Nefi, indodana kaLehi

ENcwadini kaMormoni, yindodana elungileyo kaLehi kanye noSarayi (1 Nefi 1:1–4; 2:5). UNefi wayenokholo olunamandla ezwini likaNkulunkulu (1 Nefi 3:7) futhi waba ngumphrofethi omkhulu, ngumgcini wemibhalo, kanye nomholi wabantu bakhe.

Wayehlonipha futhi wakhuleka ngokholo, 1 Nefi 2:16.
Wabuyela eJerusalema ukuyothola izingcwephe zethusi, 1 Nefi 3–4.
Wabuyela eJerusalema ukuyolanda umndeni ka-Ishmayeli ukuba uze ehlane, 1 Nefi 7.
Wathola umbono ofanayo nalowo owatholwa nguLehi, 1 Nefi 10:17–22; 11.
Wabona embonweni ikusasa labantu bakhe kanye nokubuyiselwa kwevangeli, 1 Nefi 12–13.
Wahumusha umbono womuthi wokuphila, 1 Nefi 15:21–36.
Wephula umnsalo wakhe kodwa ngokholo wakwazi ukuthola ukudla, 1 Nefi 16:18–32.
Wakha umkhumbi futhi wathatha uhambo oluya ezweni lesethembiso, 1 Nefi 17–18.
AmaNefi kanye namaLamani ehlukana, 2 Nefi 5.
Wenza ubufakazi bokugcina, 2 Nefi 33.

Incwadi ka 1 Nefi

Izahluko 1 kuya ku18:8 ziphathelene ikakhulu nomphrofethi uLehi kanye nomndeni wakhe besuka eJerusalema. Bahamba ogwadule olungenalutho baze bafika olwandle. Ku1 Nefi 18:9–23 kukhulunywa ngohambo lwabo emanzini kuyiwa ezweni lesethembiso, njengoba kwakukhombisa iNkosi, phezu kokuba khona kokuvukela kukaLamani kanye noLemuweli. Izahluko 19–22 zikhuluma ngenhloso kaNefi yokugcina imibhalo (1 Nefi 6; 19:18)—ukukholisa bonke ukuba bakhumbule iNkosi umHlengi wabo. Waphinda u-Isaya (1 Nefi 20–21) futhi wayihumusha imiyalezo ka-Isaya, ngethemba lokuthi bonke bamazi uJesu Kristu njengomSindisi kanye nomHlengi wabo (1 Nefi 22:12).

Incwadi ka 2 Nefi

Izahluko 1–4 ziqukethe ezinye zezimfundiso kanye neziphrofetho zokugcina zikaLehi ngaphambi kokufa kwakhe, kuhlanganisa nezibusiso emadodaneni akhe kanye nozalo lwawo. Isahluko 5 sichaza ngokuthi kungani amaNefi azihlukanisa namaLamani. AmaNefi akha ithempeli, afundisa umthetho kaMose, futhi agcina imibhalo. Izahluko 6–10 ziqukethe amazwi kaJakobe, umfowabo omncane kaNefi. UJakobe wabuyekeza umlando wabakwaJuda futhi waphrofetha ngoMesiya, okunye kwakho okwakuthathwe emibhalweni yomphrofethi u-Isaya. Ezahlukweni 11–33 uNefi wabhala ubufakazi bakhe ngoKristu, ubufakazi bukaJakobe, iziphrofetho zezinsuku zokugcina, kanye nezahluko ezahlukene zencwadi ka-Isaya eTestamenteni eliDala.