Josefa, Mwanakomana waJakobo

MuTestamente yaKare, mwanakomana dangwe raJakobo naRakeri (Gen. 30:22–24; 37:3)

Josefa akawana hudangwe muIsraeri nokuti Rubeni, dangwe remudzimai wekutanga waJakobo, akarasikirwa nechinzvimbo ichi pamusana pekutadza (Ⅰ Mak. 5:1–2). Nokuti akanga akakodzera, Josefa, sedangwe remukadzi wechipiri waJakobo, ndiye aitevera mumutsetse wemaropafadzo. Josefa akagashirawo maropafadzo kubva kuna baba vake chinguva chidiki Jakobo asati afa (Gen. 49:22–26).

Josefa aive murume aive nehunhu hunotyisa, munhu “anozvibata uye akachenjera” (Gen. 41:39). Kuramba kwake mudzimai waPotifari mufananidzo werutendo, kuzvibata, nokuve munhu akatwasanuka (Gen. 39:7–12). MuEgipita, apo Josefa akaburitsa pachena kuti ndiyeani kuvakoma vake, akavatenda kunze kwekuti avashore pamusana pekumubata kwavakanga vaita. Akadaira kuti zviito zvavo zvakayamura kuti kuda kutsvene kwaMwari kuitwe (Gen. 45:4–15).

Zvakazarurwa zvemazuva ekupedzisira zvinoratidza basa rakatokura remhuri yaJosefa mumazuva ekupedzisira (2 Ni. 3:3–24; 3 Ni. 20:25–27; DJS, Gen. 50).

Jakobo aida Josefa zvakanyanya uye akamupa bhatyi remavara akawanda, Gen. 37:3.
Pamusana peshanje vakoma vaJosefa vakavamba kumuvenga uye vakarangana kuti vamuuraye, asi vakazomutengesa kuvashambadzi, avo vakanga vari munzira yavo kuenda kuEgipita, Gen. 37:5–36.
MuEgipita, Ishe vakapa kubudirira kuna Josefa uye akave mutongi mumba maPotifari, Gen. 39:1–4.
Mukadzi waPotifari akareva manyepo, achiti Josefa akanga ayedza kumubata; Josefa akasungwa zvisiri izvo uye akaiswa mutirongo, Gen. 39:7–20.
Josefa akadudzira hope dzemuranda mukuru nemubiki wechingwa waFarao, Gen. 40.
Farao akatanga kuda Josefa nokuti Josefa akanga adudzira dzimwe dzehope dzaFarao; akaita Josefa mutongi weEgipita, Gen. 41:14–45.
Efraimi naManase vakaberekwa, Gen. 41:50–52.
Josefa akasanganiswa nababa nevakoma vake, Gen. 45–46.
Josefa akafira muEgipita ave nemakore zana negumi, Gen. 50:22–26.