Lesson 96: Alma 39

Lesson 96

Alma 39

Pambungad

Pinagsabihan ni Alma ang nalihis niyang anak na si Corianton, na tinalikuran ang ministeryo at nakagawa ng mabigat na kasalanang seksuwal. Itinuro sa kanya ni Alma ang kabigatan ng kanyang kasalanan at ipinahayag ang kanyang kalungkutan na nakagawa si Corianton ng gayon kabigat na kasalanan. Iniutos ni Alma kay Corianton na huwag nang sundin pa ang pagnanasa ng kanyang mga mata at magsisi. (Ang ipinayo ni Alma kay Corianton tungkol sa iba pang mga bagay ay matatagpuan sa kabanata 40–42.)

Mga Mungkahi sa Pagtuturo

Alma 39:1–8

Ipinaliwanag ni Alma sa kanyang anak na si Corianton ang kabigatan ng kasalanang seksuwal

Isulat sa pisara ang sumusunod na tanong: Bakit may mga kasalanang mas mabigat kaysa sa iba?

Sabihin sa mga estudyante na tahimik na pag-isipan ang mga sagot sa tanong na ito. Sabihin na ang mga payo ni Alma na nakatala sa Alma 39 ay makatutulong sa atin na maunawaan ang kabigatan ng ilang partikular na kasalanan.

Sabihin sa mga estudyante na tingnan ang nakasulat sa bandang itaas ng heading ng kabanata 39. Ipatukoy sa kanila kung sino ang nagsasalita sa kabanatang ito at sino ang kinakausap niya (si Alma ang nagsasalita at kausap ang kanyang anak na si Corianton). Ipaliwanag na sinamahan ni Corianton ang kanyang kapatid na si Siblon at si Alma sa pangangaral ng ebanghelyo sa mga Zoramita, ngunit nakagawa siya ng kasalanan. Ipaliwanag na ang pag-unawa sa nagawang mali ni Corianton ay tutulong sa mga estudyante na mas maunawaan ang mga payo ni Alma sa kanya sa kabanatang ito at sa susunod na tatlong kabanata.

Ipabasa nang malakas sa isang estudyante ang Alma 39:1–5. Sabihin sa klase na alamin ang maling ginawa ni Corianton. (Maaaring kailangan mong ipaliwanag na ang salitang patutot sa talata 3 ay tumutukoy sa isang imoral na babae o babaeng nagbebenta ng katawan [prostitute].)

Ano ang maling ginawa ni Corianton? Alin sa kanyang mga kasalanan ang pinakamabigat? (Seksuwal na imoralidad.)
Sa mga Zoramita, ipinagmalaki ni Corianton ang kanyang lakas at karunungan (tingnan sa Alma 39:2). Sa paanong mga paraan humahantong sa mabibigat na kasalanan tulad ng seksuwal na imoralidad ang pagiging palalo o mayabang? Ano ang ilang halimbawa ngayon ng pagyayabang na humahantong sa paggawa ng mga tao ng kasalanang seksuwal? (Habang tinatalakay ng mga estudyante ang mga sagot sa tanong na ito, ipaliwanag na kapag ang tao ay nagyayabang, madalas nilang palabisin ang kanilang lakas, pati na ang kanilang kakayahang labanan ang tukso. Ang ilan sa mga halimbawa nito ngayon ay maagang pakikipagdeyt at pakikipagdeyt sa iisang tao lamang.)

Sabihin sa mga estudyante na basahin nang tahimik ang Alma 39:5 at alamin kung paano ipinaliwanag ni Alma ang kabigatan ng kasalanang seksuwal. Maaaring makatulong na ipaliwanag na ang salitang karumal-dumal ay tumutukoy sa isang bagay na makasalanan, masama, o kakila-kilabot.)

