Lesson 144: Eter 2

Lesson 144

Eter 2

Pambungad

Pagkatapos umalis mula sa Tore ng Babel, si Jared at ang kanyang kapatid at kanilang mga pamilya at kaibigan ay ginabayan ng Panginoon patungo sa ilang. Iniutos ng Panginoon sa kapatid ni Jared na gumawa ng walong gabara upang maitawid ang kanyang mga tao sa karagatan patungo sa lupang pangako. Sa pagsunod ng kapatid ni Jared at ng kanyang mga tao sa Panginoon nang may pananampalataya, sila ay ginabayan at pinatnubayan ng Panginoon para maging matagumpay sa kanilang paglalakbay.

Mga Mungkahi sa Pagtuturo

Eter 2:1–12

Sinimulan ng mga Jaredita ang kanilang paglalakbay patungo sa lupang pangako

Upang matulungan ang mga estudyante na makita kung paanong ang pagsunod sa mga utos na tinatanggap natin mula sa Diyos ay maghahanda sa atin na makatanggap pa ng gabay at patnubay mula sa Kanya, gawin ang sumusunod na aktibidad:

Bago magklase, itago ang isang bagay na sumasagisag sa isang kayamanan sa silid kung saan kayo nagkaklase. Maghanda ng tatlo o apat na clue na gagabay sa mga estudyante sa paghanap sa kayamanan. Ibibigay mo ang unang clue sa mga estudyante. Ang clue na iyan ay hahantong sa isa pang clue, na hahantong din sa isa pang clue, at tuluy-tuloy hanggang mahanap ng mga estudyante ang kayamanan. Matapos mahanap ng mga estudyante ang kayamanan, itanong:

Ano kaya ang mangyayari kung hindi ninyo pinansin ang unang clue? (Hindi nila mahahanap ang pangalawang clue.)

Sabihin sa mga estudyante na basahing muli nang tahimik ang Eter 1:41–42 at alamin ang unang mga iniutos ng Panginoon para magabayan ang mga Jaredita patungo sa lupang pangako.

Para matulungan ang mga estudyante na makita kung paano tumugon ang mga Jaredita sa mga utos na ito, ipabasa nang malakas sa isang estudyante ang Eter 2:1–3.

Paano tumugon ang mga Jaredita sa mga unang iniutos ng Panginoon?

Ipabasa nang malakas sa isang estudyante ang Eter 2:4–6. Sabihin sa klase na tahimik na sumabay sa pagbasa, na inaalam ang mga pagpapalang natanggap ng mga Jaredita matapos nilang sundin ang mga unang iniutos sa kanila.

Ano ang nangyari matapos sundin ng mga Jaredita ang mga unang iniutos ng Panginoon? (Binigyan sila ng Panginoon ng karagdagang tagubilin sa pamamagitan ng kapatid ni Jared.)
Ano ang matututuhan natin sa talang ito tungkol sa pagtanggap ng paggabay mula sa Panginoon? (Iba-ba man ang gamiting salita ng mga estudyante, dapat makita sa kanilang mga sagot ang sumusunod na alituntunin: Kapag kumilos tayo nang may pananampalataya sa patnubay na ibinigay sa atin ng Panginoon, makatatanggap tayo ng karagdagang gabay mula sa Kanya. Maaari mong imungkahi sa mga estudyante na isulat ang katotohanang ito sa kanilang banal na kasulatan sa tabi ng Eter 2:6.)

Upang matulungan ang mga estudyante na mas maunawaan at maipamuhay ang alituntuning ito, sabihin sa kanila na mag-isip ng isang impresyon o pahiwatig na natanggap nila kamakailan mula sa Panginoon. Pagkatapos ay basahin ang sumusunod na pahayag ni Elder Richard G. Scott ng Korum ng Labindalawang Apostol tungkol sa kung gaano tayo kadalas tumatanggap ng paghahayag:

“Unti-unti itong darating, [nang pira-piraso], upang maragdagan ang inyong kakayahan. Habang sinusunod ninyo ang bawat piraso nang may pananampalataya, maaakay kayo sa iba pang mga bahagi hanggang mapasainyo ang buong kasagutan. Kailangan ninyo ritong sumampalataya sa kakayahan ng ating Ama na tumugon. Bagamat napakahirap nito kung minsan, nagbubunga ito ng malaking pag-unlad ng sarili” (“Paggamit sa Kaloob ng Langit na Panalangin,” Ensign o Liahona, Mayo 2007, 9).

