Mga Kapita-pitagang Kapulungan

Ang salitang kapita-pitagang kapulungan ay ginamit sa Lumang Tipan na naglalarawan sa mahahalagang pagtitipon ng mga tao sa panahon ng Paskua at sa Kapistahan ng mga Tabernakulo.¹ Dahil ang paglalaan ng unang templo sa Jerusalem noong naghahari si Solomon ay naganap sa panahon ng isang kapita-pitagang kapulungan, ang salitang ito ay nagkaroon din ng kaugnayan sa sinaunang paglalaan ng templo.

Mahigit isang taon nang inaasahan noon ng mga Banal sa mga Huling Araw ang pagtatayo ng isang templo nang inutusan sila ng Panginoon noong 1831 na pabanalin ang kanilang mga sarili at tumawag ng isang kapita-pitagang kapulungan ilang buwan matapos lumipat ang Simbahan mula New York papunta sa Kirtland, Ohio.² Nang napakaliit ang nagawang progreso sa pagtatayo nang sumunod na isang taon at kalahati, inulit ang utos sa dalawa pang paghahayag kay Joseph Smith. Sinabi ng Panginoon sa mga Banal na hindi nila maaaring ipagpaliban ang pagtatayo ng bahay ng Panginoon dahil kailangan nila ang kapita-pitagang kapulungan, kung saan balak ng Panginoon na ihanda ang Kanyang mga Apostol “upang pungusan ang aking ubasan sa huling pagkakataon.”³

Sa unang bahagi ng 1836, natapos ng mga Banal ang gawain sa Kirtland Temple, at inorganisa ni Joseph Smith ang mga korum ng priesthood para sa mga deacon, teacher, priest, elder, high priest, Pitumpu, Labindalawang Apostol, at Unang Panguluhan.⁴ Tinipon ni Joseph Smith ang mga Banal sa isang kapita-pitagang kapulungan noong Marso 27, at sa mga kaganapang iyon, sinang-ayunan ng iba’t ibang korum ng priesthood at ng pangkalahatang mga miyembro ang pamunuan ng Simbahan, at si Joseph ang nagbigay ng panalangin sa paglalaan ng templo. Sa panalangin, kinilala ni Joseph kung paano dininig ng mga Banal ang utos para sa isang kapita-pitagang kapulungan, at hiniling sa Panginoon na hayaan ang Kanyang kaluwalhatian na “mapasa Inyong mga tao” bilang pagpapala sa kanilang pagsunod.⁵ Ang mga Banal na dumadalo sa kapita-pitagang kapulungan ay nakaranas ng pagbuhos ng espirituwal na pagpapakita.⁶ Ang paglalaan sa pagkakataong ito ay pamamarisan sa mga kapita-pitagang kapulungan kalaunan.

Nagpatuloy ang mga kapita-pitagang kapulungan matapos ang paglalaan ng Kirtland Temple, madalas bilang mga seremonya ng paglalaan gayundin sa iba pang mahahalagang okasyon, gaya sa pagsang-ayon sa bagong Pangulo ng Simbahan o para tumanggap ng karagdagang mga paghahayag sa tuntunin ng mga banal na kasulatan.⁷ Ang mga pinuno ng Simbahan ay tumawag din ng mga kapita-pitagang kapulungan sa iba pang sagradong okasyon, kabilang ang paglalaan ng Conference Center sa taong 2000.⁸ Ang iba pang espesyal na mga miting, kapwa lokal at panglahatan, ay itinuring na mga kapita-pitagang kapulungan, at ang ilang templo ay mayroong mga silid para sa kapita-pitagang kapulungan na dinisenyo para sa ganitong mga pagtitipon.

Resources ng Simbahan

David B. Haight, “Solemn Assemblies,” Ensign, Nob. 1994, 14–17.

Gordon B. Hinckley, “This Great Millennial Year,” Ensign, Nob. 2000, 67–71.

Bibliograpiya

Ang sumusunod na lathalain ay nagbibigay ng karagdagang impormasyon tungkol sa paksang ito. Sa pagtukoy o pag-uugnay sa iyo sa sangguniang ito, hindi kami nag-eendorso o nagbibigay-garantiya sa nilalaman o mga pananaw ng awtor o may-akda.

Richard E. Turley Jr., “Solemn Assemblies,” sa Encyclopedia of Mormonism, Daniel H. Ludlow, ed., 4 vols. (New York: Macmillan, 1992), 3:1390–91.

Mga Kaugnay na Paksa: Kirtland Temple, Temple Dedications and Dedicatory Prayers

Mga Tala

1. Tingnan sa Mga Bilang 29:35; Deuteronomio 16:8.

2. “Revelation, 3 November 1831 [DC 133],” sa Revelation Book 1, 116–21, josephsmithpapers.org. Noong Oktubre 1830 nilagdaan ni Oliver Cowdery ang isang tipan para dalhin ang Aklat ni Mormon sa mga American Indian, na nagbanggit sa isang kautusan na natanggap niya para “magtayo ng isang haligi bilang saksi kung saan itatayo ang templo ng Diyos, sa maluwalhating Bagong-Jerusalem” (Oliver Cowdery, Parley P. Pratt, Ziba Peterson, at Peter Whitmer Jr., Covenant, Oct. 17, 1830, sa “Mormonism—Nos. VIII–IX,” Ohio Star [Dec. 8, 1831], 1, josephsmithpapers.org.) Tingnan din sa “Revelation, 9 December 1830 [DC 36],” sa Revelation Book 1, 48–49, josephsmithpapers.org.

3. “Revelation, 27–28 December 1832 [DC 88:1–126],” sa Revelation Book 2, 33–46, josephsmithpapers.org; “Revelation, 1 June 1833 [DC 95],” sa Revelation Book 2, 59–60, josephsmithpapers.org.

4. Joseph Smith, “Journal, 1835–1836,” 172–75, josephsmithpapers.org.

5. Joseph Smith, “Prayer of Dedication, 27 March 1836 [DC 109],” 1, josephsmithpapers.org.

6. Tingnan sa Steven C. Harper, “‘A Pentecostal and Endowment Indeed’: Six Eyewitness Accounts of the Kirtland Temple Experience,” sa John W. Welch, ed., Opening the Heavens: Accounts of Divine Manifestations, 1820–1844 (Provo, Utah: Brigham Young University Press, 2005), 327–71.

7. Tingnan, halimbawa, ang pagsang-ayon sa isang bagong Unang Panguluhan sa isang kapita-pitagang kapulungan noong Abril 2008: Dieter F. Uchtdorf, “Ang Pagsang-ayon sa mga Pinuno ng Simbahan,” Ensign o Liahona, Mayo 2008, 4–7.

8. Gordon B. Hinckley, “This Great Millennial Year,” Ensign, Nob. 2000, 67–71.