Ano ang damdamin ng Panginoon tungkol sa kasalanang seksuwal? (Sa pagsagot ng mga estudyante, tulungan sila na matukoy ang katotohanan na ang kasalanang seksuwal ay karumal-dumal sa paningin ng Panginoon.)
Sa inyong palagay, bakit ang pakikipagtalik nang hindi kasal at pangangalunya ay pumapangalawa sa pagpaslang sa kabigatan ng kasalanan?

Upang matulungan ang mga estudyante na maunawaan ang mga pamantayan at pangako ng Panginoon na may kaugnayan sa kadalisayan ng puri, ipabasa sa kanila nang tahimik ang unang dalawang talata ng bahaging may pamagat na “Kadalisayan ng Puri” sa Para sa Lakas ng mga Kabataan. Ipahanap sa kanila ang mga sagot sa sumusunod na tanong habang nagbabasa sila. (Maaari mong isulat sa pisara ang tanong. Maaari mo ring imungkahi sa mga estudyante na markahan ang mga sagot na nahanap nila sa buklet.)

Ano ang mga kabutihan ng pananatiling dalisay ang puri?

Kapag tapos nang magbasa ang mga estudyante at naibahagi na nila ang mga sagot na nahanap nila, ipabasa sa kanila nang tahimik ang natitirang bahagi ng “Kadalisayan ng Puri” at ipahanap sa kanila ang mga sagot sa sumusunod na tanong:

Anong mga pamantayan ang ibinigay ng Panginoon sa atin para mapanatiling dalisay ang puri natin?

Sabihin sa mga estudyante na isiping mabuti kung anong mensahe ang sa palagay nila ay nais ng Panginoon na matutuhan nila mula sa nabasa nila. Patotohanan ang kabigatan ng kasalanang seksuwal at ang mga pagpapalang darating sa pagiging dalisay ng puri.

Ipaliwanag na sa pagpapayo sa kanyang anak tungkol sa sensitibong isyu, ginawa ni Alma ang kanyang tungkulin bilang magulang. Sabihin sa mga estudyante na pag-isipan kung paano nila tutugunin ang mga payo ng kanilang mga magulang o lider ng Simbahan tungkol sa kadalisayan ng puri. Sabihin sa kanila na basahin nang tahimik ang Alma 39:7–8 at alamin ang layunin ni Alma sa pagtuturo kay Corianton ng tungkol sa kabigatan ng kasalanang seksuwal.

Ano ang layunin ni Alma sa pagtuturo kay Corianton ng tungkol sa kabigatan ng kanyang kasalanan? (Matulungan si Corianton nang sa gayon ay makakaharap siya sa Diyos nang walang kasalanan.)
Ano ang dapat nating gawin kapag may nagsasabi sa atin na dapat tayong magsisi?

Upang matulungan ang mga estudyante na maunawaan kung bakit ang mga magulang, tulad ni Alma, ay sasabihan ang kanilang mga anak na magsisi, basahin ang sumusunod na pahayag ni Elder D. Todd Christofferson ng Korum ng Labindalawang Apostol:

“Ang paanyayang magsisi ay nagpapakita ng pagmamahal. … Kung hindi natin aanyayahang magbago ang iba o tayo mismo ay hindi magsisisi, hindi natin nagagawa ang pangunahing obligasyon natin sa sarili at sa isa’t isa. Ang totoo, mas inaalala ng mapangunsinting magulang, ng kaibigang walang pakialam, ng takot na pinuno ng Simbahan ang kanilang sarili kaysa kapakanan at kaligayahan ng mga taong matutulungan nila. Oo, ang panawagang magsisi kung minsan ay itinuturing na hindi pagpaparaya o nakasasakit ng damdamin at maaari ngang ikagalit pa, ngunit sa patnubay ng Espiritu, ang totoo ay nagpapakita ito ng tunay na malasakit” (“Ang Banal na Kaloob na Pagsisisi,” Ensign o Liahona, Nob. 2011, 39).

