Kasaysayan ng Simbahan
Canada

“Canada,” Mga Paksa sa Kasaysayan ng Simbahan

“Canada”

Canada

Bago pa man nakumpleto ang mga unang nakalathalang kopya ng Aklat ni Mormon, si Solomon Chamberlin, isang naglalakbay na mangangaral, ay binisita ang pamilya Smith malapit sa Palmyra, New York, matapos niyang marinig ang balita tungkol sa Aklat ni Mormon. Dinala ni Hyrum Smith si Chamberlin sa opisina kung saan ang aklat ay inililimbag, at hindi nagtagal ay naglakbay si Chamberlin patungong Hilagang Canada (kasalukuyang Ontario) dala ang 64 na nakalimbag na mga pahina ng Aklat ni Mormon at ipinangaral sa “lahat ng kilala [niya] ang tungkol sa Mormonismo.”1 Ang pangangaral ni Chamberlin sa Canada ang pinakaunang kilalang halimbawa ng pangangaral mula sa Aklat ni Mormon. Noong sumunod na dekada, maraming Banal sa mga Huling Araw—kabilang na sina Joseph Smith; ang kanyang ina, si Lucy; Oliver Cowdery; at anim sa mga orihinal na Labindalawang Apostol—ang naglakbay patungong Canada upang mangaral at isagawa ang gawain ng Simbahan.2

Nangangaral malapit sa Toronto noong 1836, natagpuan ni Parley P. Pratt ang isang maliit na grupo ng mga Kristiyano na naghahanap ng simbahan na may “sinaunang kasimplehan” na matatagpuan sa mga banal na kasulatan.3 Maraming miyembro ng grupo, pati na sina John at Leonora Taylor at Joseph, Mary, at Mercy Fielding, ay dagling nabinyagan, at si Pratt ay bumuo ng ilang maliliit na branch sa lugar.4 Pagkalipas ng isang taon, nang sina Apostol Heber C. Kimball at Orson Hyde ay nagsimulang mangaral sa England, sinamahan sila nina Joseph Fielding, John Goodson, Isaac Russell at John Snyder—lahat ay mga nabinyagan mula sa misyon ni Pratt sa Canada.5

Simula noong 1847, marami sa mahigit 2,000 mga Canadian na sumapi sa Simbahan ay nandayuhan sa kanlurang Estados Unidos kasama ang pinakamalaking pangkat ng mga Banal.6 Noong 1887, si Charles Ora Card, isang stake president sa Cache Valley, Utah, ay pinangunahan ang isang maliit na grupo ng mga Banal sa Lee Creek (kalaunan ay Cardston), Alberta, kung saan sila nanirahan.7 Marami sa mga unang nanirahan sa katimugang Alberta, kabilang si Card at ang kanyang asawang si Zina Young Card, ay mga miyembro ng mga pamilya na may higit sa isang asawa. Matapos ipasa ng Kongreso ng Estados Unidos ang Edmunds Act noong 1882, ang mga Banal sa mga Huling Araw ay nakipagsapalarang mamultahan at mabilanggo upang maipagpatuloy ang pamumuhay nang may higit sa isang asawa. Bunsod nito, pinili ng ilan sa mga ito na mandayuhan sa Mexico at Canada. Nag-alok ang Alberta ng kapwa oportunidad sa pangkabuhayan at isang ligtas na kanlungan mula sa mga batas ng Estados Unidos laban sa pag-aasawa nang higit sa isa, bagamat ang mga lalaking gumagawa nito ay maaari lamang magsama ng isa sa kanilang mga asawa sa Canada.8

Paglalaan ng Cardston Alberta Temple

Larawang kinuha noong Agosto 26, 1923, sa paglalaan ng Cardston Alberta Temple.

Noong mga sumunod na tatlong dekada, nandayuhan ang mga Banal sa mga Huling Araw sa katimugang Alberta nang maramihan. Noong 1895, ang unang stake na inorganisa sa labas ng Estados Unidos ay ang Cardston Alberta Stake, at noong 1923, itinayo ang unang templo sa labas ng Estados Unidos sa Cardston. Noong panahong iyon, mahigit sa 9,500 Banal sa mga Huling Araw ang nakatira sa tinatayang 20 komunidad ng mga Mormon sa Alberta.9 Sa pagtatapos ng dekada ng 1970, maraming mga stake at mission na ang naitatag sa bawat teritoryo at probinsya ng Canada.10 Ilang mamamayan na ng Canada ang nakapaglingkod bilang mga General Authority at General Officer ng Simbahan, kabilang ang mga miyembro ng Unang Panguluhan na sina Hugh B. Brown at N. Eldon Tanner at Relief Society General President Elaine L. Jack. Noong 2018, mahigit sa 195,000 miyembro ng Simbahan ang nakatira sa bansa, na may karagdagang templo na itinayo na o pinaplano para sa Toronto, Halifax, Regina, Edmonton, Montreal, Vancouver, Calgary at Winnipeg.11

