3 Nifae 11:1–17

Faatomuaga

Ina ua mavae le faatafunaga ma aso e tolu o le pouliuli lea na faailo mai ai le maliu o le Faaola, pe tusa ma le 2,500 tamaloloa, fafine, ma tamaiti o sa Nifae na faapotopoto i tala ane o le malumalu i le laueleele o Nuumau (tagai i le 3 Nifae 17:25). A o latou fetautalatalaa’i o le tasi ma le isi, na latou faalogoina le siufofoga o le Tama Faalelagi o faalauiloa mai Lona Alo, o Iesu Keriso, o lē na afio mai i lena lava taimi. Na valaaulia patino e Iesu Keriso ia tagata, ina ia taitasi ma molimau atu faapea na fasiotia o Ia mo agasala a le lalolagi. Sa taitasi ma ō atu ia te Ia ma tagotago i le manu’a sa i Lona itu, ma tulaga o fao i Ona lima ma vae.

Fautuaga mo le Aoaoga

3 Nifae 11:1–17

Ua faalogo sa Nifaē i le siufofoga o le Tamā o fofogaina mai le afio mai o Lona Alo

A o ulufale mai tamaiti i le vasega, ia tāina lemū se lipineo musika paia, po o le konafesi aoao—tau lava ina ia mafai ona lagonaina. Tapē le lipine pe a oo i le taimi e fai ai le tatalo amata ma le faigalotu. A mae’a le tatalo, fesili atu i tamaiti pe na latou lagonaina le lipine na tata. (Afai e lē o maua mea e faataunuu ai lenei gaoioiga, mafaufau e fai i se tamaitiiti e faitau i se leo malu le 3 Nifae 11 a o ulufale mai tamaiti aoga i totonu o le potu. Afai e te filifilia lenei faiga, o le a sili atu ona lelei le faia o tofiga i le aso i luma mai a o le’i faia le vasega, atonu i se tamaitiiti e masani lava ona vave mai.)

O le a se mea e ao i se tagata ona faia, ina ia lagona ma malamalama ai i se leo itiiti?
O le a le savali a le pese (po o le lauga o le konafesi aoao po o le mau fuaitau) lea na tātāina, a o outou ulufale mai i totonu o le potu i le asō?
Pe sa faigofie pe faigata ea ona faalogo ma malamalama i upu, a’o o mai tagata taitasi i totonu i le vasega? Aisea?

Valaaulia se tamaitiiti aoga e faitau leotele le 3 Nifae 11:1–3. Fai atu i le vasega e mulimuli i le faitauga, ma vaavaai mo mea na faigata i tagata sa Nifaē ona malamalama ai.

Na faapefea ona faamatalaina le leo i le 3 Nifae 11:3? (Atonu e te manao e fautua atu i tamaiti e faailoga le faamatalaina o le leo i totonu o a latou tusitusiga paia.)
O a aafiaga o i latou na faalogoina le leo?

Fai i tamaiti e faitau lē leoa le 3 Nifae 11:4–7 ma vaavaai mo mea na ese ona faia e sa Nifaē, ina ia mafai ai ona malamalama i le leo na latou faalogoina i le taimi lona tolu.

O a mea na ese ona faia e sa Nifaē i le taimi lona tolu na latou faalogoina ai le leo?
E tusa ma mea na e faitauina i le 3 Nifae 11:7, o ai e ona le siufofoga na faalogoina e tagata? (Na latou faalogoina le siufofoga o le Tama Faalelagi, o faalauiloa mai Lona Alo, o Iesu Keriso.)

Mafaufau e fai i tamaiti e faitau le Helamana 5:30, ma vaavaai mo se isi faamatalaga o le siufofoga o le Alii.

