei i luga o le laupapa, a o lei amataina le vasega (pe saunia se pepa e tufa atu mo tamaiti taitasi):

Tagata o Nuuese	Lua uiga: (1) o fanau a le perofeta o le Feagaiga Tuai o Iakopo (Isaraelu), lea na osi feagaiga ma le Alii, ma le (2) o tagata talitonu moni ia Iesu Keriso, o e na osi feagaiga ma le Atua
Aiga o Isaraelu	O se folafolaga i tagata faatuatua lea e aofia ai faamanuiaga o le talalelei, pule o le perisitua, aiga e faavavau, ma se laueleele o le tofi
Faafitia	Lua uiga: (1) o tagata e lē ni Isaraelu, pe e lē tau i le gafa o Iutaia, ma le (2) o tagata e le’i mauaina le talalelei
O le feagaiga a le Alii ma Isaraelu	Faanoanoa tele ma le salamo
Oi talofa	O le lē amanaia po o le teenaina ma le manatu faatauvaa po o le inoino

Amata le vasega e ala i le valaauliaina o tamaiti e faafetaui upu o loo i le koluma muamua ma o latou tali sao o loo i le koluma lona lua (tali: 1-i, 2-a, 3-u, 4-e, 5-o). A o lipoti mai e tamaiti a latou tali, ia mautinoa ua latou malamalamma i faauigaga taitasi. Atonu e te faia lenei mea e ala i le valaauliaina o tamaiti e faamalamalama mai faauigaga i a latou lava upu, po o le faaaoga mai o upu taitasi po o fuaitau i se fuaiupu. Faailoa atu i tamaiti o nei faauigaga o le a fesoasoani ia i latou e malamalama atili ai i le 3 Nifae 29–30.

Faamalamalama atu faapea, ina ua uma ona tusitusi Mamona e uiga i le asiasiga a le Faaola ia sa Nifaē, ona ia valoia lea o le faataunuuina o folafolaga a le Alii i aso mulimuli. Fesili atu i tamaiti pe na latou iloa se faataunuuga o se folafolaga paia, pe na tuuina mai i totonu o tusitusiga paia, pe ala i se perofeta, pe ala i le Agaga Paia, pe ala i se faamanuiaga faaperiitua. Valaaulia ni nai tamaiti e faasoa mai o latou aafiaga, ae ia mautinoa o faamanatu atu ia i latou, e le tatau ona faasoa maia aafiaga e patino i le tagata lava ia, pe o mea e le tatau ona faalauaiteleina.

Aisea e te manatu ai e masalosalo nisi tagata pe o le a faataunuuina e le Atua Ana folafolaga?
E faapefea ona e iloa e tausia e le Atua Ana folafolaga?

Tusi upu o le Pe a ma le Ona i luga o le laupapa. Valaaulia tamaiti e faitau lē leoa le 3 Nifae 29:1–3 ma vaavaai mo upu o loo i luga o le laupapa. Faamalamalama atu faapea o nei upu o le a fesoasoani ia i latou e saili mai ai se mea o le a faaalia ai le tausiaina e le Alii o Ana folafolaga i le aiga o Isaraelu i aso mulimuli. (Atonu e fesoasoani le faamalamalama atu faapea o le fuaitau “nei upu” o loo i le 3 Nifae 29:1 e faasino i tusitusiga a le Tusi a Mamona.)

Faamata e faapefea ona e otootoina le valoaga o loo faamauina i nei fuaiupu? (Atonu e faaaoga mai e tamaiti ni upu eseese, ae tatau lava ona latou faailoa mai le upumoni lenei: O le o’o mai o le Tusi a Mamona, o se faailoga o le faataunuuina e le Alii o Lana feagaiga ina ia faapotopoto mai Isaraelu i aso e gata ai. Atonu e te manao e uunai tamaiti e faailoga lenei upumoni i totonu o le otootoga o le mataupu 3 Nifae 29.)

