Faatomuaga i Aoaoga Faavae Autu

O Aoaoga Faavae Autu nei e tatau ona faailogaina i le seminare:

Aiga Atua
Ata o le faaolataga
Togiola a Iesu Keriso
Tisipenisione, Liliuese, ma le Toefuataiga
Perofeta ma faaaliga
Perisitua ma ki o le perisitua
Sauniga ma feagaiga
Faaipoipoga ma le aiga
Poloaiga

O faiaoga e fesoasoani i tamaiti aoga ia iloa, malamalama, talitonu, faamalamalama, ma faaaoga aoaoga faavae autu nei o le talalelei ao latou suesueina tusitusiga paia. O le faia o lea o le ā fesoasoani ai e faamalosia o latou molimau ma faateleina lo latou talisapaia mo le talalelei toefuataiina ā Iesu Keriso. O le aoaoina o Aoaoga Faavae Autu o le ā fesoasoani foi i tamaiti ina ia lava tapena ai e ola i le talalelei ma aoao atu nei upumoni taua i isi. O lesona i lenei tusi lesona na mamanuina ma le manatu i Aoaoga Faavae Autu. E taua le iloa o isi aoaoga faavae taua o le talalelei o le ā toe faamamafaina i lenei tusi lesona, e ui lava e le o lisiina faatasi ma Aoaoga Faavae Autu.

O le aoaoina atu o aoaoga faavae autu o le talalelei e tupu ao e suesueina tusitusiga paia i aso taitasi ma tamaiti aoga ma ao e fesoasoani ia i latou i le taulotoina o fuaitau autu o mau. E le tatau ona e alo mai le faasologa o suesuega o tusitusiga paia e taulai atu ai i aoaoga faavae. E sili ai, lou tuuina atu o lou manatu ia i latou pea alia’e i le taimi o le kosi o aoaoga ma ao e fesoasoani i tamaiti e taulotoina mau fuaitau taua. Mo se faataitaiga, ao e aoao atu le upumoni na “lapatai mai ai perofeta e tetee i le agasala ma aoao mai le faaolataga e ala ia Iesu Keriso” i le 1 Nifae 1, atonu e te manao e faasino atu i tamaiti o le upumoni lenei e mafai ona fesoasoani ia i latou e malamalama ai i Aoaoga Faavae Autu a “perofeta ma faaaliga.” Atonu e te fesili atu i tamaiti e faamalamalama poo le ā le isi mea o latou iloa e uiga i perofeta ma faaaliga. Ma le isi, ao aoaoina e tamaiti fuaitau o mau tauloto 2 Nifae 25:23, 26, e mafai ona e fesoasoani ia latou iloa o loo faailoa mai e le fuaitau le auala e tasi e faataunuuina ai e perofeta lo latou tiute e aoao atu le faaolataga e ala ia Iesu Keriso. O le tuputupu ae i le malamalama, talitonuga, ma le ola ai i Aoaoga Faavae Autu o se faagasologa e tupu i le silia ma le fa tausaga o le seminare ma faaauau ai mo le olaga atoa o le tamaitiiti aoga.

Atonu e te manao e saunia se lisi o Aoaoga Faavae Autu mo tamaiti.

Faavasegaga o Aoaoga Faavae Autu

O se Faavasegaga o Aoaoga Faavae Autu ua mamanuina ina ia tuuina atu faamatalaga mo faiaoga e mafai ai ona latou faaaogaina ia sili atu ai le faamanuiaina o olaga o ā latou tamaiti aoga. Matou te fautua atu ia faatinoina e faiaoga lenei faavasegaga i le aluga o le vaiaso muamua o vasega ma toe faia i le latalata i le faaiuga o le tausaga. Ina ia sailia le Faavasegaga o Aoaoga Faavae Autu ma isi faavasegaga i luga o le uepisaite ā le S&I (si.lds.org), saili e ala i le faaaogaina o le uputatala assessment.

O faiaoga o e auina atu togi o faavasegaga ā ana tamaiti aoga i le Ofisa Suesue ā le S&I o lea mauaina se lipoti e fesoasoani ia i latou e fetuunai lo latou aoao atu ia sili atu ona taliina manaoga ā latou tamaiti. Mo se faataitaiga, afai e faaali mai e togi e faapea na lei malamalama tamaiti aoga i le aoaoga faavae o le salamo, e i ai nai lesona i le mataupu aoaoina o le tausaga o le ā faailoaina e ono fesoasoani i tamaiti aoga ia malamalama lelei ai i lenei aoaoga faavae. Ao faaaogaina ma le agaga tatalo e faiaoga nei faamatalaga ia latou faasologa o aoaoga o tusitusiga paia, o le ā lava tapena o tatou autalavou ma talavou matutua e ausia le Faamoemoega a Seminare ma Inisitituti o Aoaoga Faalelotu.