Alma 39:9–19

Hinikayat ni Alma si Corianton na magsisi

Para maituro ang ipinayo ni Alma sa kanyang anak tungkol sa kung paano magsisi at bumaling sa Panginoon, isulat ang sumusunod sa pisara: Kabilang sa pagsisisi ang …

Sabihin sa ilang estudyante na magsalitan sa pagbasa nang malakas ng Alma 39:9–13. Pahintuin ang pagbabasa pagkatapos ng bawat talata para itanong sa mga estudyante ang mga sumusunod:

Alma 39:9

Ano ang ibig sabihin ng “talikuran ang iyong mga kasalanan”? (Itigil ang paggawa nito.)
Ano ang kinalaman ng mga pariralang “huwag nang sundin pa ang pagnanasa ng iyong mga mata” at “pigilin mo ang iyong sarili sa mga bagay na ito” sa pagtalikod sa kasalanan? (Maaaring makatulong na ipaliwanag na sa ating panahon, ang pariralang “pagnanasa ng iyong mga mata” ay tumutukoy sa mga imahe at libangan na malaswa sa anupamang paraan. Upang mabigyang-diin ang panganib ng pornograpiya, sabihin sa mga estudyante na basahin ang mga payo tungkol sa paksang ito sa pahina 11-12 ng Para sa Lakas ng mga Kabataan. Maaari mo ring ipaliwanag na ang ibig sabihin ng pariralang “pigilin ang iyong sarili” ay kontrolin ang sarili o supilin ang sarili; tingnan sa footnote 9b.)
Ano ang ilang paraan na makokontrol ng mga kabataang Banal sa mga Huling Araw ang kanilang sarili sa mga bagay na may kinalaman sa kadalisayan ng puri at maiwasan ang pagsunod sa pagnanasa ng kanilang mga mata? (Para matulungan ang mga estudyante na matalakay ang sagot sa tanong na ito nang mas detalyado, maaari mong ilarawan ang ilang sitwasyon na nauugnay sa kultura at mga kalagayan ng iyong mga estudyante. Halimbawa, maaari mong sabihin ang ganito: Isang dalagitang Banal sa mga Huling Araw ang nagpasiyang “pigilin ang kanyang sarili,” ngunit pagkatapos ay inanyayahan siya ng isang binatilyong hinahangaan niya sa isang di-angkop na party. Ano ang isasagot niya?)

Sabihin na ang Alma 39:9 ay isang scripture mastery passage. Maaari mong imungkahi sa mga estudyante na markahan ang scripture passage na ito sa kanilang banal na kasulatan para madali nila itong mahanap.

Alma 39:10

Paano tayo matutulungan ng paghahangad ng espirituwal na pangangalaga—maaaring mula sa mga magulang, lider ng Simbahan, kapatid, o mga mapagkakatiwalaang kaibigan—sa ating pagsisisi?

Alma 39:11

Ano ang ibig sabihin ng “huwag pahintulutan ang iyong sarili na maakay”? (Maaaring kailangan mong ipaliwanag na ang ibig sabihin ng salitang pahintulutan ay payagan.)
Ano ang ilan sa mga “walang halaga o hangal” na bagay na nakikita ninyo ngayon na umaakay sa mga tao palayo sa kabutihan?

Alma 39:12

Ano ang ibig sabihin ng tumigil sa kasamaan? (Iwasan ang kasalanan.)

Alma 39:13

Ipaliwanag na ang ibig sabihin ng pagsisisi ay “itinutuon ang puso at kalooban sa Diyos” (tingnan sa Gabay sa mga Banal na Kasulatan, “Magsisi, Pagsisisi”). Sa mga banal na kasulatan, ang pariralang “bumaling sa Panginoon” ay karaniwang nagpapahiwatig ng pagsisisi.

Ano sa inyong palagay ang ibig sabihin ng “bumaling sa Panginoon nang buo mong pag-iisip, kakayahan at lakas”?