Valaaulia tamaiti e u’u i luga a latou kopi o le Tusi a Mamona. Faamalamalama atu ua latou umia i o latou lima le faataunuuga o le valoaga a Mamona, ma e mafai ona faamautinoa atu ia i latou faapea, o loo sauniaina e le Alii Lona nuu mo Lona afio mai. Valaaulia se tamaitiiti aoga e faitau leotele mai le saunoaga lenei mai ia Elder Russell M. Nelson o le Korama a Aposetolo e Toasefululua:

Ata

Elder Russell M. Nelson

“O le Tusi a Mamona o se faailoga vaaia na amata ai ona faapotopoto mai e le Alii Lana fanau o le feagaiga o Isaraelu. …

“Ioe, e le’i galo i le Alii! Ua Ia faamanuiaina i tatou ma isi i le lalolagi atoa i le Tusi a Mamona. … E fesoasoani tatou te osia ai feagaiga ma le Atua. E valaaulia ai i tatou ia manatua o Ia ma ia iloa Lona Alo Pele. O se tasi molimau ia Iesu Keriso” (“Feagaiga,” Ensign po o le Liahona, Nov. 2011, 88).

E faapefea e le mea moni ua ia i tatou le Tusi a Mamona, ona avea o se molimau faapea o le a tausia e le Atua Ana folafolaga?

Tusi le fesili lenei i luga o le laupapa: Aisea e fiafia ai le Au Paia o Aso e Gata Ai i le feagaiga a le Alii ma le aiga o Isaraelu? Fai atu i tamaiti e faalogologo mo tali i lenei fesili, a o e faitauina le saunoaga lenei mai ia Elder Russell M. Nelson, o lē na lisiina mai folafolaga, ia o ni vaega o le feagaiga a le Alii ma Lona nuu. (Atonu e te manao e tuuina atu i tamaiti taitasi se kopi o lenei saunoaga.)

“O le feagaiga na osia e le Atua ma Aperaamo ma mulimuli ane toe faamautuina ma Isaako ma Iakopo … e aofia ai le:

O Iesu Keriso o le a soifua mai i le gafa o Aperaamo.
O le a toatele le fanau a Aperaamo, e agavaa i se faatoateleina e faavavau ma agavaa foi e umia le perisitua.
O le a avea Aperaamo ma tama o atunuu e tele.
O le a mautofi lana fanau i ni laueleele faapitoa.
O le a faamanuiaina malo uma o le lalolagi e ana fanau.
Ma o lena feagaiga o le a faavavau—e oo lava ‘i le afe o tupulaga.’

“O nisi o nei folafolaga ua faataunuuina; o isi o loo tatalia pea. …

“O nisi o i tatou o suli moni o Aperaamo; o isi ua faapotopotoina mai i lona aiga e ala i le vaetamaina. E le faailogaina e le Alii se tagata. Tatou te maua faatasi nei faamanuiaga folafolaina—pe a tatou saili le Alii ma usitai i Ana poloaiga. …

“… Fai mai Polika Iaga: “E ulufale atu tagata uma o le Au Paia o Aso e Gata Ai i le feagaiga fou faavavau pe a latou ulufale mai i lenei Ekalesia’” (“Feagaiga,” 87–88; sii mai Aoaoga a Peresitene o le Ekalesia: Polika Iaga [1997], 62).

I le faaaogaina ai o mea ua e aoaoina mai i le saunoaga a Elder Nelson, mata e faapefea ona e taliina le fesili o loo i luga o le laupapa? (Atonu e tuuina mai e tamaiti ni tali eseese, ae ia mautinoa ua latou faailoa mai le upumoni lenei: O le Au Paia o Aso e Gata Ai, o se vaega o le nuu o le feagaiga a le Alii, ma ua ia i tatou le tiutetauave ina ia faamanuiaina atunuu uma.)
E faapefea ona saili le Au Paia o Aso e Gata Ai e faamanuia atunuu o le lalolagi?
O le a le matafaioi a le Tusi a Mamona i nei taumafaiga?

Faasino i le upu faafitia ma le oi talofa mai le gaoioiga faafetaui. Faamalamalama atu faapea na iloa e Mamona o aso mulimuli o le a i ai i latou o e o le a faafitia le Tusi a Mamona ma isi faamaoniga o le faataunuuga o le feagaiga a le Alii ma Lona nuu. Fai atu i tamaiti e faitau lē leoa le 3 Nifae 29:4–9 ma vaavaai mo mea o le a tutupu ia i latou o e faafitia le Faaola ma Ana galuega. Pe a uma ona faamalamalama mai e tamaiti mea na latou mauaina, atonu e te manao e fautua atu ia i latou e tusi le upumoni lenei i totonu o a latou tusitusiga paia: O faanoanoaga o le a oo mai ia i latou o e teenaina Iesu Keriso ma Ana galuega.