Mga Tala

  1. Solomon Chamberlin autobiography, 10, Church History Library, Salt Lake City; tingnan din sa Larry C. Porter, “Solomon Chamberlain—Early Missionary,” BYU Studies, tomo 12, blg. 3 (1972), 314–18.

  2. Tingnan sa Historical Introduction to “Revelation, circa Early 1830,” josephsmithpapers.org; Stephen K. Ehat, “‘Securing’ the Prophet’s Copyright in the Book of Mormon: Historical and Legal Context for the So-called Canadian Copyright Revelations,” BYU Studies, tomo 50, blg. 2 (2011), 4–70; Eric Smith, “A Mission to Canada: DC 100,” sa Matthew McBride at James Goldberg, mga pat., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 202–7; tingnan din sa Paksa: Pag-iimprenta at Paglilimbag ng Aklat ni Mormon. Para sa mga karagdagang detalye sa naunang pangangaral sa Canada, tingnan sa Carma T. Prete, “Eastern Canada: An Early Fruitful Field, 1829–77,” sa Roy A. Prete at Carma T. Prete, mga pat., Canadian Mormons: History of The Church of Jesus Christ of Latter-day Saints in Canada (Provo, Utah: Religious Studies Center, Brigham Young University, 2017), 23–38.

  3. John Taylor, “History of John Taylor by Himself,” 7, Historian’s Office Histories of the Twelve, 1856–1861, Church History Library, Salt Lake City.

  4. John Taylor, “History of John Taylor by Himself,” 10, 12.

  5. John Taylor, “History of John Taylor by Himself,” 11; Orson F. Whitney, Life of Heber C. Kimball, an Apostle; the Father and Founder of the British Mission (Salt Lake City: Kimball Family, 1888), 123.

  6. Tingnan sa Roy A. Prete, “Rise and Progress of the Church in Canada,” sa Prete at Prete, Canadian Mormons, 1–22.

  7. Pinangunahan ni Card ang grupong sumiyasat sa katimugang Alberta noong 1886 at 1887. Matapos siyasatin ang rehiyon sa paligid ng Ilog St. Mary, lahat sila ay bumoto na “itaguyod [ang kanilang] kolonya sa sanga ng isang ilog na tinawag na Lee Creek. Donald G. Godfrey at Brigham Y. Card, mga pat., The Diaries of Charles Ora Card (Salt Lake City: University of Utah Press, 1993), 52, 54–55; tingnan din sa Rebecca J. Doig at W. Jack Stone, “The Alberta Settlement,” sa Prete at Prete, Canadian Mormons, 60–63.

  8. Tingnan sa “The Manifesto and the End of Plural Marriage,” Gospel Topics, topics.lds.org.

  9. Mayroong ilang mga debate tungkol sa bilang ng mga pamayanan na itinatag ng mga Banal sa mga Huling Araw sa kabuuan o sa bahagi sa katimugang Alberta. Tingnan sa Lynn A. Rosenvall, “The Church of Jesus Christ of Latter-day Saints in Alberta: A Historical and Geographical Perspective,” sa Dennis A. Wright, Robert C. Freeman, Andrew H. Hedges, at Matthew O. Richardson, mga pat., Regional Studies in LDS Church History: Western Canada (Provo, Utah: Department of Church History and Doctrine, Brigham Young University, 2000), 1–12; Brigham Y. Card, “Charles Ora Card and the Founding of the Mormon Settlements in Southwestern Alberta, North-West Territories,” sa Brigham Y. Card, Herbert C. Northcott, John E. Foster, Howard Palmer, at George K. Jarvis, mga pat., The Mormon Presence in Canada (Logan: Utah State University Press, 1990), 77–107; Doig at Stone, “The Alberta Settlement,” 55–99.

  10. Daniel H. Olsen, Brandon S. Plewe, at Jonathan A. Jarvis, “Historical Geography: Growth, Distribution, at Ethnicity,” sa Prete at Prete, Canadian Mormons, 108–13.

  11. “Facts and Statistics: Canada,” Mormon Newsroom, mormonnewsroom.org.