Jeremiya
Ngumphrofethi waseTestamenteni eliDala owazalelwa emndenini wobuphristi futhi nowaphrofetha kwaJuda kusuka eminyakeni engamakhulu ayisithupha namashumi amabili nesithupha kuya kwengamakhulu amahlanu namashumi ayisishiyagalombili nesithupha ngaphambi kukaKristu. Wayephila maduzane nesikhathi sabanye abaphrofethi abakhulu: uLehi, uHezekiya, uHoseya, kanye noDaniyeli.
UJeremiya wagcotshwa ukuba abe ngumphrofethi empilweni eyandulela eyasemhlabeni (Jer. 1:4–5). Ngesikhathi seminyaka yakhe cishe engamashumi amane njengomphrofethi wafundisa ukuba kuyekwe ukukhonza izithixo kanye nemikhuba yokonakala phakathi kwabaJuda (Jer. 3:1–5; 7:8–10). Kwakufanele abhekane njalo nokuphikiswa kanye nokuthukwa (Jer. 20:2; 36:18–19; 38:4). Emuva kokuwa kweJerusalema, abaJuda ababalekela eGibithe bamthatha uJeremiya bahamba naye (Jer. 43:5–6), lapho, ngokosiko, bamshaya khona ngamatshe waze wafa.
Incwadi kaJeremiya
Izahluko 1–6 ziqukethe iziphrofetho ezanikwa ngesikhathi sokubusa kukaJosiya. Izahluko 7–20 yiziphrofetho ngesikhathi sikaJehoyakimi. Izahluko 21–38 ziphathelene nokubusa kukaSedekiya. Izahluko 39–44 ziqukethe iziphrofetho futhi zichaza ngezehlakalo zomlando emuva kokuwa kweJerusalema. Isahluko 45 siqukethe isethembiso kuBaruki, umlobi wakhe, sokuthi impilo kaBaruki yayizolondolozwa. Okokugcina, izahluko 46–51 yiziphrofetho ngokuphambene nezizwe zangaphandle. Isahluko 52 yisiphetho somlando. Ezinye zeziphrofetho zikaJeremiya zaziqukethwe ezingcwepheni zethusi zikaLabani ezatholwa nguNefi (1 Nefi 5:10–13). UJeremiya uyaphathwa futhi kabili eNcwadini kaMormoni (1 Nefi 7:14; Hel. 8:20).
Incwadi kaJeremiya ihlanganisa futhi nokuvunywa kokuthi umuntu ubephila empilweni eyandulela eyasemhlabeni futhi nokugcotshwa ngaphambili kukaJeremiya (Jer. 1:4–5); isiphrofetho sokubuya kwabakwa-Israyeli esimweni sabo sokuhlakazeka, kuqoqwa oyedwa wasemzini kanye nababili bomndeni belethwa eSiyoni, izwe elihle lapho abakwa-Israyeli kanye nabakwaJuda bengahlala khona ngokuphepha futhi nangokuthula (Jer. 3:12–19); kanye nesiphrofetho seNkosi iqoqa abakwa-Israyeli emazweni asenyakatho ngokuthumela “abadobi” kanye “nabazingeli” ukuyobathola (Jer. 16:14–21). Lesi sehlakalo sezinsuku zokugcina ngokulinganiswa sizoba sikhulu ngisho kunesikaMose sokulanda abakwa-Israyeli eGibithe (Jer. 16:13–15; 23:8).