Aisea ua avea ai le faanoanoaga ma se taunuuga faanatura o le faafitia o le Faaola ma Ana galuega?
Faamata e faapefea ona e tali atu i se tasi, o lē fai mai e le mafai ona talanoa mai le Alii i se tagata pe faatino se vavega?
E mafai faapefea ona sili atu ona tatou amanaiaina ma faafetaia le Alii ma Ana galuega i o tatou olaga?

3 Nifae 30

Ua apoapoai mai le Alii i tagata o Nuuese ia salamo ma o mai ia te Ia

Faasino i le upu Nuuese mai le gaoioiga faafetaui. Faailoa i tamaiti aoga faapea i le 3 Nifae 30, na faataunuu ai e Mamona se poloaiga mai le Alii ina ia faamaumauina se valaaulia mai ia Iesu Keriso faapitoa lava mo Nuuese, po o tagata e le’i mauaina le talalelei. Valaaulia tamaiti e faitau lē leoa le 3 Nifae 30:1–2 ma vaavaai mo valaaulia i Nuuese i le tele latou te mafaia. Pe a uma ona latou lipoti mai mea na latou mauaina, fesili atu:

O le fea o nei valaaulia, tou te manatu atonu e mafai ona avea ma se aotelega o isi valaaulia uma? (O le valaaulia ia o mai ia Keriso e aofia ai le salamo, papatisoga, o le mauaina o le Agaga Paia, ma le faitauliaina faatasi ma le nuu o le Alii.)
O a faamanuiaga ua folafola mai e Iesu Keriso mo Nuuese, pe afai o le a latou o mai ia te Ia? (Faamagaloga o agasala, o le faatumulia i le Agaga Paia, ma le faitaulia faatasi ma tagata o Lona nuu.)
Aisea e avea ai o se faamanuiaga le faitaulia faatasi ma tagata o le nuu o le Alii?

Tusi le mataupu faavae lenei i luga o le laupapa: Pe a tatou o mai ia Keriso, o le a faitaulia faatasi i tatou ma tagata o Lona nuu. Faamalamalama atu faapea, e ui lava o le 3 Nifae 30:2 o loo faatatau ia i latou o ē le o ni tagata o le Ekalesia, ae e mafai ona tatou faaaogaina le valaaulia a Iesu Keriso, e fua ai a tatou lava taumafaiga e tausia feagaiga ua tatou osia ma le Atua. Molimau atu e uiga i faamanuiaga e oo mai i le tausiaina o a tatou feagaiga ma poloaiga a le Alii.

Iloiloga o le 3 Nifae

Ia faaalu sina taimi e fesoasoani ai i tamaiti e iloilo le tusi o le 3 Nifae. Fai atu ia i latou e manatunatu e uiga i mea na latou aoaoina mai lenei tusi, e le gata i le seminare ae faapea foi a latou lava suesuega. Pe a manaomia ai, valaaulia i latou e iloilo faapupuu nisi o otootoga o mataupu o loo i le 3 Nifae ina ia fesoasoani ai ia latou manatua. Pe a uma ua lava se taimi, valaaulia ni tamaiti eseese e faasoa mai se mea mai le 3 Nifae sa sili ona musuia ai i latou, pe na fesoasoani ia i latou e faateleina ai le faatuatua ia Iesu Keriso.

Iloiloga o le Mau Tauloto

Tuu atu i tamaiti taitasi se fasi pepa e leai se mea o tusia ai. Valaaulia i latou e tusi se tusi i se tagata (a le o se tagata faafoliga, po o se tasi latou te iloaina) o lē e le auai i le Ekalesia. Fautua atu e latou te sailia fuaitau o mau tauloto mo upumoni, e mafai ona latou faaaogaina e valaaulia ai le tagata o loo ave i ai le tusi, ina ia sau ia Keriso ma faitaulia faatasi ma tagata o Lona nuu. Fai atu i ni nai tamaiti e faasoa mai mea na latou tusia.