Sabihin sa mga estudyante na sagutin ang mga sumusunod na tanong sa notebook o scripture study journal. Maaari mong isulat ang mga ito sa pisara o basahin nang dahan-dahan ang mga ito para maisulat ng mga estudyante.

Kailan ninyo sinunod ang isang espirituwal na pahiwatig at pagkatapos ay nakatanggap ng karagdagang patnubay mula sa Diyos?
Sa inyong palagay, bakit kailangan natin kung minsan na sumunod sa espirituwal na pahiwatig bago tayo makatanggap ng karagdagang paghahayag?

Ibuod ang Eter 2:8–12 na ipinapaliwanag na sinabi ng Panginoon sa kapatid ni Jared na kapag dumating na ang mga Jaredita sa lupang pangako, kailangan nilang “magsilbi sa kanya, ang tunay at tanging Diyos” (Eter 2:8) kung nais nilang maging isang dakilang bansa na ipinangako Niya na kahihinatnan nila. Kung hindi nila Siya paglilingkuran, sila ay “lilipulin” sa lupain (Eter 2:8–10). Sinabi ni Moroni na ito ay “walang hanggang utos” (Eter 2:10), ibig sabihin ay iniuutos ito sa lahat ng maninirahan sa lupaing iyan.

Eter 2:13–15

Pinagsabihan ng Panginoon ang kapatid ni Jared dahil hindi ito nanalangin sa Kanya

Sabihin sa mga estudyante na basahin nang tahimik ang Eter 2:13–15 at alamin ang ginawa ng mga Jaredita nang marating nila ang tabing-dagat.

Ano ang ginawa ng mga Jaredita? (Itinayo nila ang kanilang mga tolda at nanirahan sa tabing dagat nang apat na taon.)
Bakit pinagsabihan ng Panginoon ang kapatid ni Jared?
Anong mga aral ang matututuhan natin mula sa Eter 2:14? (Maaaring makatukoy ng iba-ibang katotohanan ang mga estudyante, kabilang ang sumusunod: Gusto ng Panginoon na manalangin tayo sa Kanya nang regular; hindi nalulugod ang Panginoon kapag hindi tayo nananalangin sa Kanya; at ang Espiritu ay hindi mapapasaatin kung nakagawa tayo ng kasalanan.)

Sabihin sa mga estudyante na isipin ang personal nilang panalangin habang binabasa mo ang sumusunod na pahayag ni Elder Donald L. Staheli ng Pitumpu:

“Mahalaga sa ating buhay ang taimtim na pananalangin araw-araw na humihingi ng kapatawaran at espesyal na tulong at patnubay sa ating buhay at sa pangangalaga ng ating patotoo. Kapag nagmamadali tayo, paulit-ulit, di naghahanda, o nakalilimot sa ating mga panalangin, nawawala sa atin ang paglapit ng Espiritu, na napakahalaga sa patuloy na patnubay na kailangan natin upang tagumpay na mapangasiwaan ang mga hamon sa ating araw-araw na pamumuhay” (“Pagkakaroon ng Ating Patotoo,” Ensign o Liahona, Nob. 2004, 39).

Isulat sa pisara ang mga sumusunod na tanong bago magklase. (O maaari mong gawin itong handout o basahin nang dahan-dahan ang mga ito para maisulat ng mga estudyante.) Bigyan ang mga estudyante ng dalawa o tatlong minuto para maisulat sa notebook o scripture study journal ang maikling sagot sa mga tanong na ito.

Ano ang nadarama mo tungkol sa dalas ng iyong personal na panalangin?

Ano ang nadarama mo tungkol sa pagiging taos-puso ng iyong personal na panalangin?

Sa iyong mga personal na panalangin, sa pakiramdam mo ba ay talagang nakikipag-usap ka sa Ama sa Langit? Bakit oo o bakit hindi?