Na faapefea ona tutusa le leo na faalogoina e sa Nifaē, ma uunaiga tatou te maua mai le Agaga Paia? (Atonu e faaaogaina e tamaiti upu eseese, ae e tatau ona latou faailoa mai le upumoni lenei: O le Agaga Paia e masani ona talanoa mai ia i tatou e ala i o tatou faalogoga.)
Aisea e taua ai le faalogo atu i le musumusuga tatou te maua mai le Alii, e ala i le Agaga Paia?

Valaaulia tamaiti e faasoa mai aafiaga na latou mauaina, ina ua latou lagonaina le musumusuga a le Agaga Paia i o latou mafaufau ma loto. Fai atu ia i latou e faamatala mai lagona na latou faalogoina. Atonu foi e te manao e faasoa atu sou lava aafiaga.

Valaaulia se tamaitiiti e faitau le faamatalaga lenei mai ia Peresitene Boyd K. Packer o le Korama a Aposetolo e Toasefululua, e uiga i mea e manaomia ona tatou faia ina ia faalogo ma malamalama ai i le siufofoga o le Alii, e ala i le Agaga Paia:

Ata

Peresitene Boyd K. Packer

“E le fafagua e le Agaga i tatou e ala i le e’ē. E le luluina i tatou i se lima mamafa. O le Agaga e musumusu mai. E pa’i mai ma le malū, ioe, afai o pisi i tatou, o le a lē mafai lava ona tatou lagonaina.

E i ai foi taimi, o le a uunai malosi le Agaga tau lava ina ia taulai atu ai o tatou mafaufau; ae mai lo’u aafiaga, o le tele o taimi, afai tatou te lē faalogo atu i le lagona malū, afai tatou te lē faalogo faatasi ma na lagona, o le a aluese le Agaga ma faatali seia tatou saili atu ma faalogo, i la tatou amio ma faatinoga” (“How Does the Spirit Speak to Us?” New Era Fep. 2010, 3).

O le a le mataupu faavae e mafai ona tatou aoaoina mai le 3 Nifae 11:1–7 ma mai ia Peresitene Packer? (Atonu e tuuina mai e tamaiti ni tali eseese, ae ia mautinoa ua latou faailoa mai le upumoni lenei: A o tatou aoao e faalogo atu i le siufofoga o le Alii, e ala i le Agaga Paia, o le a mafai ona tatou malamalama i le fesootaiga Na te tuuina mai ia i tatou.)
O a mea e fesoasoani e saunia lou mafaufau ma lou loto, ina ia faalogo ma malamalama i musumusuga a le Agaga Paia?

3 Nifae 11:8–17

Ua faaali mai Iesu Keriso i tagata sa Nifaē ma valaaulia i latou taitoatasi ina ia tagotago i faailoga o manu’a i Ona lima, vae, ma le itu

Valaaulia se tamaitiiti aoga e faitau leotele le 3 Nifae 11:8–10. Fai atu i le vasega e mulimuli i le faitauga, ma mafaufau pe faapei pe ana latou faatasi ai ma le au sa Nifaē, i lea taimi. Faapiipii i luga le ata o Iesu o loo aoao atu i le Itulagi i Sisifo (62380; Tusi Ata o le Talalelei [2009], nu. 82), ma fesili atu:

Ata

O Iesu o loo Aoao Atu i le Itulagi i Sisifo

O a manatu ma lagona atonu o le a i ai ia te oe, pe ana faapea na e faatasi ai ma le au sa Nifaē ina ua asiasi atu le Faaola ia i latou?

Faamanatu atu i tamaiti aoga le pouliuli ma le faatafunaga na o’o i sa Nifaē, a o le i afio mai le Faaola. Ona valaaulia lea o se tamaitiiti aoga e faitau leotele le faamatalaga lenei mai ia Elder Jeffrey R. Holland o le Korama a Aposetolo e Toasefululua, e uiga i le taua o le afio atu o le Faaola i tagata sa Nifaē:

Ata

Elder Jeffrey R. Holland

“O lena faaaliga ma le tautinoga na fatuina ai le manatu autu, le taimi silisili, i le talafaasolopito atoa o le Tusi a Mamona. O le faailoaga ma le folafolaga na ta’u atu ai ma musuia ia perofeta uma o sa Nifaē mo le ono selau tausaga na muamua atu, ina ia lē tautala lava i se isi mea e uiga i o latou augatama Isaraelu ma sa Iareto mo le faitau afe o tausaga a o le’i tupu lena mea.