Manatua: O le umi o lenei lesona atonu e lava ai se taimi mo lenei gaoioiga. Mo isi gaoioiga mo le iloiloina o mau tauloto, tagai i le vaega faaopoopo i le faaiuga o lenei tusi lesona.

Tala ma Faamatalaga o Talaaga

3 Nifae 30:1–2. O le faapotopotoina o Isaraelu

Na aoao mai Peresitene Spencer W. Kimball:

“O le faapotopotoina o Isaraelu e aofia ai le auai i le ekalesia moni, ma lo latou o mai i se malamalama i le Atua moni. … O le mea lea, o soo se tagata, o lē e taliaina le talalelei toefuataiina, ma o lē ua saili e tapuai i le Alii i lana lava gagana ma faatasi ma le Au Paia i atunuu o loo latou nonofo ai, ua usitaia le tulafono o le faapotopotoina o Isaraelu, ma ua avea ma sui e mauaina faamanuiaga folafolaina uma mo le Au Paia i nei aso mulimuli” (The Teachings of Spencer W. Kimball, ed. Edward L. Kimball [1982], 439).

Manatu Faaopoopo Faafaiaoga

3 Nifae 30:2. “Ia liliu ese … mai i o outou ala leaga; ma salamo mai i a outou faiga leaga”

Valaaulia tamaiti e faaaoga le 3 Nifae 30:2 e iloilo ai a latou taumafaiga ina ia o mai ia Keriso, e ala i le liliu ese mai “faiga leaga.” Ia faia se kopi o le siata lenei mo tamaiti aoga taitasi. (Pe, e mafai ona e faitauina lemu aitema o loo i le siata, ma fai atu i tamaiti e kopi i totonu o api po o api talaaga o le suesueina o tusitusiga paia.) Faamalamalama atu faapea o nisi o gaoioiga ua lisi i luga o le siata, e faatusa i agasala mamafa. E mafai e tamaiti ona faaaoga mea ua tuuina atu i puipui, e faafetaui ai vaega taitasi i o latou lava tulaga ma fesoasoani ia i latou e iloilo i latou lava, e tusa ai ma gaoioiga fesootai, ae le tugā tele.

Fai i tamaiti e iloilo, lē leoa ma le lē faalauaiteleina, i latou lava, ma ta’u atu ia i latou e lē tau tusia a latou tali. Faamanatu atu foi ia i latou faapea, o le faasoaina mai po o le faalauiloaina o solitulafono ua mavae i luma o isi, e le talafeagai.

“Faiga leaga” o loo taua i le 3 Nifae 30:2	E masani ona ou faia lenei tulaga Ou te le faia lava lenei tulaga
Pepelo ma le taufaasese (taitaiina atu o se isi e talitonu i se mea e le moni)	1 2 3 4 5 6
Amio inosia faalilolilo (gaoioiga e le faalauaiteleina e solitulafono pe faatiga i le Atua)	1 2 3 4 5 6
Ifo i Tupua (o le tuuina o le faamuamua i mea o le lalolagi nai lo mea a le Atua)	1 2 3 4 5 6
Faafaitaulaga pepelo (o le auai i gaoioiga faalelotu e faamamaluina ai le tagata lava ia, nai lo le auauna i le Atua ma isi)	1 2 3 4 5 6
Mataua (o le loto leaga po o le manao fua i mea a le isi tagata)	1 2 3 4 5 6
Finauga (finauga, tauaimisaga, po o le fefinauai)	1 2 3 4 5 6

Valaaulia tamaiti e filifili po o fea “faiga leaga” e manaomia lo latou liliu ese atoatoa mai ai ina ia mafai ona o mai ia Keriso. Mafaufau e fai atu ia i latou e faauma mai le faamatalaga lenei i luga o se isi fasi pepa: “O le a ou sau ia Keriso e ala i le … , ina ia mafai ona ou mauaina faamanuiaga atoatoa o le feagaiga.” Fautua atu ia latou aveina le pepa i soo se mea e o i ai, a o latou tauivi e ausia a latou sini.

Valaaulia tamaiti e faasoa mai, po o le a le uiga ia i latou o le faitaulia faatasi ma le nuu o le feagaiga a le Alii. Atonu foi e te manao e faasoa atu ou lagona, ma molimau atu pe na faapefea ona e iloaina o le a faataunuu lava e le Alii Ana folafolaga mo Lona nuu.