Kung mayroon kang isang babaguhin para maging mas taimtim at taos-puso ang iyong mga panalangin, ano ito?

Eter 2:16–25 (tingnan din sa Eter 3:1–6; 6:4–9)

Gumawa ang mga Jaredita ng mga gabara para tawirin ang karagatan patungo sa lupang pangako

Sabihin sa mga estudyante na isipin ang isang pagsubok na nararanasan nila o isang mahalagang desisyon na kailangan nilang gawin, ngayon o sa hinaharap. Halimbawa, maaari nilang isipin ang tungkol sa mahirap na kalagayan ng pamilya, mga problema sa paaralan, pagpapasya kung sino ang pakakasalan, o pagpili ng kursong pag-aaralan. Sabihin sa kanila na isiping mabuti kung paano sila mapapatnubayan o matutulungan ng Panginoon. Sa pag-aaral nila ng natitirang bahagi ng Eter 2, hikayatin sila na alamin ang mga alituntunin na makatutulong sa kanila na matanggap ang tulong ng Panginoon sa paggawa ng mabubuting desisyon.

Ipabasa nang malakas sa isang estudyante ang Eter 2:16–17. Sabihin sa klase na tahimik na sumabay sa pagbasa at alamin ang ipinagawa ng Panginoon sa mga Jaredita upang makarating sa lupang pangako. Kapag natapos nang magbasa ang estudyante, magtanong kung sino ang gustong pumunta sa pisara at mabilis na idrowing kung ano sa palagay niya ang hitsura ng mga gabara ng mga Jaredita.

Isulat sa pisara ang sumusunod na chart nang hindi isinasama ang mga sagot sa tatlong hanay [row] sa ibaba. Ibigay ang chart bilang handout o sabihin sa mga estudyante na kopyahin ito sa notebook o scripture study journal.

Eter 2:18–19	Eter 2:20–25; 3:1–6; 6:4–9
Problema sa mga gabara	Solusyon	Ang ginawa ng Panginoon	Ang ginawa ng kapatid ni Jared
Walang hangin	Gumawa ng mga butas na mabubuksan at masasara sa ibabaw at ilalim ng mga gabara	Binigyan ng mga tagubilin ang kapatid ni Jared	Gumawa ng mga butas
Walang timon	Hihipan ng hangin ang mga gabara patungo sa lupang pangako	Pinalakas ang ihip ng hangin	Nagtiwala sa Panginoon
Walang liwanag	Naghanda ng mga espesyal na bato at hiniling sa Panginoon na hipuin ang mga ito para kuminang ang mga ito	Pinayuhan ang kapatid ni Jared tungkol sa mga bagay na hindi magiging epektibo at pinayuhan siya na maghanap ng solusyon na magiging epektibo Hinipo ang mga bato matapos maihanda ang mga ito ng kapatid ni Jared	Inihanda ang mga bato at hiniling sa Panginoon na hipuin ang mga ito para kuminang ang mga ito sa kadiliman

Sabihin sa mga estudyante na basahing mabuti ang Eter 2:18–19 para mahanap ang tatlong problema na napansin ng kapatid ni Jared sa mga gabara.

Ano ang mga problemang napansin ng kapatid ni Jared? (Isulat ang mga sagot ng mga estudyante sa unang column ng chart, tulad ng makikita. Hikayatin sila na gayon din ang gawin sa mga kopya nila ng chart.)

Matapos matukoy ng mga estudyante ang mga problema, sabihin sa kanila na pag-aralan ang Eter 2:20–25; 3:1–6; 6:4–9. (Paalala: Ang mga scripture passage sa Eter 3 at 6 ay tatalakayin nang mas detalyado sa lesson 145 at 147.) Bigyan sila ng oras na makumpleto nang mag-isa ang natitirang bahagi ng chart.