Ipaalala sa mga estudyante na sa misyon sa mga Zoramita, ang inasal ni Coriaton ay naging dahilan para hindi maniwala ang ilang tao sa mga salita ni Alma (tingnan sa Alma 39:11).

Kapag nakaapekto ang ating mga kasalanan sa iba, ano ang dapat nating gawin bilang bahagi ng ating pagsisisi? (Aminin o ipagtapat ang ating mga pagkakamali sa mga nasaktan natin at sikaping maituwid ito.)

Isulat sa pisara ang sumusunod na katotohanan: Kabilang sa pagsisisi ang pagkilala at pagtalikod sa ating mga kasalanan at pagbaling sa Panginoon nang buo nating pag-iisip, kakayahan, at lakas. Maaari mong imungkahi na isulat ng mga estudyante ang katotohanang ito sa kanilang banal na kasulatan sa tabi ng Alma 39:13. Sabihin sa mga estudyante na magsulat sa kanilang notebook o scripture study journal ng tungkol sa nadarama nila na gusto ng Panginoon na gawin nila upang mas lubos nilang maibaling ang kanilang puso at kalooban sa Kanya.

Para mabigyang-diin ang bahagi ng Tagapagligtas sa proseso ng pagsisisi, ipabasa nang malakas sa isang estudyante ang Alma 39:15–16, 19. Ipahanap sa klase ang isang parirala na inulit nang tatlong beses sa mga talatang ito. (Ang parirala ay “masayang balita,” na maaari mong ipaliwanag na ang ibig sabihin ay “mabuting balita.”)

Anong “masayang balita” ang itinuro ni Alma sa kanyang anak? (Kabilang sa mga sagot na dapat maibigay ng mga estudyante ay ang katotohanang pumarito si Jesucristo upang alisin ang mga kasalanan ng sanlibutan. Maaari mong isulat ito sa pisara.)
Bakit ang pagparito ni Jesucristo ay mabuting balita para kay Corianton? (Kapag nasagot na ng mga estudyante ang tanong na ito, maaari mong sabihin sa kanila na nagsisi kalaunan si Corianton ng kanyang mga kasalanan at bumalik sa pagiging misyonero [tingnan sa Alma 49:30].)

Maaari mong ibahagi sa klase kung paano naging “masayang balita” para sa iyo o sa mga taong kilala mo ang mensahe ng Pagbabayad-sala ni Jesucristo. Idagdag ang iyong patotoo hinggil sa mga alituntunin na natalakay ng klase mula sa Alma 39. Hikayatin ang mga estudyante na sundin ang mga pahiwatig na pangalagaan ang kanilang kadalisayan at bumaling sa Panginoon sa pamamagitan ng pagsisisi na maaaring natanggap nila habang itinuturo ang lesson.

Scripture Mastery—Alma 39:9

Hatiin ang klase sa mga grupo na may tig-aapat o tig-lilimang estudyante. Bigyan ang bawat grupo ng isang dice at isang lapis. (Kung walang dice, maaari mong iakma ang aktibidad sa pamamagitan ng paglalagay ng anim na piraso ng papel, bawat isa sa mga ito ay sinulatan ng numerong 1 hanggang 6, sa isang sobre o iba pang lalagyan.) Kakailanganin din ng bawat estudyante ang blangkong papel. Sabihin sa bawat grupo ng mga estudyante na maupo nang magkakalapit sa palibot ng isang mesa o maupo nang pabilog. Sabihin sa kanila na buksan ang kanilang banal na kasulatan sa Alma 39:9.

Ipaliwanag na ang layunin ng aktibidad na ito ay maging unang miyembro sa grupo na maisulat nang buo ang Alma 39:9. Gayunman, dahil iisa lamang ang lapis para sa bawat grupo, isang tao lang ang makakapagsulat. Magagamit lamang ng isang estudyante ang lapis kapag numero 1 ang lumabas sa inihagis na dice.

