Josefa, indodana kaJakobe

ETestamenteni eliDala, yindodana yokuqala kaJakobe kanye noRaheli (Gen. 30:22–24; 37:3).

UJosefa wathola ubuzibulo kwa-Israyeli ngoba uRubeni, indodana yokuqala yomfazi kaJakobe wokuqala, walahlekelwa yilelilungelo ngokona (Ⅰ IziKr. 5:1–2). Ngenxa yokuthi wayefanelwe, uJosefa, njengendodana yokuqala yomfazi kaJakobe wesibili, kwakunguye owayelandela ukuthola isibusiso. UJosefa wathola isibusiso futhi kubaba wakhe isikhashana ngaphambi kokuba uJakobe afe (Gen. 49:22–26).

UJosefa kwakuyindoda eyayinesimilo esihle kakhulu, engumuntu “oqaphelayo” no “hlakaniphileyo” (Gen. 41:39). Ukwenqaba kwakhe umfazi kaPotifari kuyisibonelo sokholo, ubumsulwa, kanye nobuqotho bakhe (Gen. 39:7–12). EGibithe, ngesikhathi uJosefa embula ukuba nguye ngempela kubafowabo, wababonga esikhundleni sokubasola ngendlela ababemphathe ngayo. Wayekholwa wukuthi izenzo zabo zasiza ukuze kufezwe intando kaNkulunkulu (Gen. 45:4–15).

Isambulo sezinsuku zokugcina sembula umsebenzi wokufundisa ivangeli omkhudlwana womndeni kaJosefa ezinsukwini zokugcina (HJS, Gen. 50:24–38 [Isithasiselo]; 2 Nefi 3:3–24; 3 Nefi 20:25–27).

UJakobe wamthanda kakhulu uJosefa futhi wamnika ingubo enemibala eminingi, Gen. 37:3.
Ngenxa yomona abafowabo baJosefa bamzonda futhi benza isu lokumbulala, kodwa esikhundleni salokho bamthengisa kubahwebi, ababesendleleni eya eGibithe, Gen. 37:5–36.
EGibithe, iNkosi yamphumelelisa uJosefa futhi waba ngumbusi wendlu kaPotifari, Gen. 39:1–4.
Umfazi kaPotifari wakhuluma amanga, ethi uJosefa wazama ukumyenga; uJosefa wabekwa icala ngokungalungile futhi wafakwa etilongweni, Gen. 39:7–20.
UJosefa wahumusha amaphupho ezinduna zikaFaro zabaphathizitsha nabaphekizinkwa, Gen. 40.
UFaro waqala ukumthanda uJosefa ngoba uJosefa wayehumushe elinye lamaphupho kaFaro; wamenza uJosefa ukuba ngumbusi eGibithe, Gen. 41:14–45.
U-Efrayimi kanye noManase bazalwa, Gen. 41:50–52.
UJosefa wahlangana futhi noyise kanye nabafowabo, Gen. 45–46.
UJosefa wafa eGibithe eneminyaka yobudala eyikhulu neshumi, Gen. 50:22–26.