Matapos ang sapat na oras na makumpleto ng mga estudyante ang chart, itanong ang mga sumusunod upang matulungan sila na matukoy ang mga alituntunin mula sa karanasan ng kapatid ni Jared:

Batay sa solusyon sa problema tungkol sa hangin, paano tayo kung minsan tinutulungan ng Panginoon na malutas ang ating mga problema o sinasagot ang ating mga tanong? (Kung minsan sinasabi sa atin ng Panginoon kung paano lutasin ang isang problema at inaasahan Niya na susundin natin ang Kanyang mga tagubilin.)
Batay sa solusyon sa problema tungkol sa timon, paano tayo kung minsan tinutulungan ng Panginoon na malutas ang ating mga problema o sinasagot ang ating mga tanong? (Kung minsan ang Panginoon mismo ang lumulutas ng problema.)
Batay sa solusyon sa problema tungkol sa liwanag, paano tayo kung minsan tinutulungan ng Panginoon na malutas ang ating mga problema o sinasagot ang ating mga tanong? (Kung minsan iniuutos sa atin ng Panginoon na mag-isip ng solusyon sa problema at hingin ang Kanyang pagsang-ayon at tulong sa pagsasakatuparan nito.)

Isulat sa pisara ang sumusunod na alituntunin: Kapag nananalangin tayo sa Panginoon at ginagawa ang ating bahagi sa paglutas ng ating mga problema, matatanggap natin ang tulong ng Panginoon. Para matulungan ang mga estudyante na maipamuhay ang alituntuning ito, sabihin sa kanila na isaalang-alang ang mahalagang desisyong naisip nila nitong nakalipas na ilang minuto. Pagkatapos ay sabihin sa kanila na pag-isipang mabuti ang mga sumusunod na tanong:

Ano sa palagay ninyo ang inaasahan ng Panginoon na gawin ninyo sa paggawa ng desisyong ito?
Ano ang maaaring gawin ng Panginoon upang matulungan kayo?
Paano ninyo maipapakita ang inyong pagtitiwala sa Panginoon kapag naiisip ninyo ang desisyong ito?

Bigyan ng ilang minuto ang mga estudyante na maisulat ang natutuhan nila ngayon. Magpatotoo na kapag nanalangin tayo nang taos-puso sa Panginoon at gagawin ang ating bahagi para malutas ang ating mga problema, gagabayan at tutulungan Niya tayo ayon sa Kanyang karunungan at kapangyarihan.

Komentaryo at Pinagmulang Impormasyon

Eter 2:4–5. Mga sagot sa mga panalangin

Itinuro ni Elder Richard G. Scott ng Korum ng Labindalawang Apostol:

“Napakahalagang malaman na may pangatlong paraan ang Panginoon sa pagsagot sa panalangin, ito ay ang hindi pagbibigay ng sagot kapag isinamo ang panalangin. Bakit Niya gagawin iyon?

“Siya ang ating perpektong Ama. Mahal Niya tayo nang higit pa sa kaya nating unawain. Alam Niya ang pinakamainam para sa atin. Nakikita Niya ang katapusan mula sa simula. Nais Niya tayong kumilos para magtamo ng kinakailangang karanasan:

“Kapag sumagot Siya ng oo, iyon ay para bigyan tayo ng tiwala sa sarili.

“Kapag sumagot Siya ng hindi, iyon ay para maiwasan nating magkali.

“Kapag hindi [Siya] nagbigay ng sagot, iyon ay para palakasin tayo sa pamamagitan ng pananampalataya sa Kanya, pagsunod sa Kanyang mga kautusan, at kahandaang kumilos ayon sa katotohanan. Inaasahang mananagot tayo sa pagkilos ayon sa pasiya na naaayon sa Kanyang mga turo nang walang paunang kumpirmasyon. Hindi tayo dapat maupo at maghintay na lang o bumulung-bulong dahil hindi nangusap ang Panginoon. Dapat tayong kumilos.

“Kadalasan ang naipasiya nating gawin ay tama. Pagtitibayin Niya ang katumpakan ng ating mga pasiya sa Kanyang paraan. Ang pagpapatibay na iyon ay karaniwang dumarating sa pamamagitan ng mga mumunting tulong na natatamo habang isinasagawa ito. Natutuklasan natin ang mga ito sa pagiging espirituwal. Parang maiikling mensahe ito mula sa mapagmahal na Ama bilang katibayan ng Kanyang pagsang-ayon” (“Learning to Recognize Answers to Prayer,” Ensign, Nob. 1989, 31–32).