“Sa talanoa tagata uma e uiga ia te ia, pepese e uiga ia te ia, fai miti e uiga ia te ia, ma tatalo mo lona afio mai—ae, o lea ua i ai moni lava o ia. O le aso o aso! O le Atua, o le na te faaliliu po pogisa i taeao malamalama, ua taunuu mai” (Christ and the New Covenant: The Messianic Message of the Book of Mormon [1997], 250–51).

Faamalamalama atu i le vasega faapea, o le isi vaega o le lesona ua mamanuina e faataga ai i latou e mafaufau loloto ai i latou lava i le asiasiga a le Faaola. A o le’i amataina le vasega, sauni faatonuga ma fesili nei i luga o se pepa e tufa atu mo tamaiti aoga taitasi (pe tusi i luga o le laupapa po o se pepa lautele). Ia lava le taimi e tuu i tamaiti aoga e faitau ai le 3 Nifae 11:11–17 ma mulimuli i faatonuga o loo i luga o le pepa ua tufa atu. Fautuaina i latou e mafaufau loloto ma le faaeteete i le uiga o nei fuaiupu, a o latou suesueina.

Faitau lē leoa le 3 Nifae 11:11–12. Vaavaai mo mea na finagalo Iesu Keriso i tagata ia latou iloa e uiga ia te Ia, ma mea na Ia faia i le taimi o Lana auaunaga faaletino. Mafaufau loloto i fesili nei:
- O le fea o fetalaiga a le Faaola i totonu o le 3 Nifae 11:11 e aupito sili ona taua ia te oe? Aisea?
- O le a le uiga o le fetalaiga a le Faaola ina ua Ia faapea mai, “Ua ou inu i lena ipu oona lea na tuuina mai e le Tama ia te a’u”? Aisea e taua ai le iloa faapea o Iesu Keriso sa gaua’i gofie atu i le finagalo o le Tama Faalelagi i taimi uma?
Faitau le 3 Nifae 11:13–15, ma mafaufau loloto i fesili nei:
- O le a le mea na valaaulia e le Faaola tagata sa Nifaē ia latou faia? O le a le mea na Ia finagalo ia latou iloaina, o se taunuuga o lenei aafiaga?
- Na o atu tagata i le Faaola “taitoatasi seia oo ina latou o atu uma” (3 Nifae 11:15). Mafaufau e tusa ma le 2,500 tagata i le motu o tagata (tagai i le 3 Nifae 17:25), o le a le mea ua aoao atu e lenei tulaga ia te oe, e uiga i lagona o le Faaola mo i tatou taitoatasi?
Tali fesili nei i totonu o se api po o api talaaga mo le suesueina o tusitusiga paia:
- Aisea na finagalo ai le Alii ia “taitoatasi’ le tagata ma vaavaai ma tagotago atu ia te Ia?
- Faamata e faapefea ona aafia ai oe, i le mafai ona tagotago i manu’a na maua e le Faaola, a o togiolaina au agasala?
Fuafua e tusi le upumoni lenei i le laina i autafa o au mau i le 3 Nifae 11:11–15. Ua valaaulia au e Iesu Keriso ina ia maua sa’u molimau patino o Ia o lo’u Faaola. Tali fesili nei i totonu o se api po o api talaaga mo le suesueina o tusitusiga paia:
- O a aafiaga ua taitaiina atu ai oe i le mauaina o sau lava molimau, o Iesu Keriso o lou Faaola?
- Mata o le a se mea e te manatu e finagalo le Faaola e te faia, e faamalosia ai lau molimau e uiga ia te Ia?
- O anafea na e lagonaina ai e silafia oe e le Faaola, ma ua Ia faamanuiaina oe lava ia?

