Petera

Ao amin’ny Testamenta Vaovao, i Petera dia fantatra tamin’ny anarana hoe Simeona na Simona tamin’ny voalohany (2 Pet. 1:1), ary mpanarato avy any Betsaida izay nonina tao Kapernaony niaraka tamin’ny vadiny. Nanasitrana ny rafozam-bavin’i Petera i Jesoa (Mar. 1:29–31). Nantsoina niaraka tamin’i Andrea rahalahiny i Petera mba ho mpianatr’i Jesoa Kristy (Mat. 4:18–22; Mar. 1:16–18; Lio. 5:1–11). Ny Tompo no nanome azy ny anarana aramaika hoe Kefasy izay midika ho “mpahita” na “vato” (Jao. 1:40–42; DJS, Jao. 1:42 [Tovana]). Na mitatitra ny fahalemen’ny maha-nofo sasany nananan’i Petera aza ny Testamenta Vaovao, dia asehony ihany koa ny nandresen’i Petera izany sy ny nanatanjahana azy tamin’ny finoany an’i Jesoa Kristy.

Nambaran’i Petera fa i Jesoa no Kristy sady Zanak’ Andriamanitra (Jao. 6:68–69), ary nifidy azy hihazona ny fanalahidin’ny fanjakany eto an-tany ny Tompo (Mat. 16:13–19). Nahita ny Mpamonjy niova tarehy, ary koa i Mosesy sy i Elia teo an-tendrombohitry ny fiovan-tarehy i Petera (Mat. 17:1–9).

I Petera no lohan’ny Apôstôly tamin’ny androny. Namory ny Fiangonana sy nitarika ny fiantsoana Apôstôly iray hisolo an’i Jodasy Iskariota izy taorian’ny nahafatesana sy ny nitsanganana ary ny niakaran’ny Mpamonjy (Asa 1:15–26). Nanasitrana lehilahy malemy tongotra hatrany am-bohoka i Petera sy i Jaona (Asa 3:1–16) ary navoaka ny fonja tamin’ny fomba mahagaga (Asa 5:11–29; 12:1–19). Tamin’ny fanompoan’i Petera no nanokafana voalohany ny filazantsara tamin’ny Jentilisa (Asa 10–11). Tamin’izao andro farany izao, dia nidina avy any an-danitra niaraka tamin’i Jakoba sy i Jaona i Petera ka nanolotra ny fisoronana Melkizedeka sy ireo fanalahidiny tamin’i Joseph Smith sy i Oliver Cowdery (F&F 27:12–13; 128:20).