Eter 2:14–15. Ang pagkastigo ng Panginoon ay nagpapakita ng pagmamahal

Tinukoy ang Eter 2:14–15, namangha si Elder Jeffrey R. Holland ng Korum ng Labindalawang Apostol sa tatag ng pagkatao ng kapatid ni Jared at sa magiliw na pagpapatawad ng Diyos:

“Mahirap mailarawan sa isip kung ano kaya ang pakiramdam ng tatlong oras na pagkastigo mula sa Panginoon, ngunit tiniis ito ng kapatid ni Jared. Kaagad na nagsisi at nanalangin, ang propetang ito ay humingi ng patnubay para sa paglalakbay na iniutos sa kanila at sa mga taong gagawa nito. Tinanggap ng Diyos ang kanyang pagsisisi at buong pagmamahal na nagbigay pa ng tagubilin para sa napakahalaga nilang misyon” (Christ and the New Covenant: The Messianic Message of the Book of Mormon [1997], 15).

Sa pamamagitan ni Propetang Joseph Smith, itinuro ng Panginoon, “Ang aking minamahal ay akin ding pinarurusahan upang ang kanilang mga kasalanan ay mapatawad, sapagkat kasama sa pagpaparusa ay aking inihahanda ang daan para sa kanilang ikaliligtas sa lahat ng bagay mula sa tukso, at akin kayong minahal” (D at T 95:1).

Eter 2:22–23. Ang panalangin ay sinasamahan ng pagsisikap

Maraming tao ang nagsasabi na dapat tayong manalangin na para bang ang lahat ng bagay ay nakasalalay sa Panginoon at kumilos na para bang ang lahat ng bagay ay nakasalalay sa atin. Sinabi ni Elder Russell M. Nelson ng Korum ng Labindalawang Apostol na madalas niyang marinig si Pangulong Gordon B. Hinckley na nagsasabing, “Hindi ko alam kung paano gawin ang anumang bagay maliban sa pagluhod at pagsamo ng tulong at pagkatapos ay tatayo sa pagkakaluhod at kikilos” (“Spiritual Capacity,” Ensign, Nob. 1997, 16).

Karagdagang Ideya sa Pagtuturo

Eter 2:8–12. “Anumang bansa ang mag-aangkin [ng lupang pangako] ay magsisilbi sa Diyos, o sila ay lilipulin”

Isulat ang lupang pangako sa pisara. Itanong sa mga estudyante kung bakit sa palagay nila nagiging “lupang pangako” ang isang lugar. Maaaring isagot nila na ang lupang pangako ay isang lugar na inihanda ng Diyos para sa isang grupo ng mga tao. Nangangako ang Diyos sa mga tao na maglalakbay patungo sa lupaing iyon at maninirahan kalaunan doon. Tulungan ang mga estudyante na maunawaan na bagama’t totoo ito, ipinaliwanag ni Moroni na nagtakda ang Diyos ng mga kundisyon upang matanggap ng mga tao ang mga pagpapala ng Kanyang mga pangako.

Isulat sa pisara ang sumusunod na chart, pero huwag isama ang mga sagot sa pangalawang hanay [row]. Sabihin sa mga estudyante na basahing mabuti ang Eter 2:8–12 para mahanap ang impormasyon na isusulat sa bawat kahon.

Mga pangako ng Diyos sa mga Jaredita

Mga inaasahan ng Diyos sa mga Jaredita

Ibibigay Niya sa kanila ang lupain bilang isang lupang pangako.

Sila ay malaya mula sa pagkaalipin at pagkabihag at mula sa lahat ng iba pang mga bansa.

Dapat nilang paglingkuran si Jesucristo, “ang Diyos ng lupain” (Eter 2:12).

Dapat silang magsisi ng kanilang mga kasamaan.

Matapos makumpleto ng mga estudyante ang chart, itanong:

Ano ang sinabi ni Moroni na mangyayari sa mga tao kung hindi nila gagawin ang inaasahan ng Diyos sa kanila? (Maaaring kailangan mong ipaliwanag na ang ibig sabihin ng pariralang “lilipulin” ay papalisin o masasawi.)