Pe a uma on tuuina atu se taimi ia lava i tamaiti e faauma ai lenei gaoioiga, valaaulia se tamaitiiti e faitau leotele le 3 Nifae 11:16–17. Fai atu i le vasega e mulimuli i le faitauga, ma vaavaai mo mea na faia e tagata ina ua mae’a ona latou maua lenei aafiaga patino faatasi ma le Faaola. Atonu e te manao e faamalamalama atu faapea o le osana o se upu Eperu e uiga i le “lavea’i mai nei” po o le “faamolemole faaola i matou” ma ua faaaogaina i tusitusiga paia uma, o se faailoaina o le viiga ma le faamanū (tagai i le Bible Dictionary, “Hosanna”; Taiala i Tusitusiga Paia, “Osana,” scriptures.lds.org).

Mata aisea na alalaga ai tagata “osana” ina ua mae’a lo latou aafiaga faatasi ma le Faaola?

Valaaulia tamaiti e toe vaavaai toto’a i le 3 Nifae 11:15. Fai i ai e faailoa mai mea na faia e tagata ina ua uma ona latou vaai ma pa’i i manu’a o le Faaola. (Na iloa mautinoa ai e tagata, pe molimau atu, o Iesu Keriso lava lea.)

Pe manaomia ea lo tatou mafai ona vaai ma tagotago i le Faaola, ia iloa ai o loo soifua o Ia? (Tagai Moronae 10:5.) E mafai faapefea ona tatou “molimau atu” e uiga ia Iesu Keriso?
E mafai faapefea ona tatou faatatauina le 3 Nifae 11:15 ia i tatou lava? O le a le mea e tatau e i tatou taitoatasi ona fai, pe a uma ona tatou mauaina se molimau ia Iesu Keriso? (Pe a tatou mauaina se molimau patino e uiga ia Iesu Keriso, o lo tatou tiutetauave le molimau atu e uiga ia te Ia.)

Faaiu le vasega e ala i le valaaulia o tamaiti e faamatala taimi na latou faasoa atu ai i isi a latou molimau ia Iesu Keriso. Pe a lava le taimi, valaaulia i latou uma o e manana’o e faia a latou molimau, e faasoa mai se molimau puupuu e uiga i le Faaola, ma atonu, e faamatala mea na latou faia na maua ai a latou molimau. Pe a lava le taimi, atonu foi e mafai ona valaaulia i latou e faasoa mai nisi o mea na latou tusia i lalo, pe na lagonaina i le taimi o la latou suesuega o le 3 Nifae 11 i le asō.

Tala ma Faamatalaga o Talaaga

3 Nifae 11:3. “O se leo itiiti”

Na faamalamalama mai e Peresitene Boyd K. Packer o le Korama a Aposetolo e Toasefululua le auala e galue ai le leo o le Agaga Paia i o tatou mafaufau ma loto:

“O le siufofoga o le Agaga e o’o mai o se lagona nai lo o se leo. O le a e iloaina, e pei ona ou iloaina, ia ‘faalogo’ atu i lena siufofoga lea e lagonaina nai lo le faalogoina. …

“O le meaalofa o le Agaga Paia, afai e te faatagaina, o le a taialaina ma puipuia oe, ma e oo lava i le faasa’oina o au amioga. O se leo o le faaleagaga e o’o mai i le mafaufau, e avea o se manatu po o se faalogoga e tuuina i totonu o lou loto.

“E le o faamoemoe faapea e te ola i lenei olaga e aunoa ma le faia o ni mea sese, ae o le a e le faia lava se mea sese matuia e aunoa ma le lapataia muamua o oe e uunaiga a le Agaga Paia” (“Fautuaga i le Autalavou,” Ensign po o le Liahona, Nov. 2011, 17–18).