Sabihin sa mga miyembro ng bawat grupo na magsalitan sa paghagis ng dice (o pagkuha ng isang papel sa sobre o lalagyan at pagkatapos ay ibalik ito). Kapag ang lumabas sa inihagis na dice (o ang nabunot na papel) ng isang estudyante ay numero 1, siya ang gagamit ng lapis at magsusulat, sinasabi nang malakas ang bawat salita habang isinusulat ang mga ito. Samantala, magsasalitan naman ang ibang kagrupo sa paghagis ng dice para magamit ang lapis. Kapag numero 1 ang lumabas sa paghagis sa dice ng isa pang estudyante, kukunin ng estudyanteng iyon ang lapis mula sa huling nagsulat at magsisimulang isulat ang talata sa kanyang papel habang binibigkas nang malakas ang mga salita. Ang huling nagsulat ay sasali uli sa kanyang kagrupo sa paghagis ng dice. Kapag maaari nang gumamit ang mga estudyante ng lapis at nakapagsulat na ng isang bahagi ng talata sa kanilang papel, dapat nilang basahin nang malakas ang naisulat na nila bago sila magsulat ng iba pa. (Ang paulit-ulit na pagbanggit sa scripture passage na ito ay makatutulong sa mga estudyante na maisaulo ito.) Matatapos ang aktibidad kapag naisulat ng isang estudyante mula sa bawat grupo ang buong Alma 39:9.

Sabihin sa klase na sabay-sabay na bigkasin ang talata pagkatapos ng aktibidad.

Paalala: Dahil sa nilalaman at haba ng lesson na ito, maaari mong gamitin ang aktibidad na ito sa ibang araw, kapag mas marami ang oras ninyo.

Komentaryo at Pinagmulang Impormasyon

Alma 39:3. Mga ibubunga ng kasalanang seksuwal

Tinalakay ni Elder Jeffrey R. Holland ng Korum ng Labindalawang Apostol ang kabigatan at mga ibubunga ng kasalanang seksuwal:

“Sapagkat itinuturing na napakabigat ng pisikal na intimasiya, ano ang ipinararating sa atin ng Diyos tungkol sa bahagi nito sa Kanyang plano para sa lahat ng kalalakihan at kababaihan? Sinasabi ko sa inyo na gayon nga ang ginagawa Niya—pinagtutuunan ang plano mismo ng buhay. Malinaw na ang higit Niyang inaalala hinggil sa mortalidad ay kung paano maisisilang ang isang tao sa mundong ito at kung paano lilisan ang isang tao mula rito. Nagtakda Siya ng napakahigpit na hangganan sa mga bagay na ito. …

“Ang katawan ay mahalagang bahagi ng tao. Ang katangi-tangi at napakahalagang doktrinang ito ng mga Banal sa mga Huling Araw ay nagbibigay-diin kung bakit napakabigat ng kasalanang seksuwal. Ipinahahayag namin na ang taong ginagamit ang katawan ng iba na ibinigay ng Diyos nang walang basbas ng kasal ay inaabuso mismo ang kaluluwa ng taong iyon, nilalapastangan ang pangunahing layunin at pinagmumulan ng buhay, ‘ang mismong susi’ sa buhay, tulad ng tawag dito ni Pangulong Boyd K. Packer [tingnan sa Ensign, Hulyo 1972, 113]. Sa pagsasamantala sa katawan ng iba—na ibig sabihin ay pagsasamantala sa kanyang kaluluwa—nilalapastangan at hindi pinahahalagahan ng taong nagsamantala ang Pagbabayad-sala ni Cristo, na nagligtas sa kaluluwang iyon at nagawang posible na matamo ang kaloob na buhay na walang hanggan. At kapag kinutya ng isang tao ang Anak ng Kabutihan, mapaparoon siya sa isang lugar na mainit na mas mainit pa kaysa sa init ng araw sa katanghaliang tapat. Tiyak na masusunog ka kapag ginawa mo ito.