Ipaliwanag na kalaunan sa Aklat ni Mormon, nakita natin na ang mga Jaredita at mga Nephita ay “nalipol” sa lupang pangako dahil hindi nila pinaglingkuran ang Panginoon. Tulad ng itinuro ni Pangulong Ezra Taft Benson, ang mga pangako at mga babalang ito ay para rin sa mga tao na kasalukuyang naninirahan sa Hilaga at Timog Amerika:

“Ang lupaing ito na inilaan ay nasa ilalim ng walang hanggang kautusan ng Diyos. Ang kautusang iyan ay nakatala sa sagradong Aklat ni Mormon, isang bagong saksi kay Cristo, sa mga salitang ito:

“‘Sapagkat masdan, ito ay lupaing pinili sa lahat ng ibang lupain; kaya nga, siya na mag-aangkin nito ay magsisilbi sa Diyos o malilipol; sapagkat ito ang walang hanggang utos ng Diyos. …

“‘Masdan, ito ay piling lupain, at anumang bansa ang mag-aangkin nito ay magiging malaya mula sa pagkaalipin, at sa pagkabihag, at sa lahat ng ibang bansa sa silong ng langit, kung pagsisilbihan lamang nila ang Diyos ng lupain, na si Jesucristo’ (Eter 2:10, 12).

“Ang makasaysayang tadhana ng Amerika ay inihayag din sa mga propeta ng Diyos. Kay Joseph Smith inihayag ng Panginoon na ‘ang buong Amerika ay Sion mismo mula hilaga hanggang timog’ (Teachings of the Prophet Joseph Smith, sel. Joseph Fielding Smith, Salt Lake City: Deseret Book Company, 1938, p. 362). Bukod pa rito, inihayag din ng Panginoon na ang lupaing ito ‘ang lugar ng Bagong Jerusalem, na bababa mula sa langit, … ang banal na santuwaryo ng Panginoon’ (Eter 13:3). Upang maisakatuparan ang mga walang hanggang layunin ng Diyos at maihanda ang lupaing ito para sa Sion, ‘itinatag [ng Diyos] ang Saligang-batas ng lupaing ito, sa pamamagitan ng kamay ng matatalinong tao na [Kanyang] ibinangon … at tinubos ang lupain sa pamamagitan ng pagdanak ng dugo’ (D at T 101:80). …

“… Hindi naunawaan ng napakaraming mamamayan ng Amerika na ang Diyos ang pinagmumulan ng ating kalayaan—ang Tagapagbigay ng batas—at ang kabutihan ng bawat isa ang pinakamahalaga para mapangalagaan ang ating kalayaan” (“A Witness and a Warning,” Ensign, Nob. 1979, 31, 33).

Sa paanong mga paraan nagagamit sa ating buhay ang mga pangako at babala sa Eter 2:8–12? (Sa pagsagot ng mga estudyante sa tanong na ito, tulungan silang matukoy ang sumusunod na alituntunin: Kung magsisisi at maglilingkod tayo sa Panginoon, tayo ay magiging malaya sa pagkaalipin sa kasamaan.)

Upang matulungan ang mga estudyante na mas maunawaan kung paano maiaangkop ang katotohanang ito sa kanila, basahin ang sumusunod na pahayag ni Elder Robert D. Hales ng Korum ng Labindalawang Apostol:

“Ang kapalaran ng [mga Jaredita at mga Nephita], tulad ng nakatala sa banal na kasulatan, ay patotoo sa buong mundo: kung wala sa atin ang salita ng Diyos o hindi nanangan at nakinig sa salita ng Diyos, maling landas ang tatahakin natin at maliligaw tayo bilang indibiduwal, mga pamilya, at bansa” (“Mga Banal na Kasulatan: Ang Kapangyarihan ng Diyos sa Ating Ikaliligtas,” Ensign o Liahona, Nob. 2006, 26).

Bigyan ng oras ang mga estudyante na maisulat kung ano ang maaari nilang gawin para mamuhay ayon sa alituntuning ito at kung paano nila hihikayatin ang mga kapamilya at kaibigan nila na gawin din ito.