Matteus

Postuli Jesú Krists og höfundur fyrstu bókarinnar í Nýja testamentinu. Matteus, Gyðingur sem var tollheimtumaður fyrir Rómverja í Kapernaum, var líklega í þjónustu Heródesar Antípasar. Hann var fyrir trúskiptin þekktur sem Leví, sonur Alfeusar (Mark 2:14). Skömmu eftir að hann fékk köllun að gjörast lærisveinn Jesú, hélt hann veislu sem Drottinn tók þátt í (Matt 9:9–13; Mark 2:14–17; Lúk 5:27–32). Matteus hefur að líkindum verið vel kunnugur ritningum Gamla testamentisins og gat þannig séð uppfyllingu spádóma, lið fyrir lið, í lífi Drottins. Um síðara æviskeið postulans er lítið vitað. Ein arfsögn segir hann hafa dáið píslarvættisdauða.