“Huwag sana ninyong sabihing: ‘Sino ang sinasaktan nito? Bakit hindi maaari ang kaunting kalayaan? Maaari akong lumabag ngayon at magsisi kalaunan.’ Mangyaring huwag maging hangal at walang habag. Hindi mo ‘maipapakong muli si Cristo’ nang hindi ka napaparusahan. [Tingnan sa Mga Hebreo 6:6.] ‘Magsitakas kayo sa pakikiapid’ ang sabi ni Pablo [tingnan sa I Mga Taga Corinto 6:18], at tumakas sa ‘anumang bagay tulad nito,’ ang idinagdag ng Doktrina at mga Tipan [tingnan sa D at T 59:6; idinagdag ang pagbibigay-diin]. Bakit? Ang isang dahilan ay ang di-matatawarang pagdurusa sa katawan at espiritu na dinanas ng Tagapagligtas ng mundo upang tayo ay makatakas [tingnan lalo na sa D at T 19:15–20]. Utang natin iyon sa Kanya. Sa katunayan, utang natin ang lahat sa Kanya. ‘Hindi kayo sa inyong sarili,’ sabi ni Pablo. ‘Sapagka’t kayo’y binili sa halaga: luwalhatiin nga ninyo ng inyong katawan ang Dios.’ [I Mga Taga Corinto 6:19–20; idinagdag ang pagbibigay-diin; tingnan din sa t. 13–18.] Sa kasalanang seksuwal ang tao ay nanganganib—ang katawan at ang espiritu. …

“Kung tungkol sa pisikal na intimasiya, kailangan kayong maghintay! Kailangan kayong maghintay hanggang sa maaari na ninyong ibigay ang lahat-lahat, at hindi ninyo maibibigay ang lahat hangga’t hindi kayo legal na naikasal at nang naaayon sa batas. Ang ibigay ang yaong hindi naman sa inyo at wala kayong karapatang ibigay (tandaan, ‘hindi kayo sa inyong sarili’) at ang ibigay lamang ang bahagi ninyo, gayong hindi naman ninyo maibibigay ang buong sarili ninyo ay pagwasak sa inyong sarili, tulad ng larong Russian roulette. Kung mapilit kayo sa paghahangad ng pisikal na kasiyahan nang walang pagsang-ayon mula sa langit, malamang na mapinsala ang inyong espiritu, isipan at damdamin na magpapahina kapwa sa inyong paghahangad sa pisikal na intimasiya at sa inyong kakayahan na magmahal nang buong-puso sa isang tunay na magmamahal sa dakong huli. Magigimbal kayo kapag natuklasan ninyo na ang bagay na dapat sana ay iningatan ninyo ay wala na at na tanging ang awa ng Diyos ang makapagsasauli sa banal na katangian na ipinamigay ninyo nang gayon na lamang. Sa araw ng inyong kasal ang pinakamainam na regalo na maibibigay ninyo sa inyong asawa na makakasama ninyo sa kawalang-hanggan ay ang inyong sarili mismo—malinis at dalisay at karapat-dapat din naman sa gayon ding kadalisayan” (“Personal Purity,” Ensign, Nob. 1998, 76–77).

Alma 39:6. Ano ang kasalanang walang kapatawaran?

Ipinaliwanag ni Propetang Joseph Smith ang tungkol sa kasalanang walang kapatawaran:

“Lahat ng mga kasalanan ay patatawarin, maliban sa kasalanan laban sa Espiritu Santo; sapagkat ililigtas ni Jesus ang lahat maliban sa mga anak na lalaki ng kapahamakan. Ano ang kailangang gawin ng isang tao upang magawa ang kasalanang walang kapatawaran? Kailangan niyang tanggapin ang Espiritu Santo, mabuksan sa kanya ang kalangitan, at makilala ang Diyos, at pagkatapos ay magkasala laban sa kanya. Matapos magkasala ang isang tao laban sa Espiritu Santo, wala nang pagsisisi sa kanya. Sasabihin na niya na hindi sumisikat ang araw habang nakikita niya ito; itatatwa na niya si Jesucristo kahit nabuksan na sa kanya ang kalangitan, at itatatwa ang plano ng kaligtasan habang nakadilat ang kanyang mga mata sa katotohanan nito; at simula sa oras na iyon siya ay isa nang kaaway. Iyan ang nangyari sa maraming tumalikod sa katotohanan ng Ang Simbahan ni Jesucristo ng mga Banal sa mga Huling Araw” (sa History of the Church, 6:314).

Ang isang taong tumanggap ng patotoo ng Espiritu Santo at pagkatapos ay nag-apostasiya o naging di-gaanong aktibo sa Simbahan ay hindi nakagawa ng kasalanang walang kapatawaran.

Alma 39:13. Pagsisisi: “muling [pagbaling] sa Diyos”

Inilarawan ni Elder Neil L. Andersen ng Korum ng Labindalawang Apostol ang pagsisisi bilang pagbaling o pagbalik sa Diyos:

“Kapag nagkakasala tayo, tumatalikod tayo sa Diyos. Kapag nagsisisi tayo, muli tayong bumabaling sa Diyos.

“Ang imbitasyong magsisi ay bihirang maging tinig ng pagpaparusa, sa halip ito ay mapagmahal na pagsamong pumihit at ‘muling bumaling’ sa Diyos” (“Magsisi … Upang Mapagaling Ko Kayo,” Ensign o Liahona, Nob 2009, 40).

Alma 39:15. Aalisin ni Jesucristo ang mga kasalanan ng sanlibutan

Ipinaliwanag ni Elder D. Todd Christofferson ng Korum ng Labindalawang Apostol kung paano natin matatamo ang mga pagpapala ng Pagbabayad-sala:

“Tanging sa pagsisisi lamang mas bumubuti ang buhay. At, mangyari pa, sa pamamagitan lamang ng pagsisisi natin nakakamtan ang biyaya ng pagbabayad-sala ni Jesucristo at ang kaligtasan. Ang pagsisisi ay isang banal na kaloob, at dapat ay may ngiti sa ating mukha kapag pinag-uusapan natin ito. Inaakay tayo nito patungo sa kalayaan, pagkakaroon ng tiwala, at kapayapaan. Sa halip na pigilin ang pagsasaya, tunay na kaligayahan ang dulot ng kaloob na pagsisisi.

“Posible lamang ang pagsisisi dahil sa Pagbabayad-sala ni Jesucristo. Ang Kanyang walang-hanggang sakripisyo ang ‘nagbibigay ng daan sa mga tao upang sila ay magkaroon ng pananampalataya tungo sa pagsisisi’ (Alma 34:15). Ang pagsisisi ay kinakailangan, at ang biyaya ni Cristo ang kapangyarihan kung saan ‘mabibigyang-kasiyahan ng awa ang hinihingi ng katarungan’ (Alma 34:16). …

“… Kinakailangan sa pagsisisi ang tapat na layunin at kahandaang patuloy na magsikap na madaig ang kasalanan, kahit mahirap. Ang pagtatala ng mga hakbang sa pagsisisi ay maaaring makatulong sa iba, ngunit maaari ding humantong sa pagsisising walang tunay na hangarin o pagbabago. Ang tunay na pagsisisi ay hindi paimbabaw. Dalawang mahalagang bagay ang hinihingi ng Panginoon: ‘Sa pamamagitan nito inyong malalaman kung ang isang tao ay nagsisi ng kanyang mga kasalanan—masdan, kanyang aaminin ang mga yaon at tatalikdan ang mga yaon’ (D at T 58:43)” (“Ang Banal na Kaloob na Pagsisisi,” Ensign o Liahona, Nob. 2011, 38, 40).